အလဵုအသဳသေံ ကော်ဘိက်ကံၚ်ဇြဳပၞာန်တုဲ ကၠောန်ဗဒှ်လဝ် ပေါဲသဳကၠဳပရေၚ်ကၟိန်ဍုၚ်ဗၟာ ဗွဲသဘဴပလး ပ္ဍဲဂိတုဒဳဇြေမ်ဗာ တုဲကၠုၚ် ပ္ဍဲစၟတ်တ္ၚဲ ၂၂ ဂှ်ရ။ ပ္ဍဲကဵုဍုၚ်ပါလုပ် ဂကောံအာဇြဳယာန်တအ်ဂှ် ညးစၞးကၟိန်ဍုၚ်သေံလဴ၊ ကမ္ဘောဒဳယာ ဗဳယာတ်နာမ်ဂမၠိုၚ်ကီု နူလပါ်ကံၚ်ဇြဳပၞာန် ဂကောံညးစၞး ဝန်ဇၞော်ကၟိန်ဍုၚ် ဥူဝဏ္ဏမောၚ်လွေန် ဌာနဝန်ဇၞော်ပရေၚ်ဍုၚ်သ္အာၚ် က္ဍိုက်က္ဍိုပ်လဝ်က္ဍိုပ်ကီု တိုန်စိုပ်လဝ်ရ။
ဆဂးဂှ်လေဝ် ညးစၞးကၟိန်ဍုၚ်အေန်ဒေါနဳယှာ၊ မလေယှာ၊ သေၚ်္ကာပေါဝ် ဖိလေတ်ပိုၚ် မဒှ်ကၟိန်ဍုၚ် လုပ်ဂကောံအာဇြဳယာန် ဒှ်အဓိကတအ်ဂှ် တိုန်စိုပ်လဝ် ဟၟဲရ။ ပ္ဍဲလတူအလဵုအသဳသေံ ကော်ဘိက်ကၠုၚ် ကံၚ်ဇြဳပၞာန်ဂှ် နကဵု NUG သာ်လဵု ကလေၚ်ပလန်အာတဲရော။ ပရေၚ်သဳကၠဳ ဗွဲပလးဏံဂှ် ဒှ်တမ်လၟေၚ်ဂၠံၚ်တရဴ သွက်ဂွံပသောၚ်ကလး ပရေၚ်ကြေပ်ဂြတ် ကၟိန်ဍုၚ်ဗၟာမာန်ဟာ။ တၠုၚ်လအာ သာ်လဵု ဆက်နွံကၠုၚ်မာန်ရော။ စပ်ကဵုအကာဲအရာဂမၠိုၚ်ဏံတုဲ ဆက်စၠောံသၟာန်သွဟ်လဝ်ကဵု ဥူနေဘုမ်လေတ် ညးမၞုံအခေါၚ်ဟီုဂး ရုၚ်သ္ကိုပ်ဝန်ဇၞော် အလဵုအသဳပရေၚ်ညဳသၟဟ်ကောန်ဂကူ NUG ရ။
-ကိုပ်ကၠာအိုတ်ဏံ ပ္ဍဲလတူပေါဲသဳကၠဳ ပရေၚ်ကၟိန်ဍုၚ်ဗၟာ ဗွဲပလး အလဵုအသဳသေံ က္ဍိုက်လဝ်က္ဍိုပ်ဂှ် ဗီုလဵုညာတ်ကေတ်ရော။
မိက်ဂွံဟီုကၠာအိုတ်မွဲဂှ် ပရေၚ်ဆဵုဂဗဏံဂှ် ဟွံသ္ပစၞးကဵု အာဇြဳယာန်ရ။ တုဲပၠန်တှ်ေ ပရေၚ်လုပ်သၞောဝ်လေဝ် ဟၟဲရ။ မိက်ဂွံဟီု ဗီုဏံရ။ တုဲပၠန်တှ်ေ အတိုၚ်ဗီုဓာတ် ပိုဲညာတ်ကေတ် ပ္ဍဲလတူအောန်လာၚ်ဂှ်တှ်ေ နွံကဆံၚ် ၜိုတ်ကော်ဆဵုဂဗ ပ္ဍဲဆေၚ်စသုၚ် မွဲဆေၚ်ဓဝ်ရ။
-ပရေၚ်ဆဵုဂဗ ဗွဲပလးဏံဂှ် ဒှ်တမ်ဂၠံၚ်တရဴ သွက်ဂွံသောၚ်ကလး ပရေၚ်ကြေပ်ဂြတ် ကၟိန်ဍုၚ်ဗၟာမာန်ဟာ၊ တၠုၚ်လအာဍေံ ဗီုလဵု နွံကၠုၚ်မာန်ရော။
ယဝ်ရံၚ်ကဵု တၚ်တုပ်စိုတ်အာဇြဳယာန်ဒ္တန် (၅) တၚ် ဏောၚ်တှ်ေ ကိစ္စညံၚ်ပရေၚ်ပ္ကီုပရာပ် ဂွံတန်ဒေါံအာ ဇျှက်ဇျှၚ်ဂှ် ပါလုပ်ဏောၚ်။ ဟီုတှ်ေ ကံၚ်ဇြဳပၞာန်ဂှ် ဒ္ဂေတ်ဗက် ကိစ္စဏံဟာ။ ဟွံဒ္ဂေတ်ဗက်ဟာ ဟီုဂှ် နကဵုအရေဝ် မၞိဟ်ပိပၠန်တၠဏံဓဝ် ပိုဲသ္ဂုတ်သွာတ် ဟွံဂွံရ။ ဇေတ်ဇေတ်တေံဂှ် ပ္ဍဲကၟိန်ဍုၚ်ဗၟာ အရိုဟ်ရိုဟ်တ္ၚဲ ဒပ်ကံၚ်ဇြဳပၞာန်ပ္ကီုပရာပ်တအ်ဂှ် ပရေၚ်ပြိုက်ဂစိုတ်ဒၟံၚ် ညးအရာပ် ကောန်ညးဍုၚ်ကွာန်လေဝ်ဟွံသှ်ေ၊ ပရေၚ်စံၚ်ပလီုဒၟံၚ် စမြိုၚ် သ္ၚိဒၟံၚ်ညးဍုၚ်ကွာန်တအ်ဂှ် ဒှ်ကိစ္စကမၠောန် ကၠောန်သ္ပဒၟံၚ် အရိုဟ်ဟ်တ္ၚဲရ။
ဟီုတှ်ေ တၚ်ဏံလေဝ် ဟွံဒ္ဂေတ်ဗက်ပုဟ်။ တုဲပၠန် မွဲကရောံကဵု ဒဝ်အံၚ်သာန်သုကျဳ သမ္မတဥူဝေန်မျေတ် မဒှ်က္ဍိုပ်သ္ကိုပ်ကၟိန်ဍုၚ်တအ်မွဲကရောံ ကောန်ထံၚ်ပရေၚ်ဍုၚ်ကွာန် ပါဲစွံလဝ် နူပရေၚ်ပါလုပ်ဆေၚ်ဆက်ဒၟံၚ် ပ္ဍဲကဵုပရေၚ်ကွာန်ကၟိန်ဍုၚ်ဗၟာ ဟွံဂွံတအ်ဂှ်လေဝ် ဒဵုအခိၚ်လၟုဟ် ဟွံဂွံဗလးကဵုလဝ်ဏီရ။ ကဵုအခေါၚ်ကဵု Envoy အာဇြဳယာန်ဏောၚ် ဟီုဂှ်လေဝ် ကၠောန်ရေၚ်တၠုၚ်လဝ် ပရေၚ်ပြံၚ်သၠာဲစိုပ်တရဴ မုဟၟဲပုဟ်။ ဟီုတှ်ေ တၚ်ရေၚ်တၠုၚ် ဓမံက်ဒၟံၚ်ရုပ်ရဴ တၚ်တုပ်စိုတ်အာဇြဳယာန်ဒ္တန် (၅)တၚ် ဟီုဒၟံၚ်ဂှ် ဒှ်တၚ်ဂၞၚ်ဍာံဍာံဇေတ်တ် ဟွံသေၚ်ပုဟ်ဂှ် မိက်ဂွံဟီုရ။
-အလန်လကြဴအိုတ်ဏဴ ပ္ဍဲလတူအကာဲအရာ ဓမံက်ရုပ်ရဴ တၚ်တုပ်စိုတ်အာဇြဳယာန်ဒ္တန် (၅)တၚ်ဏံ ဟွံမာန်ဏီဂှ် စပ်ကဵု ပရေၚ်ဆဵုဂဗသဳကၠဳ ဗွဲပလးဏံတုဲ ဗီုလဵုမိက်ဂွံကဵု တၚ်သမ္တီရော။
နကဵုအာဇြဳယာန်လေဝ် ပ္ဍဲ SUMMIT တုဲကၠုၚ်ဂှ် စပ်ကဵုမူ ၅ တၚ်ဏံတုဲ ပရေၚ်ကၠောန်ရေၚ်တၠုၚ် သွက်ဂွံဓမံက်ရုပ်ရဴ နဒဒှ် ACTION PLAN ချိုတ်တ်ပၠိုတ်တ် နွံမံၚ်တုဲ ညံၚ်ကုလသမဂ္ဂကဵု ဂကောံမိတ်ပွံၚ်တအ် ဂွံပါလုပ် ပ္ဍဲကိစ္စဏံဂှ်လေဝ် ဟီုဂးကၠုၚ်လဝ် နွံရ။ နဒဒှ်ဖိုလ်အဆက်ဍေံဂှ် လၟုဟ်တှ်ေ ပ္ဍဲကံၚ်ဇြဳပရေၚ်ဂီုကၠီု ကုလသမဂ္ဂလေဝ် စပ်ကဵုပရေၚ်ကၟိန်ဍုၚ်ဗၟာတုဲ Resolution စှ်ေအာယျလေဝ်ဏး။
အတိုၚ်လၟေၚ်ဂၠံၚ်တရဴဏံဟေၚ်ရ ပိုဲဒးကၠောန်ရေၚ်တၠုၚ်အာဏောၚ်။ ပရေၚ်ဆဵုဂဗ ဗွဲပလး ဟွံလုပ်ကဵုသၞောဝ် ဗီုပြၚ်လၟုဟ်ဏံဂှ် ညံၚ်ကိစ္စပရေၚ်ကၟိန်ဍုၚ်ဗၟာ ဂွံပြေပြံၚ်ဂှ် သွဟ်ဗီုလဵုလေဝ် တိတ်ကၠုၚ်ဟွံသေၚ်ပုဟ်ဂှ် မိက်ဂွံဟီုရ။