မတ်မလီု- ဒဳဇြေန်ဗာ(၂၁)
ညံၚ်ကံၚ်ဇြဳပၞာန်ပၞာန်သီအဝဵု ဟွံဂွံကၠောန် ကမၠောန်စဳရေၚ်ဖျေံဒဏ်ဂစိုတ် ကောန်ထံၚ်ပရေၚ်ဍုၚ်ကွာန်တအ် နကဵုပၟိက်စိုတ်ဇကုဂှ် ဌာနဝန်ဇၞော်ပရေၚ်ဍုၚ်သ္အာၚ် အလဵုအသဳပရေၚ်ညဳသၟဟ်ကောန်ဂကူ အာတ်မိက်လဝ် အဳယူကေုာံ အာဇြဳယာန်တအ် သွက်ဂွံကဵုအာ ဇြဟတ်ဓရိုဟ်ရ။
စပ်ကဵုတၚ်လလောၚ်တြးပံၚ်တောဲ က္ဍိုပ်သ္ကိုပ် ကောံဓရီု အဳယူ-အာဇြဳယာန်ကဆံၚ်လတူ မကၠောန်ဗဒှ်လဝ် ပ္ဍဲဂိတုဒဳဇြေန်ဗာ တုဲကၠုၚ်စၟတ်တ္ၚဲ (၁၄)ဏံဂှ် အာတ်မိက်လဝ် ပ္ဍဲကဵုတၚ်လလောၚ်တြး NUG ဂှ်ရ။
သွက်ဂွံခရိုဟ်ပလီု ဍာ်ဒကေဝ်ဂကောံပၞာန် ကၠောန်သ္ပဒၟံၚ် ပွကြံကြဓဇန်ကြာန် လတူကောန်ညးအရာပ် ဟၟဲကဵုဒုဟ်ဒဒဏ် တၞဟ်သ္အာၚ်မာန်ပၠန်ဂှ် ဒးအာတ်မိက်အာ ပရေၚ်ရေၚ်တၠုၚ်စိုပ်တရဴရောၚ်ဂှ် ဟီုသ္ဂးလဝ်ရ။
သ္အာၚ်နူဏံပၠန် ဟိုတ်နူဂကောံပၞာန် မက္တဵုဗဒှ်ဒၟံၚ် ပရေၚ်ၜိုဟ်လလံ ကေုာံပရေၚ်ဂီုကၠီု ညံၚ်ဟွံဂွံညိၚ်ဝတ်ဂှ်တုဲ သွက်ဂွံဘိုၚ်ရီုဗၚ် သောၚ်ကလး ပရေၚ်ကြေပ်ဂြတ် သွာၚ်ဇဳဒိုဟ်ဂှ် ပရေၚ်အာဇြဳယာန်တအ် ပ္တိတ်ဇြဟတ် ဂလိုၚ်ပတိုန်ၜါဆဂှ် သွက်အလဵုအသဳ NUG ဂွံပံၚ်တောဲရေၚ်တၠုၚ်အာမွဲကရောံ ဒှ်ဒၟံၚ်ဒတုဲရဂှ် ဓမံက်ထ္ၜးလဝ် ပ္ဍဲတၚ်လလောၚ်တြးဂှ်ရ။
ပ္ဍဲတၚ်လလောၚ်တြး အဳယူ-အာဇြဳယာန်ပံၚ်တောဲဂှ် ဟွံဂွံထံက်လဝ်ဂလာန် ဟွံဂွံဓမံက်ထ္ၜးလဝ် ဒဒှ်ရအလဵုအသဳ NUG ဂှ် ဒှ်ညးစၞးကောန်ညးဍုၚ်ကွာန် ကၟိန်ဍုၚ်ဗၟာ လုပ်သၞောဝ်ကီု သွက်ဂွံဓမံက်ထ္ၜး ဒဒှ်ရ ပျုတ်ဗ္ဒေက် ပွတၠအဝဵုပၞာန် ကြံကြဓဇန်ကြာန်ဂှ်လေဝ် ယုတ်ဒေက်လဝ်ရဂှ် ဌာနဝန်ဇၞော်ပရေၚ်ဍုၚ်သ္အာၚ် ဟီုသ္ဂးလဝ်ရ။
သွက်ဂွံထံက်ဂလာန် လိက်စံၚ်ပဋိဉာဏ် ဖေတ်ဒရေဝ်ဒဳမဝ်ကရေဇြဳကီု ဒးတးပါဲအာ တၚ်ကံၚ်ဇြဳပၞာန် လလောၚ်တြးလဝ် အကာဲအရာကာတၟေၚ်ဂှ်လေဝ် အာတ်မိက်လဝ် ပ္ဍဲတၚ်လလောၚ်တြးဂှ်။
တၚ်တုပ်စိုတ် အဳယူ-အာဇြဳယာန် အရာတုပ်လဝ်စိုတ် သွက်အခေါၚ်အရာမၞိဟ် ကေုာံ အခေါၚ်ဗၠးၜးသ္ဇိုၚ်ဂမၠိုၚ်ဂှ် သွဟ်ပေါဲရုဲမာဲ သၞာံ ၂၀၂၀ ဂှ်ဟေၚ် သ္ပဒ္တန် သ္ပလဝ်သ္ကအ်တဲတုဲ ကၟာတ်လဒဵုစဵုဒၞာအာ ပရေၚ်ဂကောံပၞာန် ပ္တိတ်ဒၟံၚ်ဇြဟတ် သွက်ဂွံကၠောန်ဗဒှ် ပေါဲရုဲမာဲပတောံတုဲ ဒးထ္ၜးပျးကဵု ပရေၚ်သ္ပရှ်ေသှ်ေ လတူကောန်ညးဍုၚ်ကွာန် ကၟိန်ဍုၚ်ဗၟာရောၚ်ဂှ် NUG ဟီုသ္ဂးလဝ်ရ။
ပရိုၚ်သြၚ်လောန်တိုၚ်(မ်)