ကဝ်ဒူလေဝ် – ဒဳဇြေမ်ဗာ (၂၇)
ပေါဲစှ်ေဘာ ကရောၚ်ပၞာန်ကဝ်ဗရာ ပ္ဍဲတိဍာ် ဒပ်မဟာ(၆) ဗော်သွးကောန်ဂကူကရေၚ်ဂှ် သ္ကိုပ်ဝန်ဇၞော် အလဵုအသဳပရေၚ်ညဳသၟဟ်ကောန်ဂကူ မာန်ဝေန်ခိုၚ်တာန် တိုန်စိုပ်လဝ်တုဲ ပ္ဍဲကဵုလွဟ် အပ်ပြာပ်ကဵု ရးဒေသပၞာန်သ္ကုတ်သၠုၚ်ကျာဂှ် အပ်ပြာပ်ကဵုလဝ် လွဟ် (၅၀)ဒကိုအ်ရ။
ပ္ဍဲဂိတုဒဳဇြေမ်ဗာ တုဲကၠုၚ် စၟတ်တ္ၚဲ (၂၅)ဂှ် ကၠောန်ဗဒှ်လဝ် ပေါဲစှ်ေဘာ ကရောၚ်ပၞာန်ကဝ်ဗရာရ။
ပရေၚ်ဓမံက်ရုပ်ရဴ တၚ်စဳမာန်အလဵုအသဳ ပွိုၚ်မွဲသၞာံကီု၊ ပရေၚ်ပံၚ်တောဲရေၚ်တၠုၚ် ကရောံမဟာမိတ်ကောန်ဍုၚ်အရၚ် ညဳညဳသာသာကီု၊ ပရေၚ်ဗလးဆက်စၠောံ ကလုတ်တမာန် ကေုာံကၟိန်ဍုၚ်နာနာ မပါလုပ်သီုကုလသမဂ္ဂ ခိုဟ်ဟ်မာန်ကီု၊ ဒပ်စဵုဒၞာညးဍုၚ်ကွာန်အလုံမွဲဍုၚ် ပံၚ်တောဲကဵု ဂကောံမဟာမိတ်ကောန်ဍုၚ်အရၚ်တအ်တုဲ ပရေၚ်ရေၚ်တၠုၚ်ချဳဒရာၚ်ပၞာန် ကေတ်စေဝ်လတူမာန်ကီု တအ်ဂှ် သ္ကိုပ်ဝန်ဇၞော် မာန်ဝေန်ခိုၚ်တာန် ဟီုသ္ဂးလဝ် ပ္ဍဲပေါဲစှ်ေဘာဂှ်ရ။
သ္အာၚ်နူဂှ်ပၠန် သ္ကိုပ်ဝန်ဇၞော်ကေုာံ ဒဝ်ဖျူဖျူတေန် နူကဵုညးစၞးဗော်ဒုၚ်ကာ ကၠတ်ထဝ်ကၟိန်ဍုၚ်တအ်ဂှ် အပ်ပြာပ်ကဵုလဝ် သ္ဂံၚ်စှ်ေဘာကရောၚ်ပၞာန်ကဝ်ဗရာ သြန်ပတိုန်စရာဲ (၁၀) ကိုတ်ဏီရ။
ကရောၚ်ပၞာန်ကဝ်ဗရာဂှ် ဒှ်ဒပ်ပံၚ်ကောံ KNLA-PDF သၟဝ်တဲ ဒပ်ပၞာန်ဗၠးၜး ကောန်ဂကူကရေၚ် KNLA တုဲ ဒှ်ဒပ် က္တဵုဒှ်ဒၟံၚ်ပေါဲဗတိုက်ကဵု ဒပ်ကံၚ်ဇြဳပၞာန် ပ္ဍဲမွဲဒမြိပ်ဂၠံၚ်ကွဳစက် ဗြဝတဳ-ဝဝ်လေဝ် မွဲခနမွဲခနရ။
ပေါဲစှ်ေဘာဏံဂှ် သ္ကိုပ်ဝန်ဇၞော် မာန်ဝေန်ခိုၚ်တာန်၊ ဒုတိယဝန်ဇၞော် ဒဝ်အိသဉ္ဇာမောၚ် ဌာနဝန်ဇၞော်ပရေၚ်ညးဗြဴ သၟတ် ကေုာံကောန်ၚာ် ၊ ဒဝ်ဖျူဖျူတေန် နူဗော်ဒုၚ်ကာ ကၠတ်ထဝ်ကၟိန်ဍုၚ် (CRPH)၊ သ္ကိုပ်ဗိုလ်ဇၞော် သဝ်ဖဳနေတ် ကေုာံဗိုလ်သဝ်ယှာ နူဒေသရးပၞာန် သ္ကုတ်သၠုၚ်ကျာတအ် တိုန်စိုပ်လဝ်ရဂှ် ဂွံတီကေတ်လဝ်ရ။
ပရိုၚ်-သြၚ်လောန်တိုၚ်(မ်)