အၚ်ဝ၊ ဒဳဇြေန်ဗာ(၁၆)
ပ္ဍဲဍုၚ်အၚ်ဝ ပ္ဍဲဂိတုဒဳဇြေန်ဗာ စၟတ်တ္ၚဲ(၁၅) အခိၚ်ကၠာအရှိုဏ် ဟွံဂွံတိုန်ဏီ ဟိုတ်နူတိချဳတုဲ စမြာၚ်ပရေၚ်ဘာသာ အာဲကၟာဲတြေံတြဟ်လ္ၚဵု ဒးလီုလာ်အာလဝ်နွံဒၟံၚ်ရဂှ် ညးဒေသဂမၠိုၚ် ဟီုသ္ဂးလဝ်ရ။
တ္ၚဲဏံ ပ္ဍဲအခိၚ်နူဂယး ၃ နာဍဳ ကဵု ၁၆ မိနေတ်ဂှ် သ္ပဗဟိုဝ်ကဵု ဍုၚ်အၚ်ဝ ဗၟံက်အရာပ်တတာဥူ ခြာပန်မာၚ်တုဲ ရေစ်(ခ်)တာစကေ မၞုံကဆံၚ် (၅ဒသမ၂) တုဲ ကသဳတိ ချဳလဝ်မွဲဝါရဂှ် ဌာနက္ဍိုက်က္ဍိုပ်တၚ်စၞောန်ဗြဲကျာ ကေုာံဇဗေဒဂှ် လလောၚ်တြးလဝ်ရ။
ပရေၚ်ကသဳ တိချဳ ပ္ဍဲဍုၚ်အၚ်ဝ ပွိုၚ်ဍုၚ်ဇီုကပိုက်ဒး ပြာပြာကတ်ကတ်ဂမၠိုၚ်ဂှ် ဒှ်ပွိုၚ်ဍုၚ် မပ္တမ်ကဵု အံၚ်မျတာဇြာန်၊ ချာန်အေတာဇြာန်၊ မဟာအံမျေ၊ ချာန်မျတာဇြေန်၊ ပျဳဂျဳတခေါန်၊ အမရပူရ၊ ဖာသီဇၞော်၊ မတ္တရာ၊ တပုက်ကျေန်၊ ပျေန်ဥူလွေန်၊ တတာဥူတအ်ရဂှ် ဂွံတီကေတ်လဝ်ရ။
ဟိုတ်နူကသဳတိ ချဳလဝ်ဂှ်တုဲ ပ္ဍဲတိုက်ခန္တော ဘာမဏိရတနာ ပ္ဍဲအရှာမ်ဘာဂှ် ခၟောံစိန်စေတဳမၞိက် ဒးပြဟ်ဒတုံစှ်ေလဝ် ပ္ဍဲတိကီု သီုကဵုစမြာၚ်ဘာလ္ၚဵုဂှ် သၠဖဍာန် ခရိုဟ်စှ်ေလဝ်ကီုရ။ သ္အာၚ်နူဂှ်ပၠန် က္ဍိုပ်ကျာ် ပဋိမာရုပ်တြေံတြဟ် ပူဇဴလဝ် ပ္ဍဲသိမ် ဘာဒက္ခိဏာရီု၊ ဍုၚ်အၚ်ဝဂှ်လေဝ် ပြဟ်ဒတုံစှ်ေလဝ်တိကီုရ။
တဲရုပ်ဇာဒိသိုၚ်မေန်ကောန် မဒယှ်တှ်ဒၟံၚ် ပ္ဍဲစေတဳမေန်ကောန် နူဒၞာဲကရောန်ဒၟံၚ် အခိၚ်ကၠာတေံဂှ် မေက်စှ်ေအာ မွဲကရေက်ရဂှ်လေဝ် ဂွံတီကေတ်ရ။
“ကသဳတိဂှ် အကာဲအရာပရေံလောန်ရ၊ ရမျာၚ်လေဝ်။ ဝဝ် ဝဝ် ဗီုကဵုဓဇက်ကပိုက် ဓရိုက်ပချဳဒၟံၚ်ရ။ ပရေၚ်လီုလာ်ဂှ်တှ်ေ သ္ၚိဌာန်မၞိဟ်မံၚ်ဂှ် ၜိုန်ဟွံဂွံမိၚ်လဝ်ဏီကီုလေဝ် ကလၚ်ဒၟံၚ်ပရိုၚ် စမြာၚ်တြေံတြဟ်တအ်ဖိုဟ်ရ” ဂှ် ညးတန်တဴဒၟံၚ် ပ္ဍဲသ္ၚိဝန်မျနန္ဒာမွဲတၠ ဟီုသ္ဂးလဝ်ရ။
ပရေၚ်ကသဳတိချဳဂှ် ပ္ဍဲမွဲဗွိုၚ် ဍုၚ်အၚ်ဝသၟးဟွံသေၚ်တုဲ ပ္ဍဲပျေန်ဥူလွေန် တိဍာ်ဆက်စပ်ဒၟံၚ် ပ္ဍဲအရာပ်လ္ၚဵုတအ်ဂှ်လေဝ် ဒးဒုၚ်လဝ်ညိညဇြိုၚ်သာကီုရဂှ် ညးဒေသဂမၠိုၚ် ဟီုသ္ဂးလဝ်ရ။
အခိၚ်လၟဟ်ဏံမ္ဂး ဟိုတ်နူကသဳတိ ချဳလဝ်တုဲ ဗ္ၜတ်လီုလာ်ဆောံလေၚ်အာဂှ် နူကဵုဌာနမဆေၚ်စပ်တအ် လလောၚ်တြးပ္တိတ်လဝ် ဟၟဲဏီရ။
ပရိုၚ် – သြၚ်လောန်တိုၚ်(မ်)
ဗီုဓာတ် – CJ