တဳဟဳရာန်၊ ဒဳဇြေမ်ဗာ (၂၆)
ပရေၚ်ဂရၚ်ပ္တီခၠေဝ်သှ် ညးဍုၚ်ကွာန်ထ္ၜးဆန္ဒ (၂) တၠ မဒးဒုၚ်ဖျေံလဝ်ဒဏ်ဂစိုတ်တံဂှ် ရုၚ်ဂအုပ်သၞောဝ်ဓဝ် အဳရာန် ဒုၚ်တဲဂှ် ဌာနသၞောဝ်ဓဝ်ကၟိန်ဍုၚ် ဟီုဂးလဝ်ရ။
နကဵုရုပ်ဂအုပ်သၞောဝ်ဓဝ်ဂှ် ပ္ဍဲအရာဂၠိုက်ဂၠါဲစၟဳစၟတ်ဂဗုတ်ဂှ် တၚ်ဆောတ်ယောၚ်တံ နွံဒၟံၚ်တုဲ မ္ဒးဒုၚ်လဝ်ကဵုတဲ သာ်ဏံရ။
ညးမလုပ်ဂရၚ်ပ္တီခၠေဝ်သှ်ၜါတၠဂှ်ဝွံ မဵုဟာမက် ဂူဘာဒဳလိုဝ် ကေုာံ သာမန်ဇြာၚ်ဒဳရာဇြေန်တံ မဒှ်တုဲ ညးတံၜါတၠဝွံ ပါလုပ်လဝ် ပ္ဍဲအဓိကိုရ် မက္တဵုဒှ်လဝ် ဟွံလအ်ဏံဂးတုဲ ဒးဒုၚ်စောဲစပ်လဝ်ရ။
ရုပ်ဂအုပ်သၞောဝ်ဓဝ်ဝွံ ပ္ဍဲအရာစၟဳစၟတ်ဂဗုတ်ညးတံဂှ် ပ္ဍဲကဵုအဆက်အစပ်ဂဗုတ်တံဂှ် တၚ်နွံပၟိက်တံ နွံလဝ်တုဲ သွက်ဂွံကလေၚ်စၟဳစၟတ်ဂှ် လှဲပြံၚ်လဝ်ကဵု ရုၚ်ဂအုပ်သၞောဝ်ဓဝ်ရောၚ် သ္ဂးလဝ် ပ္ဍဲပရိုၚ်တံရ။
ဂကောံဒပ်ဗၠာဲသၟိၚ် ဒ္ဂေတ်ဝတ်ပဋိပတ် မကဵုဇြဟတ်ဂရိုဟ် သွက်ဂွံဒ္ဂေတ်ဗက် သၞောဝ်ကျိုၚ်ကယျိုၚ် ဍုၚ်သမ္မတ အေဿလာမ္မေတ်ဂှ် အခိၚ်မရပ်ထိၚ်လဝ် သၟတ်ဗြဴအဳရာန် ဂကူကာဒ် အာယုက် (၂၂) သၞာံ မၞုံယၟု မာယှာအာမ်မဳနဳ မဒးဒုၚ်ရပ်ဒက်လဝ်ဂှ် ချိုတ်အာလဝ်တုဲ စနူဂိတုသေပ်တေမ်ဗာ သတ္တာဟဒုတိယ တုဲကၠုၚ်တေံတုဲ အလုံဍုၚ်အဳရာန်မွဲ က္တဵုဒှ်လဝ် ကလိုက်ကၟဵုတံရ။
ညးထ္ၜးဆန္ဒအဳရာန် (၂) တၠ အာယုက်မၞုံ (၂၃) သၞာံ မဵုသာန်ယှာကာရဳ ကေုာံ မာဂျေတ်ရဳဇြာ ရာတ်နာဗာတ် မဒးဒုၚ်စောဲစပ်လဝ် ပ္ဍဲဂိတုသေပ်တေမ်ဗာတေံ ကၟာတ်လဝ်ဂၠံၚ်ဇၞော်မွဲတၞုၚ်တုဲ ထ္ပက်လဝ်ကဵုၜုန် ကုဂကောံဒပ် ဗာဇြဳ (၃) တၠဂှ် ပ္ဍဲဂိတုဏံ ပြဟ်ဟ်တေံ ကဵုလဝ်ဇုက်ကောပ်မှက်လဝ် ပ္ဍဲဒၞါဲလ္ဒေါဝ်မၞိဟ် ပ္ဍဲကဵုဒၞါဲသိုၚ်ခၞံကရုၚ်မွဲဒၞါဲရ။
သၟိၚ်တၠအဝဵုတံဝွံ နကဵုတၚ်ရန်တၟံ သွက်ဂွံဘပဠ မၞိဟ်ပါလုပ် ပ္ဍဲကဵုဒဒှ်မလရုလစာ် ကလိုက်ကၟဵု မသ္ကဵုချဳဒရိုက်ကၠေံ အဳရာန်ဂှ်တုဲ သွက်ဂွံကဵုဒဏ်ဂစိုတ် အောန်အိုတ် မၞိဟ် (၂၁) တၠဂှ် ဂ္စါန်ဒၟံၚ်ရောၚ် ဂကောံအခေါၚ်ဗၠးနူဒုဟ်ဒဏ် ကၟိန်ဍုၚ်နာနာ ဟီုဂးလဝ်ရ။
ဂူဗာဒဳလိုဝ်ဂှ် အပ္ဍဲပရေၚ်ထ္ၜးဆန္ဒဂှ် ဂစိုတ်လဝ် ဗၠာဲသၟိၚ်အေဂျေန်မွဲတၠ ကေုာံ သ္ကဵုဗၠာဲသၟိၚ်တၞဟ်သ္အာၚ် (၅) တၠ ကလိဂွံလဝ်ဝပ်ဂးတုဲ ဒးဒုၚ်စောဲစပ်လဝ်ရ။
ရာဇြေန် မဒှ်ဂကူကာဒ် ဒယှ်ေလဝ်ဒွက် ရာပ် သွက်ပရူပရာ ကဆံၚ်ဟွံတုပ်သၟဟ်၊ ပ္ဍဵုပ္ဍိုက်တံကဵု ပရူပရာကမၠောန်ကၟိတ် ဟွံမွဲဂှ်ဝွံ ဒးဒုၚ်စောဲစပ်လဝ် နကဵုအမှု ပ္တိတ်ဇြဟတ် သွက်ဂွံဂစိုတ် ကောန်ဒပ်ပရေၚ်ဂီုကၠီုတံဂှ်ကဵု နကဵုအမှုဒယှ်ေလဝ် ဒွက်ပၠန်ဂတးတံရ။
စဵုကဵုတ္ၚဲသိုက် တုဲကၠုၚ်ဏံဂှ် မၞိဟ်ထ္ၜးဆန္ဒ (၅၀၆) တၠ ချိုတ်အာလဝ်တုဲ မၞိဟ်အဝဲဟွံစိုပ် (၆၉) တၠ ပါလုပ်ဂှ် ဂကောံအခေါၚ်အရာမၞိဟ် HRANNA ဟီုဂးလဝ်တုဲ ကောန်ဂကောံဒပ်ပရေၚ်ဂီုကၠီု (၆၆) တၠ ချိုတ်အာလဝ်တုဲ ညးထ္ၜးဆန္ဒ (၁၈၅၁၉) တၠ ဒးဒုၚ်ရပ်လဝ်ရောၚ် ဟီုဂးလဝ်ရ။
အပ္ဍဲပရေၚ်ကလိုက်ကၟဵုလရုလစာ်ဂှ် သီုကဵုပါလုပ် ကောန်ဂကောံဒပ်ပရေၚ်ဂီုကၠီုဂှ် မၞိဟ်ဗၞတ် (၂၀၀) ဒးပြဟ်လလုဲအာလဝ်ဂှ် နူကဵုဂကောံပရေၚ်ဂီုကၠီုကၟိန်ဍုၚ် ကဆံၚ်လ္တူ လလောၚ်ပ္တိတ်လဝ် ပ္ဍဲဂိတုဏံ ပြဟ်ဟ်တေံရ။
Ref: Reuters