လ္ဂုၚ်၊ ဒဳဇြေမ်ဗာ (၂၃)
နူကဵုကောံဓရီုကံၚ်ဇြဳပရေၚ်ဂီုကၠီုကုလသမဂ္ဂ သ္ဂုတ်သွာတ်ကဵုလဝ်မာဲ ကုမူအပြောံတၚ်သ္ဂုတ်သွာတ် လ္တူအကြေပ်ဂြတ်ပရေၚ်ဍုၚ်ကွာန် မဒးဆေၚ်ဒၟံၚ်မုက် အပ္ဍဲဍုၚ်ဗၟာတံဂှ်ဝွံ ၜိုန်ရဒှ်အရာတောတက်မွဲကီုလေဝ် ဒးမၚ်ကျောဝ်ဒၟံၚ်ဏီဂှ် သၟာပရေၚ်ဍုၚ်ကွာန်ဝှ်ကြံၚ်ဂမၠိုၚ် ကေုာံ ညးလ္ၚတ်သ္ၚဳဂၠိပ်တံ ဟီုဂးလဝ်ရ။
မူအပြောံတၚ်သ္ဂုတ်သွာတ် ပရေၚ်ဍုၚ်ဗၟာ နူဍုၚ်ဗျိတိၚ် မက္ဍိုက်ပ်ပ္တိုန်ထ္ၜးနၚ်တံဂှ် နူကဵုကောန်ဂကောံ ကံၚ်ဇြဳပရေၚ်ဂီုကၠီုကုလသမဂ္ဂလၟိုန် (၅) ဍုၚ်ဂှ်ကဵု ကောန်ဂကောံဒးအလန် (၁၀) ဍုၚ်တံဂှ် မာဲထံက်ဂလာန် (၁၂) မာဲ၊ မာဲမံၚ်အဒေါဝ် နူကဵုကြုက်၊ ရုယှာ ကေုာံ အိန္ဒိယတံဂှ်ကီု၊ ဍုၚ်ဒစဵုဒစးဟွံမွဲတုဲ ပ္ဍဲဂိတုဒဳဇြေမ်ဗာ (၂၁) ဂှ် သ္ပဒတန်မာန်လဝ်ရ။
တၚ်သ္ဂုတ်သွာတ်တံဏံဝွံ ကြဴနူဍုၚ်ဗၟာ ဂွံပရေၚ်ဗၠးၜးတုဲ အပ္ဍဲပွိုၚ် (၇၀) သၞာံဂှ် ဒှ်တၚ်သ္ဂုတ်သွာတ်ပြာကတ်ပ္ဍဲဝၚ် ကံၚ်ဇြဳပရေၚ်ဂီုကၠီု ကုလသမဂ္ဂ စပ်ကဵုဍုၚ်ဗၟာ အလန်ပထမကၠာအိုတ်ဂှ် သၟာပရေၚ်ဍုၚ်ကွာန်တံ ကေုာံ ညးလ္ၚတ်ဂမၠိုၚ် သ္ပလဝ်တၚ်စၟတ်ရ။
ပ္ဍဲကဵုတၚ်သ္ဂုတ်သွာတ်ဏံဂှ် သွက်ဂွံဒေါအ်ဒေၚ်ကဵု ပွပကီုပရာပ်ဂမၠိုၚ်၊ သွက်ဂွံကလေၚ်ဗလးကဵု ကောန်ထံၚ်ပရေၚ်ဍုၚ်ကွာန် မဒးဒုၚ်ရပ်ထိၚ်လဝ် ဟွံဗဗွဲသၞောဝ် သီုကဵုပါလုပ်ဒဝ်အံၚ်သာန်သုကျဳဂှ် ဖ္တိုက်ဖ္အောဝ်လဝ် ကံၚ်ဇြဳပၞာန်ရ။
သွက်ဂွံထ္မံက်ရုပ်ရဴ တၚ်တုပ်စိုတ် နူကဵုအာဇြဳယာန် ဖျေံစၟတ်လဝ် (၅) တၚ်တံဂှ်ကဵု ဂကောံမပါလုပ်ဒၟံၚ် ပ္ဍဲပဋိပက္ခတံအိုဿီု ပံၚ်တောဲကဵု ညးစၞးတၟေၚ်ကုလသမဂ္ဂ၊ ကလုတ်တမာန်တၟေၚ် အာဇြဳယာန်တံတုဲ သွက်ဂွံစဆဵုဂဗသဳကၠဳ ပ္ညဳပ္ညပ်တံဂှ်လေဝ် ဖ္တိုက်ဖ္အောဝ်လဝ်ရ။
သ္အာၚ်နူဂှ်ပၠန် သွက်ဂွံကဵုအခေါၚ် အရီုအဗၚ်ပရေၚ်ဗ္စာရဏာမၞိဟ် ဟွံမွဲကဵုတွဵုဒၞက်ဂှ်ကီု၊ သွက်ဂွံမၚ်မွဲစဵုဒၞါ ဂကောံဗွိုၚ်မၞိဟ်အောန်တံဂှ်ကဵု သွက်ဂွံရှ်ေသှ်ေ ဆန္ဒညးဍုၚ်ကွာန်တံ မွဲဟာန်ကေုာံ ပွမအာတ်မိက်ဒဳမဝ်ကရေဇြဳတံ ဒှ်တမ် တၚ်နၚ်တံဏံ ပါလုပ်ရ။
သၟာပရေၚ်ဍုၚ်ကွာန်ဝှ်ကြံၚ် ဥူဖေတာန်ဂှ် တၚ်သ္ဂုတ်သွာတ် ကံၚ်ဇြဳပရေၚ်ဂီုကၠီုဂှ်ဝွံ နကဵုကံၚ်ဇြဳပၞာန် ဟွံဒ္ဂေတ်ဗက်မ္ဂး ပွမကဵုဒုဟ် မစိုပ်တရဴသာ်လဵု ရေၚ်တၠုၚ်အာရောဟီုဂှ် ဟွံပါလုပ်ဂှ်ရ ပြဟ်ဟ်ဏံ ဇြဟတ်ဂရိုဟ် ဟွံမွဲဏီပုဟ်ဂှ် သ္ၚဳဂၠိပ်လဝ်ရ။
“ယဝ်ရဟွံဒ္ဂေတ်ဗက် တၚ်သ္ဂုတ်သွာတ်ဏံတှ်ေ ကိစ္စပရူပရာ သာ်လဵုကေတ်အရေဝ် ရေၚ်တၠုၚ်အာရောဟီုဂှ် ပြဟ်ဟ်ဏံ နဒဒှ်ဇြဟတ်ဂရိုဟ်ဂှ် နွံအာဟွံသေၚ်ဏီပုဟ်၊ ဆ္ဂး ဒၟါနူဟွံဒ္ဂေတ်ဗက်သာ်ဏံဂှ်ရ တၚ်သ္ဂုတ်သွာတ် ကံၚ်ဇြဳပရေၚ်ဂီုကၠီု မသ္ကာတ်မြဟ်မွဲပၠန်တံ ဒှ်ကၠုၚ်မာန်ဏောၚ်၊ ဗီုလဵုဒှ်ဒှ် ပရူပရာလ္ၚဵုတံ ဟွံပါကီုလေဝ် ပရူပရာလၟုဟ်တံဂှ် ကိစ္စစိုပ်တရဴဍာံဍာံတံ ပါဒၟံၚ်ရ၊ သွက်ဂွံထ္မံက်ရုပ်ရဴ မူအာဇြဳယာန် မဖျေံစၟတ်လဝ် (၅) တၚ်ဂှ်တုဲ ကံၚ်ဇြဳပရေၚ်ဂီုကၠီု ကဵုဇြဟတ်ဂရိုဟ်လေဝ် ဒှ်ဏောၚ်၊ ဟိုတ်ဂှ်ရ ယဝ်ရရေၚ်တၠုၚ်တၚ်နၚ်တံဏံမာန်မ္ဂး အကာဲအရာဍုၚ်ဗၟာ ဆုဲအာဂတတေံ မွဲဂါမ်ပၠန်ဏောၚ်၊ နူကဵုအကြေပ်အဂြတ်ဏံဂှ် ဂွံပၞော်တိတ်မွဲ မာန်ဏောၚ်” သာ်ဝွံ ညးသ္ဂးရ။
နကဵုကံၚ်ဇြဳပၞာန် ပြဟ်ဟ်ဏံဂှ် ဟိုတ်နူဒ္ဂေတ်ဗက်အာ တၚ်ဖ္တိုက်ဖ္အောဝ်လဝ်တံဏံ ဟွံသေၚ်ဂှ်ရ နကဵုကံၚ်ဇြဳပရေၚ်ဂီုကၠီုကုလသမဂ္ဂ ဒဵုကဵုအကာဲအရာသာ်လဵု ဆက်ကၠောန်သ္ပကၠုၚ် တၚ်သ္ဂုတ်သွာတ်တံမာန်ရောဟီုဂှ် ဒးမၚ်ကျောဝ်ရောၚ် ဥူဖေတာန် ထပ်ဟီုလဝ်ရ။
ပ္ဍဲကဵုတၚ်သ္ဂုတ်သွာတ် ကံၚ်ဇြဳပရေၚ်ဂီုကၠီုကုလသမဂ္ဂတံဂှ် သွက်ဂွံဒေါအ်ဒေၚ်ကဵု ပွမသွံတြးပလံၚ်ပ္တိုန် လွဟ်လက်နက်တံ ကေုာံ သွက်ဂွံကၟာတ်တာဒၞါကဵု ဂၠံၚ်တရဴသြန်လုပ် ကုကံၚ်ဇြဳပၞာန် မကလိလောန်ဒၟံၚ် ရာဇာဝတ်ပၞာန်ဂမၠိုၚ် နူကဵုသၟဝ်က္ဍိုပ် ပရေၚ်ပ္ဍဵုပကောပ်ပကီုပရာပ်တံဏံဂှ် ဟွံပါလုပ်ကၠုၚ်ရ။
ဆ္ဂး ကြုက် ကေုာံ ရုယှာ ဟွံဒစဵုဒစးကၠေံ တၚ်သ္ဂုတ်သွာတ်ဏံ နကဵုအဝဵုဗဳတဝ်ဂှ်ဝွံ ယဝ်ရပရေၚ်ဆက်ဆောံ ကုကံၚ်ဇြဳပၞာန် ယအ်အာမ္ဂး နကဵုကံၚ်ဇြဳပရေၚ်ဂီုကၠီု ပွမကေတ်ဒုဟ် အဆက်လက္ကရဴတံ ဒှ်ကၠုၚ်မာန်ဟာဟီုဂှ် ဒးမၚ်ကျောဝ်အာဏောၚ် ညးလ္ၚတ်သ္ၚဳဂၠိပ်ပရေၚ်ဍုၚ်ကွာန် ဒံက်တာသာၚ်ကျဳဇြေန်သဵု ထံက်ထ္ၜးလဝ်ရ။
“ကြုက်၊ ရုယှာ ဟွံဒစဵုဒစးကၠေံ နကဵုအဝဵုဗဳတဝ်ဟီုဂှ် အကြာဒပ်ပၞာန်ကဵု ဍေံတံဂှ် ပရေၚ်ဆက်ဆောံမွဲမွဲ နွံဒၟံၚ်ယျ၊ နကဵုဍေံတံ အရာမချပ်စၚ်ခြၚ်ဒၟံၚ်ဂှ် သွက်ဂွံဆက်ထံက်ဂလာန် ကုဒပ်ပၞာန် ထေက်၊ ဟွံထေက် သာ်ဏံ ပရူပရာသ္ဇက်ဂွံစၚ်ခြၚ်တံ နွံဒၟံၚ်ယျ ဂွံအဓိပ္ပာယ်သာ်ဏံရ၊ ဗီုတံဏံဂှ် ဇြိုၚ်ဒှ်လေပ်မံၚ်ဏောၚ်၊ ဟိုတ်ဂှ်ရ ဍာ်ဇမၠိၚ်ဂှ် ယဝ်ရဒပ်ပၞာန်ကဵု ရုယှာဒှ်ဒှ်၊ ကြုက်ဒှ်ဒှ် ပရေၚ်ဆက်ဆောံ သိၚ်အာဏောၚ် ဟွံသေၚ်မ္ဂး ယဝ်ရပရေၚ်ထံက်ဂလာန် ကုဍေံတံ ယအ်အာဏောၚ်ဟီုမ္ဂး ကံၚ်ဇြဳပရေၚ်ဂီုကၠီုဂှ် နကဵုတၚ်သ္ဂုတ်သွာတ် မဖျေံစၟတ်လဝ်တံ ပရေၚ်ကေတ်အရေဝ် အဆက်လက္ကရဴ ဒှ်ကၠုၚ်မာန်ဟာဟီုဂှ် ဒးမၚ်ကျောဝ်ဏောၚ်” သာ်ဝွံ ညးသ္ဂးရ။
ဝန်ဇၞော်အခေါၚ်အရာမၞိဟ် အလဵုအသဳညဳသၟဟ်ဂကူ (NUG) ဥူအံၚ်မျဵုမေန်ဂှ် နူကဵုတၚ်သ္ဂုတ်သွာတ် ကံၚ်ဇြဳပရေၚ်ဂီုကၠီုဂှ် သွက်ကမၠောန် မ္ဒးဆက်ဂ္စါန်ရေၚ်တၠုၚ်အာ နူကဵုဍုၚ်သ္အာၚ်တံဂှ် သ္ကဵုဒှ်ဇြဟတ်ဇၞော်ဇၞော်ရောၚ်ဂှ် ချူပ္တိုန်လဝ် နူကဵုအကံက်ဇာဇၞိက်ပရေၚ်မၞိဟ် Facebook ညးရ။
သ္အာၚ်နူဂှ်ပၠန် ကမၠောန်အာဇြဳယာန်တံဂှ်လေဝ် သ္ကဵုဇြဟတ်ခိုဟ်ကၠုၚ်မာန်တုဲ ပရေၚ်ဍုၚ်ဗၟာဝွံ လ္တူဂၠးတိဏံ ဟွံၜိုဟ်သြိုဟ်ဏီပုဟ်ဂးတုဲ ဒှ်ပြဝကဵုကၠေံဇြဟတ် ကုကောန်ဍုၚ်ဗၟာတံမွဲရောၚ်ဂှ် သ္ပလဝ်တၚ်စၟတ်ရ။
ဝန်ဇၞော်ကာဍုၚ်သ္အာၚ်အမေရိကာန်၊ ရုၚ်ကလုတ်အမေရိကာန် စပ်ကဵုဍုၚ်ဗၟာ အာန်တဝ်နဳယိုဝ် ဂျေ ဗလေန်ကာန်ဂှ်လေဝ် ဒဒှ်ရကၟိန်ဍုၚ်အမေရိကာန် ဒုၚ်တၠုၚ် ကုတၚ်သ္ဂုတ်သွာတ်ကံၚ်ဇြဳပရေၚ်ၜိုဟ်လလမ် ကုလသမဂ္ဂဂှ် ပ္ဍဲတ္ၚဲဏံ လလောၚ်ပ္တိတ်လဝ်ရ။
တၚ်သ္ဂုတ်သွာတ်ဏံဝွံ သွက်ဂွံသောၚ်ကလး အကြေပ်အဂြတ်တံဂှ်ကဵု သွက်ဂွံဖအိုတ်ကၠေံ ပြဝပကီုပရာပ် ကေုာံ ပွပ္ဍဵုပ္ဍိုက်တၠအဝဵုပၞာန် မသၠုၚ်ပ္တိုန်အသိၚ်ရေၚ်တၠုၚ်ကၠုၚ် လ္တူညးဍုၚ်ကွာန်ကောန်အရာပ်တံဂှ် ဒှ်လဂါံဇိုၚ် ကံၚ်ဇြဳပရေၚ်ဂီုကၠီု ပၟိက်ဇၞော်မွဲရောၚ် သ္ဂးလဝ်ရ။
ပရိုၚ်−သြၚ်လောန်တိုၚ်(မ်)