မျာၚ် – ဒဳဇြေမ်ဗာ (၂၇)
ဟိုတ်နူ ဂကောံဒပ်စဵုဒၞာညးဍုၚ်ကွာန် ပန်ဗတိုက်လဝ် ဒပ်ကံၚ်ဇြဳ ထ္ပက်မံၚ်ကရောၚ်ပၞာန် ပ္ဍဲရးမဂွေ ပွိုၚ်ဍုၚ်မျာၚ် နကဵုဒရုမ်တုဲ ဒးချိုတ်အာလဝ် ပန်တၠတုဲ (၇) တၠ က္လိဂွံလဝ် ဘဲဝပ်ရဂှ် ဗိုလ်လေတ်ကျာ နူတံဒပ် (၁) ပ.က.ဖ မျာၚ် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
ဗတိုက်လဝ် ကောန်ဒပ်ကံၚ်ဇြဳ ထ္ပက်ကၠုၚ်ကရောၚ်ပၞာန် ကရပ်ကွာန်ဖံၚ်ကွေဝ် ပ္ဍဲဂိတုဒဳဇြေမ်ဗာ တုဲကၠုၚ် ပ္ဍဲစၟတ်တ္ၚဲ (၂၄) ဂှ် နကဵုဒရုမ် သုၚ်စောဲလဝ် အဳနာဂါရ။
ပန်ဗတိုက်လဝ် ကရောၚ်ပၞာန်ပံၚ်တောဲ ကံၚ်ဇြဳကဵု ပျူသဝ်ထဳ ပ္ဍဲလပါ်ဗၟံက်ကွာန်ဖံၚ်ကွေဝ် နကဵုဒရုမ်ရ။ ကော်ဒတောဲဏာဒၟံၚ် ညးဂွံလဝ်ဘဲဝပ် တၞဟ်သ္အာၚ်တအ်ဂှ်လေဝ် ဂွံဆဵုကေတ်လဝ်ရဂှ် ဗိုလ်လေတ်ကျာ ဟီုသ္ဂးလဝ်ရ။
ကရောၚ်ပၞာန် ကံၚ်ဇြဳကဵု ပျူသဝ်ထဳ ဇြဟတ်ပါလုပ်ၜိုတ် (၁၀၀)ပြၚ်ၚ်ဂှ် သုၚ်စောဲလဝ် မဗုမ် (၂၂) မတုဲ ပန်ဗတိုက်လဝ် နကဵုဒရုမ်ရဂှ် ညးဟီုလဝ်ဏီရ။
ပရေၚ်ပန်ပှော်ဏံဂှ် ဂကောံသူရိန်ပခုက္ကူ ကေုာံ ပကဖ မျာၚ် တံဒပ်(၁)တအ် ပံၚ်တောဲဗတိုက်လဝ်တုဲ သွက်ဂွံကလေၚ်ထပ်ဗတိုက် ကရောၚ်ပၞာန်ဂှ်ပၠန် ပလေဝ်ပလေတ်ဒၟံၚ်ရဂှ် ဂွံတီကေတ်ရ။
ဂိတုဒဳဇြေမ်ဗာ ပ္ဍဲစၟတ်တ္ၚဲ(၂၃)ဂှ်လေဝ် ဂကောံပခုက္ကူသူရိန်၊ MRTF ကေုာံ ပကဖ မျာၚ် တံဒပ်(၁)တအ် ပံၚ်တောဲတုဲ ဗတိုက်လဝ် ကံၚ်ဇြဳပၞာန် နကဵုဒရုမ် ကေုာံထောံဖျေံလဝ် အဳနာဂါတုဲ ဗတိုက်လဝ်ဂှ်ရ ဒးချိုတ်အာလဝ်မွဲတၠတုဲ ပန်တၠ က္လိဂွံလဝ်ဝပ်ရဂှ် ဂွံတီကေတ်ရ။
ပ္ဍဲရးမဂွေဂှ် ဟိုတ်နူကံၚ်ဇြဳပၞာန် ထ္ပက်ကၠုၚ်ဒၟံၚ်ကရောၚ်ပၞာန် အရိုဟ်ဒဒှ်တ္ၚဲတုဲ က္တဵုဒှ်ဒၟံၚ်ပေါဲဗတိုက် ဇီုကပိုက်ဒၟံၚ်ကဵု ဒပ်ပရေၚ်စဵုဒၞာဒေသတအ်တုဲ ဒးဂိဒၟံၚ် ပ္ဍဲကဵုပေါဲဗတိုက်တအ်ဂှ်ရ။
ပရိုၚ် – သြၚ်လောန်တိုၚ်(မ်)
ဗီုဓာတ် -(ပ.က.ဖ) မျာင်