မတ်မလီု၊ ဒဳဇြေမ်ဗာ (၂၀)
ပ္ဍဲတွဵုရးဍုၚ်မန် အပ္ဍဲကာလဒပ်ပၞာန်သီအဝဵု ကြပ် (၂) သၞာံဂှ် သီုကဵုပါလုပ် ကပေါတ်တမ်တံဂှ် ခရိတ်အိုတ်နာနာတံ ဇၞော်သၠုၚ်ဒၟံၚ်ဂှ်ရ ပွမတဵုသြောံက္ညၚ်တံ သဝ်စှ်ေကၠုၚ် တီတီဒှ်ဒှ်ဂှ် သၟာဗ္ၚတဵုသြောံတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
သၟာဗ္ၚ မတဵုသြောံက္ညၚ်တံဝွံ ကြဴနူဒပ်ပၞာန်သီအဝဵုတုဲဂှ် ဒးဆေၚ်ဒၟံၚ်မုက်ကဵု ပြသၞာကပေါတ်တမ်ဂမၠိုၚ် မပ္တံကဵု ဝါဲဓာတ်၊ ကၠေၚ်စက်၊ ဂဥုဲဂစိုတ်စၟတံမပါလုပ် သီုကဵုပြသၞာခရိတ်အိုတ်နာနာ သၠုၚ်တိုန်ဒၟံၚ်ကဵုဆတံ ဇၞော်ကဵုဇြဟတ်ရ။
မွဲလ္ပာ်ပၠန်ဂှ် သၟာဗ္ၚတဵုသြောံက္ညၚ်တံဝွံ တမ်ရိုဟ်ဍာ် မနွံပၟိက်အဓိက သွက်သြောံက္ညၚ်တံဂှ် လ္ပာ်ကံၚ်ဇြဳပၞာန်တံ ရီုဗၚ်ကဵု ဍိုက်က်ပေၚ်ၚ် ဟွံမာန်ဂှ်ရ ဒးဂဗဒၟံၚ် အခက်အိုတ်ရ။
သၟာဗ္ၚတဵုဒၟံၚ်သြောံက္ညၚ်မွဲတၠဂှ် ကြဴနူဒပ်ပၞာန်သီအဝဵုတုဲဂှ် သ္အာၚ်နူဟွံဂွံဍာ် သ္ဂောံတဵုလွဳတံ ဍိုက်က်ပေၚ်ၚ်ဂှ် ဟိုတ်နူခရိတ်အိုတ်နာနာ ဇၞော်သၠုၚ်တံဂှ်ရ ဒဒှ်မတဵုသြောံက္ညၚ် (၃) ဂအုံ (၁) ဂအုံ ဒးဖအောန်ဖျေံလဝ်ဂှ် ဟီုရ။
“တိဨကတဵုတံဂှ် အောန်စှ်ေအာရ၊ ကၠာတေံဂှ်တှ်ေ တိဨကတဵု နွံ (၃၀၀၀) မ္ဂး လၟုဟ်ၜိုတ် (၂၀၀၀) ဓဝ်ရ တဵုမာန်၊ အခက်အခုဲ သြောံက္ညၚ်တံဂှ် ပိသၞာံမွဲဝါ ဒးကလေၚ်ဖံက်ကဵု ကြုၚ်စောဝ်၊ မြံၚ်တံရ၊ လၟုဟ်မ္ဂး အခိၚ်ဖံက် ပိသၞာံမွဲဝါဂှ် ဟွံမွဲရပုဟ်၊ အယောၚ်အလာ ဍာ်ဂှ်လေဝ် ဟွံခိုဟ်ပုဟ်လေဝ်၊ ၚုဟ်တမ်တံ သၠုၚ်တိုန်အာယျ၊ ဗီုကဵုသြောံက္ညၚ်တံဟီုတှ်ေ မွဲနဂှ် ဒးရာန်ဒၟံၚ် (၂၅၀၀၀) ရ၊ ဟွံဒးကဵုသၞောတ်တှ်ေ သၟာဗ္ၚတဵုသြောံက္ညၚ်မွဲတၠဂှ် ကျအာမ္ဂး ဘဝညးတေံ လီုရ” သာ်ဝွံ သ္ဂးရ။
တမ်ရိုဟ်ဍာ် မနွံပၟိက် ပ္ဍဲအရာတဵုသြောံက္ညၚ်တံဂှ် လက်ထက်အလဵုအသဳကၠာတေံတှ်ေ ကၟာတ်ကြုၚ်စောဝ်၊ မြံၚ်တံတုဲ စဳဇန်ရေၚ်တၠုၚ်ကဵုကီုလေဝ် ပ္ဍဲလက်ထက်ကံၚ်ဇြဳပၞာန်ဂှ် ရီုဗၚ်ကဵု အောန်ကၠုၚ်ရဂှ် သ္ဂးရ။
သၟာဗ္ၚ တဵုသြောံက္ညၚ်မွဲတၠဂှ်လေဝ် မ္ၚးနူခရိတ်အိုတ်နာနာ သၠုၚ်တိုန်ဂှ် ဟိုတ်နူကဵုသၟာကမၠောန် အောန်ဒၟံၚ်ဂှ်ရ ပ္ဍဲရာသဳသြောံက္ညၚ်သၞာံဏံဂှ် ဒေါအ်ဇူကၠုၚ် ပရေၚ်တဵုလွဳတံ နွံကၠုၚ်ဂှ် ဟီုရ။
“ၚုဟ်ကပေါတ်တမ်တံဂှ်လေဝ် က္ဍၚ်၊ သၟာဗ္ၚတံဟီုဂှ်လေဝ် ကလောန်ဏံရ နွံတုဲ ကၠောန်ဂှ် ဒးကၠောန်ဒၟံၚ်ရ၊ မွဲဨကတှ်ေ အောန်အိုတ် ခရိတ်အိုတ်ဂှ် မွဲဨက (၇) ကိုဋ် (၈) ကိုဋ်နွံရ၊ ဒမြိပ်တိတ်ချိၚ်လဝ်ဂှ် မွဲဨက ဂွံ (၁၀၀) နမှ ဒှ်ဏောၚ်၊ ယဝ်ရသၟဝ်ဒမြိပ်ချိၚ်လဝ်ဂှ် ယအ်အာမ္ဂး သၟာဗ္ၚတံဂှ် ပရဲပရာဟွံမွဲရပုဟ်၊ သၞာံဏံဂှ် သၟာဗ္ၚလ္ၚဵုတံလေဝ် ဟွံကၠောန်ရပုဟ်ဂှ် ဂွံမိၚ်ရ” သာ်ဝွံ သ္ဂးရ။
သၟာဗ္ၚ တဵုသြောံက္ညၚ်တံဝွံ ကၠာတေံ မွဲဨက ခရိတ်အိုတ် နူကဵု (၄) ကိုဋ်ဒ္ကေဝ်ဟေၚ် နွံကၠုၚ်လဝ်ဂှ် ကြဴနူဒပ်ပၞာန်သီအဝဵုတုဲ မွဲဨက အိုတ်ကၠုၚ် စဵုကဵု (၁၀) ကိုဋ်ဒ္ကေဝ်ဂှ်ရ ဒမြိပ်သြောံတိတ် အောန်တုဲ ကျဗြံဂှ် ဂွိၚ်ဒၟံၚ်အိုတ်ရ။
ပ္ဍဲတွဵုရးဍုၚ်မန်ဂှ် တိဨကတဵုသြောံတံ နွံဒၟံၚ် (၇) ကိုဋ်ပြၚ်တုဲ တိဨကတဵုသြောံကသီုဂှ် တြဴကိုဋ်ဒ္စါံဠက်ပြၚ်၊ တိဨကတဵုသြောံက္ညၚ်ဂှ် (၃၇၀၀၀) ပြၚ် နွံဒၟံၚ်ရ၊ ဆ္ဂး ပရေၚ်တဵုသြောံက္ညၚ်ဂှ်ဝွံ အပ္ဍဲကာလဒပ်ပၞာန်သီလဝ်အဝဵုဂှ် ယအ်ဒၟံၚ် တီတီဒှ်ဒှ်ရ။
အတိုၚ်ဂလာန်တၠကမၠောန်သြောံသ္ၚုတံဂှ်မ္ဂး မွဲကရောံကဵု ဒဒှ်မတဵုသြောံက္ညၚ်တံ ယအ်စှ်ေကၠုၚ်ဂှ် ဒမြိပ်သြောံကသီုတိတ်တံလေဝ် စှ်ေလဝ်ကီုဂှ်ရ ၚုဟ်သ္ၚု ထပ်သၠုၚ်တိုန်ကၠုၚ်မာန်ရောၚ် သ္ၚဳဂၠိပ်လဝ်အိုတ်ရ။
ပရိုၚ်−သြၚ်လောန်တိုၚ်(မ်)