မတ်မလီု၊ ဂျူလာၚ် (၁၃)
ပ္ဍဲကၟိန်ဍုၚ်ဗၟာ ဟိုတ်နူဂွံဆဵုလဝ် စၟယဲအိုဝ်မဳခရောန် မဗဳဇပြံၚ် BA.4 ကေုာံ BA.5 တံဂှ်ရ နကဵုညးဍုၚ်ကွာန်တံ ဟွံစုတ်ဟွံဂွံ သွက်ဂွံကလေၚ်စုတ်ကဵု Mask အိုတ်ဂှ် ညးတာလျိုၚ် ဌာနဝန်ဇၞော်ပရေၚ်ထတ်ယုက် ကံၚ်ဇြဳပၞာန် ဖ္တိုက်ဖ္အောဝ်လဝ်ရ။
ဌာနဝန်ဇၞော်ပရေၚ်ထတ်ယုက် သၟဝ်တဲကံၚ်ဇြဳပၞာန်ဝွံ တုဲကၠုၚ် ပ္ဍဲဂိတုဂျောန် (၃၀) တေံဂှ် ပ္ဍဲအရာစၟဳစၟတ်စမ်ရံၚ် ဗီုပြၚ်ဓာတ်ပါ် (၁၆) သ္ဇက်ဒှ်သံသယ သ္ဂောံဆဵုကေတ် စၟယဲမဗဳဇပြံၚ်တံမာန်ဂှ် ပ္ဍဲဂိတုဂျူလာၚ် (၁၂) ဂှ် ဒဒှ်ရဂွံဆဵုကေတ်လဝ် စၟယဲမဗဳဇပြံၚ် အိုဝ်မဳခရောန် BA.4 ကေုာံ BA.5 တံဂှ် လလောၚ်ပ္တိတ်လဝ်ရ။
ညးမဂွံဆဵုလဝ် စၟယဲအိုဝ်မဳခရောန် မဗဳဇပြံၚ် သီု (၆) တၠဂှ်ဝွံ ဒှ်ကောန်ကၟိန်ဍုၚ်ဗၟာ မစဴကၠုၚ်လဝ် နူကဵုဍုၚ်သ္အာၚ်တံတုဲ ဗွဲကြဴဂွံဆဵု စၟယဲ ပ္ဍဲညးတံဂှ်တုဲ အတိုၚ်တ္ၚဲမစၟတ်လဝ်ဂှ် စွံတၞဟ်ခြာတုဲ လွဳလွတ်ကဵုလဝ်ဂှ် ထ္မံက်ထ္ၜးလဝ် ပ္ဍဲတၚ်လလောၚ်တြး ဌာနဝန်ဇၞော်ပရေၚ်ထတ်ယုက် ကံၚ်ဇြဳပၞာန်ရ။
ပ္ဍဲကၟိန်ဍုၚ်ဗၟာ ဟိုတ်နူဂွံဆဵုလဝ် စၟယဲမဗဳဇပြံၚ် အိုဝ်မဳခရောန်တံဂှ်ရ နကဵုညးဍုၚ်ကွာန်တံ ဟွံစုတ်ဟွံဂွံ သွက်ဂွံစုတ်ကဵု Mask အိုတ်ဂှ်ကီု ကေုာံ နကဵုညးဍုၚ်ကွာန် ဟွံဂွံထ္ပက်ဂဥုဲစဵုဒၞါကိုဝ်ဝေဒ်တံဂှ် သွက်ဂွံထ္ပက်ဂဥုဲစဵုဒၞါအိုတ်ကီုဂှ် သ္ကိုပ်က္ဍိုက်ပ်တွဵုရး ဌာနက္ဍိုက်ပ်ပရေၚ်ထတ်ယုက် တွဵုရးဍုၚ်မန် ဒံက်တာနန္ဒဝေန် ဖ္တိုက်ဖ္အောဝ်လဝ်ရ။
“ညးဍုၚ်ကွာန်တံဂှ် အတိုၚ်ဗီုတြေံတေံ စုတ် Mask ဏောၚ်၊ ကြာတ်တဲဏောၚ်၊ ဒးပါဲမၞိဟ် ကောံကလောံတံဏောၚ်၊ ဒးထ္ပက်ဂဥုဲစဵုဒၞါဏောၚ်၊ ပေၚ် (၆) ဂိတုမ္ဂး ဒးထ္ပက် booster ဏောၚ်၊ ဇကုဇကု မံၚ်စဟွံခိုဟ် ထေၚ်ခယျမ္ဂး လ္ပလုက်စုက်ကဵု ညးတၞဟ်ညိ” သာ်ဝွံ သ္ဂးရ။
အတိုၚ်တၚ်လလောၚ်တြး ဌာနဝန်ဇၞော်ပရေၚ်ထတ်ယုက် သၟဝ်တဲကံၚ်ဇြဳပၞာန်ဂှ်မ္ဂး အပ္ဍဲဂိတုဂျူလာၚ်ဏံ မ္ၚးနူစၟယဲ မဗဳဇပြံၚ် အိုဝ်မဳခရောန်ဂှ်တုဲ မၞိဟ်မဂွံဆဵုလဝ် စၟယဲကိုဝ်ဝေဒ်ဂှ် စဵုကဵု (၁၃၀) ပြၚ် နွံကၠုၚ်တုဲ ပ္ဍဲကဵုဂှ် (၁၀၀) ပြၚ်ဝွံ ဒှ်ညးမစဴကၠုၚ် နူကဵုဍုၚ်သ္အာၚ်တံရဂှ် လလောၚ်ပ္တိတ်လဝ်ရ။
ကောန်ကၟိန်ဍုၚ်ဗၟာ မစဴကၠုၚ် နူကဵုကၟိန်ဍုၚ်သ္အာၚ်တံဂှ် မၚ်မွဲလွဳလွတ်ကဵုဒၟံၚ် ပ္ဍဲဒၞါဲမံၚ်တၞဟ်ခြာ မဆေၚ်စပ်တံရဂှ် သ္ဂးလဝ်ရ။
ညးတာလျိုၚ် ဂကောံရီုဗၚ်ဟံၚ်ပြာ်ပရေၚ်မၞိဟ်မွဲတၠဂှ် ကုညးမစဴကၠုၚ် နူကဵုကၟိန်ဍုၚ်သ္အာၚ် နကဵုဂၠံၚ်တရဴ မလုပ်သၞောဝ်တံဂှ်ဟေၚ် စကာကဵုလုပ်လဝ် ကွာရာန်တေန်နွံကီုလေဝ် ညးမစဴကၠုၚ် ဟွံလုပ်သၞောဝ်တံလေဝ် နွံဒၟံၚ်ဂှ်ရ အကာဲအရာ ကၠောံထၞာန်စၟယဲမာန်တံ နွံဒၟံၚ်ရောၚ်ဂှ် သ္ဂးရ။
“ဇၟာပ်မၞိဟ်မစဴကၠုၚ် နူကဵုဂၠံၚ်ကမၠတ်ဟွံသေၚ် နူကဵုဂၠံၚ်ဗဗွဲဓဝ်တံဂှ်တှ်ေ ဒးလုပ် Q သီုဖအိုတ်ရောၚ်၊ ပ္ဍဲမြဝတဳဂှ်တှ်ေ ကလေၚ်စိုပ်ကၠုၚ်ဂှ်ဗက် စၟဳစၟတ်ဟဂှ်ရ၊ လုပ် Q တုဲတှ်ေ အဏံဂှ် Isolation 3 ( ဒၞါဲစွံတၞဟ်ခြာ) ၊ ပ္ဍဲမတ်မလီုဂှ်တှ်ေ ပံက်လဝ်ဗ္ဒိုပ် Q၊ ပိုယ်တံပလံၚ် အေဒၞါဲဂှ်၊ သွက်ညးမစဴကၠုၚ် မလုပ်သၞောဝ်တံဂှ် ဟွံဒးဂွိၚ်ပုဟ်၊ သွက်ညးမကၠတ်လုပ်ကၠုၚ်တံဂှ် အဓိက သ္ဇက်ဒးဂွိၚ်နွံရ၊ ကၠာတေံလေဝ် ဗီုဏံရ၊ ပရေၚ်ကၠောံထၞာန် စလဝ် နူကဵုညးမကၠတ်လုပ်တံရဏောၚ်၊ နူကဵုညးမကၠတ်လုပ်ကၠုၚ်တံဂှ်ရ ပရေၚ်ကၠောံထၞာန် သာတုဲသ္ဂောံဒှ်မာန် နွံရောၚ်” သာ်ဝွံ သ္ဂးရ။
ဌာနဝန်ဇၞော် ပရေၚ်ထတ်ယုက် ကံၚ်ဇြဳပၞာန်ဂှ် အတိုၚ်ဍုၚ်သ္အာၚ်တံ လ္ၚတ်ဂွံဆဵုလဝ်ဂှ်မ္ဂး စၟယဲအိုဝ်မဳခရောန် မဗဳဇပြံၚ်ဂှ်ဝွံ ပ္ဍဲကဵုညးမထ္ပက်လဝ် ဂဥုဲစဵုဒၞါကဝ်ဝေဒ် လတန်ပေၚ်ၚ်တုဲတံဂှ် လက္ချန်ယဲ သ္ကာတ်မြဟ်အောန်မာန် ကေုာံ ချိုတ်ဂျိုၚ်အောန်မာန်ဂှ် ဂွံဆဵုကေတ်ရဂှ် လလောၚ်ပ္တိတ်လဝ်ရ။
ပ္ဍဲကၟိန်ဍုၚ်ဗၟာ ဗွဲကြဴဒပ်ပၞာန်သီအဝဵုတုဲ ဟိုတ်နူစက်ယန္တယာ ပရေၚ်ထတ်ယုက် သရိုဟ်စှ်ေလဝ်ဂှ်ရ တုဲကၠုၚ် အပ္ဍဲကာလကဝ်ဝေဒ် လပှ်တတိယဂှ် ညးဒးဒုၚ်ကၠောံထၞာန် စၟယဲကဝ်ဝေဒ် (၁၀၀၀၀) ပြၚ် ချိုတ်အာလဝ်ဂှ် ဌာနဝန်ဇၞော်ပရေၚ်ထတ်ယုက်ကံၚ်ဇြဳပၞာန် လလောၚ်ပ္တိတ်လဝ်ရ။
အတိုၚ်ဂလာန် ညးမရီုဗၚ်ကဵုဒၟံၚ် ပရေၚ်ကဝ်ဝေဒ်တံဂှ် ညးမဒးချိုတ်အာ ဟိုတ်နူယဲကိုဝ်ဝေဒ်တံဝွံ လ္တူနူတၚ်နၚ် ကံၚ်ဇြဳပၞာန် မလလောၚ်ပ္တိတ်လဝ်ဂှ် ပ္ဍဲဗလးတိဏံ တၟာဂလိုၚ်ဂၠိုၚ်မာန်ရောၚ်ဂှ် သ္ဂးလဝ်ရ။
ပရိုၚ်−သြၚ်လောန်တိုၚ်(မ်)