ရေဝ်၊ ဒဳဇြေမ်ဗာ(၂၅)
တွဵုရးဍုၚ်မန်၊ ပွိုၚ်ဍုၚ်ရေဝ်သၟဝ်ကျာ၊ ဗ္ဒပ်ကံၚ်ဇြဳပၞာန် မၞုံပ္ဍဲကွာန်ဒဒန်ဇုက် မွဲဗ္ဒပ်ဂှ် တ္ၚဲဏံ ဒဳဇြေမ်ဗာ စၟတ်တ္ၚဲ ၂၄ ပ္ဍဲအခိၚ်နူဂယး ၆ နာဍဳဂှ် လုပ်စိုပ်ပန်ဗတိုက်လဝ်ရဂှ် ညးတာလျိုၚ် ဒပ်ပရေၚ်စဵုဒၞာညးဍုၚ်ကွာန် ပွိုၚ်ဍုၚ်ရေဝ်(သၟဝ်ကျာ) ဗိုလ်ယျာန်နိုၚ် ဟီုကဵုဌာန်ပရိုၚ်သြၚ်လောန်တိုၚ်(မ်)ရ။
ဗ္ဒပ်ကံၚ်ဇြဳပၞာန် ဇြဟတ်နွံၜိုတ် (၁၅) တၠဂှ် ဂကောံပံၚ်တောဲ ဒပ်ပရေၚ်စဵုဒၞာညးဍုၚ်ကွာန် ပွိုၚ်ဍုၚ်ရေဝ် (သၟဝ်ကျာ) YPDF ကေုာံ ဒပ်ဒမၠုက်ဍုၚ်ရေဝ် YGF တအ် အာစိုပ်ပန်ပှော်လဝ် ကြပ်ပ်ရ။
ပ္ဍဲပရေၚ်ပန်ပှော်ဂှ် ၜိုန်ရလ္ပာ်ကံၚ်ဇြဳပၞာန် ဇီုကပိုက်ချိုတ်လဝ် နွံဒၟံၚ်ကီုလေဝ် ဟွံတီကေတ်လဝ်လၟိဟ် ချိုတ်တ်ပၠိုတ်တ်ဏီရဂှ် ညးဟီုသ္ဂးရ။
ပ္ဍဲပရေၚ်ပန်ဗတိုက် ဒပ်ကၚ် ကံၚ်ဇြဳပၞာန်ဂှ် ဟိုတ်နူတံဒပ်ပၞာန်တိုက် ကံၚ်ဇြဳပၞာန် မဖျေံလဝ်သ္ဇိုၚ် ပွိုၚ်ဍုၚ်ရေဝ် ဒပ်ခလရ ၅၈၈ ပန်ရီုနၚ်ကဵု လွဟ်ဇၞော်တုဲ ဒပ်ပံၚ်တောဲ PDF တအ် ဒးကဆုတ်လေၚ်လဝ်ရဂှ် ဗိုလ်ယျာန်နိုၚ် ဟီုသ္ဂးလဝ်ရ။
ပ္ဍဲပရေၚ်ဗတိုက် ဗ္ဒပ်ကၚ် ကံၚ်ဇြဳပၞာန်ဂှ် ဟိုတ်နူလွဟ်ဇၞော် ဒပ်ခရလ ၅၈၈ ကံၚ်ဇြဳပၞာန်ပန်ဗလးလဝ်ဂှ် ပြဟ်ဒတုံစှ်ေ ပ္ဍဲဘာလကျာ် ကွာန်ဒဒန်ဇုက် ခတိုဟ်အာလဝ်တုဲ ညးဗြဴမွဲတၠဒးချိုတ်အာရ။
ဇွညးဗြဴ ဇီုကပိုက်ဒးလွဟ်ဇၞော်တုဲ ဒးချိုတ်လဝ်ဂှ် ပ္ဍဲတ္ၚဲဏံဟေၚ် စံၚ်လဝ် ပ္ဍဲကဵုသုသာန်ဍုၚ်လမိုၚ်ရဂှ် ဂွံတီကေတ် နူညးဒေသဂမၠိုၚ်ရ။
တုဲကၠုၚ်ဂိတုဒဳဇြေမ်ဗာ စၟတ်တ္ၚဲ ၂၃ ဂှ်လေဝ် ပ္ဍဲသ္ကုတ်ဂၠံၚ် ရေဝ် – ဇြပ်ဗုဂှ် ရေၚ်ကွဳစက် ကံၚ်ဇြဳပၞာန် ဒးဒုၚ်ကၠတ်ဗတိုက်လဝ် ဗၞတ်ပန်ဝါ ပ္ဍဲပွိုၚ်မွဲတ္ၚဲဓဝ်ကီု ပ္ဍဲပရေၚ်ပန်ဗတိုက်ဂှ် နူလပါ်ကံၚ်ဇြဳပၞာန် ဇီုကပိုက်ချိုတ်အာလဝ် ဗွဲမဂၠိုၚ်ရဂှ် ဒပ်ဒမၠုက်ညးဍုၚ်ကွာန် ဒဵုလမ္စံက် လလောၚ်တြးလဝ်ရ။
ပရိုၚ် – သြၚ်လောန်တိုၚ်(မ်)