မဝ်သကိုဝ် – ဒဳဇြေန်ဗာ(၂၁)
သွက်ဂွံစဵုဒၞာအန္တရာယ် ညးပၞံၚ်ဖံက်သစ္စ(သစ္စာဖောက်သူလျှို) ပ္ဍဲကဵုမ္ၚးဍုၚ် အပ္ဍဲဍုၚ်ကီု သီုသွက်ဂွံၚ်မၚ်မွဲရံၚ်စံၚ် ဂကောံမၞိဟ် ကေုာံပယျဵုဒၞက်ရုယှာကီုဂှ် သမ္မတဗလာဒဳမာပူတေန် ကဵုလဝ်အမိၚ်ကဵု ဒပ်ပရေၚ်ဂီုကၠီုဖေတ်ဒရေဝ်ရ။
ပ္ဍဲဂလာန်လၟိၚ် သမ္မတပူတေန် ကိုပ်ကၠာနူဟွံစိုပ် တ္ၚဲဒပ်ပရေၚ်ဂီုကၠီုဂှ် ဟိုတ်နူပရေၚ်ဘပဠတၟိ မံက်ဂတဝ်ကၠုၚ်ဒၟံၚ်တုဲ နွံပၟိက်ဒၟံၚ် ညံၚ်ဂွံကၠောန်သ္ပကဵု ကမၠောန်စၟဳစၟတ်ဂၠိုက်ဂၠာဲ စိုပ်တရဴရဂှ် ဟီုသ္ဂးလဝ်ရ။
“ပရေၚ်ပ္တိတ်ဇြဟတ် ဖံက်ပထောၚ်ပယျဵုဒၞက်သီုဖအိုတ်ဂှ် ဒးပါ်ထကးထောံဏောၚ်၊ ယူနေတ်ပရေၚ်ဆုဲပြံၚ် ချဳဒရာၚ်ကီု သီုကဵုဒပ်တၟေၚ်တအ်ဂှ် သုၚ်စောဲနဲကဲဂၠံၚ်တရဴ ရပ်စပ်သောၚ်ကလးမာန်တုဲ ညံၚ်ဂွံသုၚ်စောဲ ပရေၚ်ဗ္ဂေတ် အရာတအ်ဂှ်၊ နဲကဲပညာ ကေုာံ ဍာ်ဒကေဝ်ချဳဒရာၚ် သၞာဲဒဴသ္ဇိုၚ်ဝန်ဂမၠိုၚ် ကဆံၚ်သၠုၚ်အိုတ်မာန်” ဂှ် ပူတေန်ဟီုစၞောန်လဝ်ကဵု FSB ရ။။
သ္အာၚ်နူဂှ်ပၠန် နကဵုဒပ်ပရေၚ်မၚ်ပယျဵု ကေုာံဒပ်ပရေၚ်ဂီုကၠီုဖေတ်ဒရေဝ် (FSB) တအ်ဂှ် သွက်ဂွံကၠောန်အာ ကမၠောန် သာသ္ကာတ်မြဟ်ဂှ် ညးဟီုလဝ်ဏီရ။
FSB ညးမဆက်ဒုၚ်ကေတ် KGB ခေတ်ဇြောဗဳယာတ် အဓိကဂှ် ကၠောန်သ္ပရေၚ်တၠုၚ်ဒၟံၚ် နဒဒှ်ယန္တရာ မံၚ်ရံၚ်ကျောဝ် ကေုာံသ္ကုတ်ထပိုတ်ဇြေန်ဇြာ ပ္ဍဲကဵုဍုၚ်ရုယှာကီု သီုပ္ဍဲပရေၚ်လောန်ၜက် လတူဍုၚ်ယူကရုၚ်လေဝ် ပါလုပ်ဒၟံၚ် ကရောံဒပ် ပရေၚ်ဂီုကၠီု မွဲစွံ ဂၠိုၚ်ဂၠေၚ်ရဂှ် ဂွံတီကေတ်ရ။
“နွံဒၟံၚ်ပၟိက် သွက်ဂွံဗတိုက်သရိုဟ် ကမၠောန်ပြဝ ဒပ်ပၞာန်တၟေၚ် နူမ္ၚးဍုၚ် သ္ကာတ်တ်မြဟ်ဟ်ကီု၊ ညံၚ်ဂွံဓမံက်ပ္တိုန်အာ ညးဖံက်သစ္စ၊ ညးပၞံၚ် ကေုာံသၟာပလီုပလာ်တအ်ဂှ်ရ၊ နွံဒၟံၚ်ပၟိက်ကဵု ကောန်ဒပ်ချိုတ်ပၠိုတ် နူကဵုအေဂျေန် ပရေၚ်ထံက်ပရိုၚ်ပလန်တဲဂမၠိုၚ် ဂၠိုၚ်အိုတ်ရ” ဂှ် သမ္မတပူတေန် ဟီုသ္ဂးလဝ်ရ။
FSB သ္ကအ်ရဲပူတေန် အလေတ်ဇြေန်ဒါ ဗအ်နဳကောပ် က္ဍိုက်လဝ်က္ဍိုပ်ဂှ် သၠုၚ်ပ္တိုန်အာ ပရေၚ်ကောပ်ကာဲ ဒၞာဲမၞိဟ်ကောံကလောံ၊ စမြိုၚ်စှ်ေဗျူဟာ ကေုာံစမြိုၚ်ဆေၚ်ကဵု ဇြဟတ်ကၠောန်ပ္တိတ်ဂမၠိုၚ်ရောၚ် ဂွံတီကေတ်ရ။
ပ္ဍဲဍုၚ်ရုယှာဂှ် စတမ်နူ အခိၚ်ပေါဲပၞာန်ဒှ်ကၠုၚ်တုဲဂှ် ဗတိုက်သရိုဟ်ဒၟံၚ် ပေါဲထ္ၜးဆန္ဒ ကေုာံ ပရေၚ်လစွံစိုတ်တၞဟ်ခြာတအ်ဂှ်တုဲ ပ္ဍဲပေါဲထ္ၜးဆန္ဒပျုတ်ဗ္ဒေက် စပ်ကဵုပရေၚ်ပူတေန်ပကောံပကေဝ်ဒၟံၚ် ဇြဟတ်ပၞာန် မၞိဟ်(၃)ကိုတ်တုဲ မၞိဟ် (၁၃၀၀) တၠပြၚ် ဒးဒုၚ်ရပ်လဝ်ရ။
စပ်ကဵုပၞာန်လောန်ၜက် လတူဍုၚ်ယူကရုၚ်တုဲ ပူတေန် ဒးဒုၚ်ပူဗိုၚ်လဝ် နကဵုတၚ်ခက်ခုဲဂမၠိုၚ်ဂှ် ပ္ဍဲဂိတုသေတ်တေမ်ဗာ တုဲကၠုၚ်ဏံ အကာဲအရာတိဍာ် သီကေတ်လဝ် နူယူကရုၚ်ဂှ် ဟိုတ်နူခက်ခုဲလောန်ဒၟံၚ်ဂှ်ရ ကဵုလဝ်ပၟိၚ်ကဵု FSB သွက်ဂွံစၟဳစၟတ်ပရေၚ်ဂီုကၠီု ညးမံၚ်တန်တဴဒၟံၚ် ပ္ဍဲကဵုဌာန်ဂှ်ရ။
“ပရေၚ်ဂီုကၠီုညးတအ်ဂှ် ညံၚ်ဂွံနွံကဵု ကဆံၚ်သၠုၚ်အိုတ်ကီု ညံၚ်ဂွံရှ်ေသှ်ေဒ္ဂေတ်ဗက် အခေါၚ်အရာကေုာံပရေၚ်ဗၠးၜး ညးတအ် သွက်ဂွံကၠောန်ကဵု အရာမၞုံပၟိက်သီုဖအိုတ်ဂှ် ဒှ်တာလျိုၚ်ဇကုတအ်ရ” ဂှ် ပူတေန် ဟီုလဝ်တုဲ သွက်ဂွံဗ္ဂပ်ကဵု ကောန်ဒပ်ဂမၠိုၚ် ကြိယာဂတာပ်ခေတ် ကေုာံလွဟ်လက်နက်လေဝ် ကဵုကၠုၚ်လဝ်ကတိပါၚ်ဏီရ။
ပၞာန်လောန်ၜက်ရုယှာ လတူဍုၚ်ယူကရုၚ်ဂှ် မၞုံကၠုၚ်ဒၟံၚ် စဵုကဵုစှ်ဂိတုတုဲ ကြဴနူပေါဲပၞာန်ဂၠးကဝ် အလန်ဒုတိယတုဲ ဒှ်ပဋိပက္ခဥရောပ ဇၞော်အိုတ် အပံၚ်မၞိဟ်ကဵုလက် ဒးချိုတ်လဝ်ကီု မၞိဟ်ဂၠိုၚ်ကဵုပြကောဋိကိုတ်ဂမၠိုၚ် ဒးသၠးထောံလဝ် သ္ၚိဌာန်တုဲ ဍုၚ်ဂမၠိုၚ်ဂှ် သှ်ေၜက်ဒၟံၚ် နကဵုအရာ လီုလာ်စာထောၚ်ရဂှ် ဂွံတီကေတ်ရ။
Ref: Reuters