ဒဳမအ်သဵု၊ ဂျူလာၚ် (၁၃)
ဟိုတ်နူအကာဲအရာ ပရေၚ်ပၞာန်ၜါလ္ပာ်တုဲ ဂၠံၚ်ဇၞော်လွိုၚ်ကဝ်−မဝ်ချဳ ဗၟံက်ဒဳမအ်သဵု တွဵုရးကရေၚ်ဍာဲဂှ် စနူဂိတုဂျူလာၚ် (၁၁) တုဲ မွဲသတ္တာဟမ္ဂး (၃) တ္ၚဲဓဝ်ဟေၚ် ကဵုအာအခေါၚ်တတ်ကၠောံ အာကၠုၚ်ရောၚ်ဂှ် တမ်ဒပ် (၁၀) ဒပ်စဵုဒၞါကောန်ဂကူကရေၚ်ဍာဲ KNDF လလောၚ်ပ္တိတ်လဝ်ရ။
အခေါၚ်သုၚ်စောဲ ဂၠံၚ်ဇၞော် လွိုၚ်ကဝ်−မဝ်ချဳဂှ် ဒးပိုၚ်ကၞာတ် အတိုၚ်တၚ်သ္ဂုတ်သွာတ် ပေါဲသဳကၠဳတမ်ဒပ် ဒပ်စဵုဒၞါကောန်ဂကူကရေၚ်ဍာဲ KNDF ကဵု သ္ကိုပ်ပရေၚ်အုပ်ဓုပ် ပွိုၚ်ဍုၚ်ဒဳမအ်သဵု၊ ဌာနဝန်ဇၞော်အပ္ဍဲဍုၚ်၊ အလဵုအသဳကရေၚ်ဍာဲတံရောၚ်ဂှ် သ္ဂးလဝ်ရ။
ဟိုတ်ဂှ်ရ နကဵုကွဳစက်ယာန် မစကာအာ ဂၠံၚ်ကွဳစက် လွိုၚ်ကဝ်−မဝ်ချဳဂှ် သွက်ဂွံဒ္ဂေတ်ဗက်ကဵု စေဝ်ပၞောန် မလလောၚ်ပ္တိတ်လဝ်ဂှ် ကဵု သွက်ဂွံအာကၠုၚ် တ္ၚဲစန်၊ အၚာ၊ ဗုဒ္ဓဝါ ပိတ္ၚဲဂှ်ဟေၚ် ဂှ် KNDF ဒုၚ်လဝ်ဂုဏ် နကဵုမေတ္တာရ။
ဒဒှ်မ ဒးပိုၚ်ကၞာတ်လဝ် အခေါၚ်စကာဂၠံၚ်ကွဳစက် လွိုၚ်ကဝ်−မဝ်ချဳဂှ်ဝွံ သွက်ဂွံထပိုတ်ဇွောံမ ကုဒပ်ကံၚ်ဇြဳပၞာန် မဖျေံလဝ်ဗ္ဒိုပ် အပ္ဍဲတွဵုရးကရေၚ်ဍာဲတံတုဲ ကၠောန်ၜိုတ်လဝ်ရဂှ် သ္ကိုပ်တမ်ဒပ် KNDF B10 ကိုဝ်လေဝ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“အဓိကဂှ်တှ်ေ ကံၚ်ဇြဳပၞာန် မၞုံပ္ဍဲဗဝ်လထေဝ်တံ ဗွဲမဂၠိုၚ် ဗၞိက်တံလုပ်အာ ဇရေၚ်ဍေံတံ နွံရ၊ ဟိုတ်ဂှ်ရ ပိုယ်တံဂှ် သ္ၚုဂှ် နကဵုအပိုၚ်အခြာရ ပ္တိုန်၊ အတိုၚ်ကွဳစက် မွဲဖ္ဍိုက်ဂှ် ဟွံကဵုပ္တိုန်ပုဟ်၊ မုဒှ်ရောဟီုတှ်ေ သွက်ဂွံထပိုတ်ဇွောံမ ကံၚ်ဇြဳပၞာန်တံဂှ် ပိုယ်တံ ရန်တၟံလဝ်” သာ်ဝွံ သ္ဂးရ။
ပ္ဍဲကဵုစေဝ်ပၞောန် မပိုၚ်ကၞာတ်လဝ်တံဂှ် နကဵုယာန်မသုၚ်စောဲအာ ဂၠံၚ်ကွဳစက် လွိုၚ်ကဝ်−မဝ်ချဳတံဂှ် ညံၚ်ဟွံဂွံဖ္ဍိုက်ပ္တိုန် ညးအာတရဴဍုၚ်သ္အာၚ်တံ၊ ဇက်ပလံၚ် တိဗိလာတ် (တိသြောတ်)မ္ဂး လိက်ထံက်ဂလာန်ခရိုၚ် လၟိဟ် (၂) ညံၚ်ဂွံပါကီု၊ ညံၚ်ဂွိုအ်ဇက်ပလံၚ် လ္တူ သ္ၚု(၁၀) ရိုက်ဂှ်ကီု ကေုာံ ညံၚ်ဂွိုအ်ယိုက်ပလံၚ် ဗၞိက်တိတ်နူ ကံၚ်ဇြဳပၞာန်တံ ဒှ်တမ် ပါလုပ်ရ။
ဆ္ဂး အပ္ဍဲ (၃) တ္ၚဲ မပိုၚ်ကၞာတ်လဝ်ဂှ် ကိစ္စစပ်ကဵု ပရေၚ်ထတ်ယုက်၊ ပရေၚ်ပါဲဒဴဘဲပၞာန်တံမ္ဂး ကဵုအာအခေါၚ်အာကၠုၚ်ရောၚ်ဂှ် တမ်ဒပ် ဒပ်စဵုဒၞါကောန်ဂကူကရေၚ်ဍာဲ KNDF လလောၚ်ပ္တိတ်လဝ်ရ။
အပ္ဍဲတွဵုရးကရေၚ်ဍာဲဂှ် ဗွဲကြဴဒပ်ပၞာန်သီအဝဵုတုဲ အကြာဒပ်ကံၚ်ဇြဳပၞာန်ကဵု ဂကောံဒပ်စဵုဒၞါညးဒေသတံဂှ် ပေါဲဗ္တိုက်ဇီုမုက်တံ က္တဵုဒှ်ဒၟံၚ် အဆက်က်တုဲ တိဍာ်လ္ၚဵုတံဂှ် ဂကောံဒပ်စဵုဒၞါညးဒေသတံ ထိၚ်ဒက်လဝ်ရ။
ပရိုၚ်−သြၚ်လောန်တိုၚ်(မ်)