မတ်မလီု၊ ဒဳဇြေမ်ဗာ (၂၃)
ဗော်ကျခိုၚ်ယျေ မၞိဟ်တီဂၠိုၚ် နဒဒှ်ဗော် ဒပ်ပၞာန်မကဵုလဝ်အထံက်အရီု လ္ပာ်လက္ကရဴဂှ်ဝွံ အပ္ဍဲတွဵုရးဍုၚ်မန်ဂှ် သွက်ပေါဲရုဲမာဲတုဲ မ္ၚးနူစၟဳစၟတ် ကောန်ဗော်တံဂှ် အရာမပလေဝ်ပလေတ်လ္ၚဵုတံလေဝ် စရေၚ်တၠုၚ်ဒၟံၚ်ယျ သာ်ဝွံ လ္ပာ်ဗော်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ဗော်ကျခိုၚ်ယျေဂှ်ဝွံ ပ္ဍဲပွိုၚ်ဍုၚ်ဂမၠိုၚ် တွဵုရးဍုၚ်မန်တံဂှ် နကဵုကိုန်စဳမာန် (၉၀) တ္ၚဲဂှ် ဗက်သောၚ်ထ္ၜးဒၟံၚ် ပရူပရာသၞောတ်သ္ပစၞးခလဆပ် PR မသုၚ်စောဲအာ ပ္ဍဲပေါဲရုဲမာဲကၠုၚ်စိုပ်ဏံဂှ်ရ။
သ္အာၚ်နူဂှ်ပၠန် လၟေၚ်ကမၠောန် စပ်ကဵုပေါဲရုဲမာဲဂမၠိုၚ်၊ စၟဳစၟတ်စရၚ်ယၟု၊ ပရေၚ်စန်ဒက်ဗော်တံဂှ်ကဵု လၟေၚ်ကမၠောန်ဆက်ကၠောန်အာ အဓာန်ဂတတံဂှ် ပွမလးထ္ၜးသောၚ်ကလးလဝ်တံ ကၠောန်ၜိုတ်ဒၟံၚ်ရ။
စပ်ကဵုအကာဲအရာ မကၠောန်ၜိုတ်ဒၟံၚ် ပရေၚ်ပလေဝ်ပလေတ် သွက်ပေါဲရုဲမာဲကၠုၚ်စိုပ်ဏံဂှ်တုဲ ဗော်ကျခိုၚ်ယျေ တွဵုရးဍုၚ်မန် ဥက္ကဌ ဥူအံၚ်ကျဳတုၚ် ဟီုလဝ် ဗီုလၟုဟ်ရ။
“ဗော်ဂှ်တှ်ေ အတိုၚ်အခိုက်ဍေံတံ သွက်ပေါဲရုဲာမာဲဂှ် ကလေၚ်စၟဳစၟတ်စဳစောတ် ကောန်ဗော်ဍေံတံ၊ စၟဳစၟတ်တုဲတှ်ေ စန်ဒက်ကၠောန်ဒၟံၚ် သာ်ဏံရ၊ လၟုဟ်ဂှ်တှ်ေ ကွာန်ညး အရာပ်ညး ဗီုညးကဵုညး ဆၜိုတ်ကလေၚ်စၟဳစၟတ်ကဵုဒၟံၚ် ကောန်ဗော်တံသၟးရ၊ ဂွံလဝ် ကဆံၚ်ဏံညိကီု” သာ်ဝွံ သ္ဂးရ။
ဆ္ဂး ဗော်ကျခိုၚ်ယျေဂှ် စပ်ကဵုကိုန်စဳမာန် (၉၀) တ္ၚဲ မကၠောန်ဒၟံၚ်သွက်ပရေၚ်အံၚ်ဇၞး ပေါဲရုဲမာဲဂှ်တုဲ တၚ်နၚ်လစှ်ေတံဂှ် ထ္မံက်ပ္တိတ်ဟီုဂးလဝ် ဟွံမွဲရ။
သွက်ပေါဲရုဲမာဲဂှ် ၜိုန်ရကၠောန်ဒၟံၚ် ပရေၚ်ပြဟ်ဒုၚ် ပလေဝ်ပလေတ်လ္ၚဵုတံကီုလေဝ် ဒၟါနူအကာအရာ ပရေၚ်ဍုၚ်ကွာန်လၟုဟ်တုဲ ပ္ဍဲဗလးတိဏံ ၜိုတ်ထေၚ်လဝ် ရေၚ်တၠုၚ်ဟွံမာန်ဏီပုဟ်ဂှ် ညးအုပ်ကာ ဗော်ကျခိုၚ်ယျေ တွဵုရးဍုၚ်မန် ဥူတက်ထိုဲ သ္ဂးရ။
“ အေဂှ်တှ်ေ လၟုဟ်မှ ပိုယ်တံ ဆၜိုတ်ဂွံပြဟ်ဒုၚ် ပလေဝ်ပလေတ်ညိကီု၊ အကာဲအရာ ဗလးတိဏံဂှ် ခိုဟ်ဒၟံၚ်ကွေံကွေံ ဟွံသေၚ်ပုဟ်လေဝ်၊ မုမှလေဝ် တၟေၚ်ၚ်တၟဟ်ဟ် ကၠောန်မာန်ဂှ် ဟွံမွဲဏီပုဟ်၊ အလန်ဏံ ပိုယ်တံ ဆၜိုတ်စၟဳစၟတ်ကောန်ဗော်တံညိကီု၊ လၟုဟ် ကောန်ဗော် (၁) ကိုဋ် (၉) ဠက် မစုတ်လဝ် ပ္ဍဲကောန်ပျူတာ ပ္ဍဲသာဗာတံသၟးဂှ်ရ ပိုယ်တံ ကလေၚ်ပ္တိတ်တၚ်နၚ်တံတုဲ ပ္ညဳပ္ညပ်ကဵု ဥက္ကဌ နူကဵုမဆေၚ်စပ်တံဂှ်ကဵု ဥက္ကဌကွာန်အရာပ်တံတုဲမှ လ္တူဏံ မ္ဒးချိုတ်အာလဝ်တံ ၜိုတ်လဵုနွံရော ဆုဲပြံၚ်အာ ၜိုတ်လဵုနွံရော စၟဳစၟတ်ဒၟံၚ် ၝတံဏံရ၊ အကာဲအရာ ဗလးတိဂှ် ပိုယ်တံ ဟွံဒးသောၚ်ထ္ၜးအိုတ်ရ၊ ပရေၚ်ဘပဠတံဂှ် နွံတုဲ ဗီုလဵုဟီုဟီု ပ္ဍဲကဵုအကာဲအရာ ပန်ပှော်တံ နွံဒၟံၚ်ဂှ် ချိၚ်ချတုဲတှ်ေ ဒးကၠောန်ဒၟံၚ်ရ” သာ်ဝွံ သ္ဂးရ။
ဗော်ကျခိုၚ်ယျေဂှ်ဝွံ ပ္ဍဲပေါဲရုဲမာဲ ၂၀၂၀ တေံဂှ် ပ္ဍဲကဵုဒၞါဲညးစၞးကၠတ်ထဝ် တွဵုရးဍုၚ်မန် သီု (၄၅) ဒၞါဲဂှ် ၜိုန်ရလုပ်စိုပ်ပြိုၚ်ပ္ကာန်လဝ်ကီုလေဝ် မွဲဒၞါဲမှ ဟွံဂွံဇၞးလဝ်ရ။
ဆ္ဂး ဗော်ကျခိုၚ်ယျေဝွံ ကြဴနူဒပ်ပၞာန်သီအဝဵုတုဲဂှ် ဥက္ကဌဗော် ဥူအံၚ်ကျဳတုၚ်ဂှ် ရေၚ်တၠုၚ်ဒၟံၚ် နဒဒှ်ကောန်ဂကောံ ပ္ဍဲကံၚ်ဇြဳပၞာန် တွဵုရးဍုၚ်မန်ဂှ်တုဲ အလံၚ်ညးစၞးဂမၠိုၚ် ကေုာံ ကောန်ဗော်လ္ၚဵုတံလေဝ် ပ္ဍဲကဵုပွိုၚ်ဍုၚ်ကေုာံ ခရိုၚ်မဆေၚ်စပ်တံဂှ် ပါလုပ်ဒၟံၚ် နဒဒှ်ကောန်ဂကောံကီုရ။
ပရိုၚ်−သြၚ်လောန်တိုၚ်(မ်)