ၜၚ်ကံက်၊ ဒဳဇြေမ်ဗာ (၂၆)
ပ္ဍဲဍုၚ်ဨကရာဇ်သေံ ပ္ဍဲပေါဲရုဲမာဲ မကၠောန်ဗဒှ်အာ ကၠာဂွိုအ်စိုပ်ဂိတုမေ သၞာံကၠုၚ်စိုပ်ဏံဂှ် နကဵုသ္ကိုပ်ဝန်ဇၞော်သေံ ပရာယုတ်ချာန်အဵုချာ သွက်အာယုက်ဂတတေံ ညံၚ်သ္ဂောံကလိဂွံအဝဵုမာန် ဂၠါဲဒၟံၚ်ဂၠံၚ်ဍာန်ရောၚ် မဳဒဳယျာအပ္ဍဲဒေသတံ ဟီုဂးလဝ်ရ။
ပ္ဍဲပေါဲရုဲမာဲ သၞာံ ၂၀၁၉ တုဲကၠုၚ်တေံ ပရာယုတ် မကေတ်လဝ်ကဆံၚ်ဒၞါဲသ္ကိုပ်ဝန်ဇၞော်ဂှ်ဝွံ စသီလဝ်အဝဵု နူကဵုသၞာံ ၂၀၁၄ တေံရ။
ဗော်ကောန်ဂကူသေံညဳသၟဟ် (United Thai Nation Party) မဒက်ပ္တန်လဝ်တၟိဂှ် ထံက်ဂလာန်အာညး သွက်ဂွံထပ်ဒှ် သ္ကိုပ်ဝန်ဇၞော်ပၠန်ဏောၚ် မဒှ်တုဲ သွက်ဂွံလုပ်ပြိုၚ်ပ္ကာန် ပ္ဍဲဒၞါဲဂှ်ဂှ် သ္ဂုတ်သွာတ်လဝ်ရောၚ် ဟီုဂလးဝ်ကဵု မဳဒဳယျာတံ ပ္ဍဲကဵုမ္ၚးသ္ၚိကၠတ်အလဵုအသဳရ။
ဗော်ဂွံအဝဵုလၟုဟ် ဗော်ဖလာန်ဖရာတ်ချာရာတ် (PPRP) ဂှ် ပ္ဍဲအခိၚ်ပြဟ်ဟ်တေံ လညာတ်ချိၚ်ခယျ လ္တူပရာယုတ် မနုက်တိတ်မာန် ကြဴနူမံက်တိတ်ကၠုၚ် သၠဲသၠဲလးလးတုဲဂှ် ပရာဝတ် ဝန်သူနက် သီုကဵုမဒှ်က္ဍိုပ်သ္ကိုပ်ဗော် သီုကဵုကေတ်လဝ်တာလျိုၚ် ဒုသ္ကိုပ်ဝန်ဇၞော်ဂှ်ဝွံ ကၠုၚ်စိုပ်ပေါဲရုဲမာဲဂတဏံ ဒှ်ကၠုၚ်ညးစၞး မလုပ်ပြိုၚ်ပ္ကာန် ဒၞါဲသ္ကိုပ်ဝန်ဇၞော်မာန်ရောၚ် အရာမခယျဒၟံၚ်တံ နွံဒၟံၚ်ရ။
ပရာယုတ် ကေုာံ ပရာဝတ်တံဝွံ ပ္ဍဲကဵုကဏ္ဍဒပ်ပၞာန် ကေုာံ ကဏ္ဍပရေၚ်ဍုၚ်ကွာန် ဍုၚ်သေံဂှ် ဒှ်ညးမဒက်ပ္တန်လဝ် ပရေၚ်ဆက်ဆောံကောဒေံမာန်ရောၚ် ဂွံတီကေတ်ရ။
ဒဵုကဵုတ္ၚဲဏံလေဝ် ပ္ဍဲကဵုဂၠံၚ်တရဴ ပရေၚ်ဍုၚ်ကွာန် ညးတံမၞိဟ်ၜါဂှ် ပရေၚ်ပါ်ထ္ကးတံ ဟွံမွဲတုဲ ပရေၚ်ဆက်ဆောံ ဇြဟတ်ခိုဟ် ခိုၚ်ကၠိုက် နွံဒၟံၚ်ဂှ် ပရာယုတ် သ္ဂးလဝ်ရ။
တ္ၚဲကၠောန်ဗဒှ်ပေါဲရုဲမာဲ ဍုၚ်သေံဂှ် ဒဵုကဵုအခိၚ်လၟုဟ် ရုဲစှ်လဝ်ဟွံမွဲဏီဂှ် ဂွံတီကေတ်တုဲ ပါလဳမာန် (ကၠတ်ထဝ်) ဂှ်လေဝ် ကၠုၚ်စိုပ်ဂိတုမာတ်ဏံ အာယုက်အိုတ်ရောၚ်ဂှ် ဂွံတီကေတ်ရ။
အာယုက်သ္ကိုပ်ဝန်ဇၞော် ပရာယုတ် ဂွံအဝဵု (၈) သၞာံဂှ်ဝွံ ကၠုၚ်စိုပ်သၞာံ ၂၀၂၅ ဏံ အိုတ်ဏောၚ်ဂှ် ရုၚ်သၞောဝ်ဓဝ် သၞောဝ်သ္ဇိုၚ်ဍုၚ်သေံ စၟတ်လဝ်ရ။
Ref: CNA