ထိုၚ်ဝါန်၊ ဒဳဇြေမ်ဗာ (၂၈)
ဒၟါနူပရေၚ်ဘပဠ ဂၠါဲသၞကြုက်တုဲ ပ္ဍဲထိုၚ်ဝါန် အခိၚ်ဒးယိုက်ဂၠေၚ်တာလျိုၚ်ပၞာန် နူ(၄) ဂိတု ဒဒှ်ရသၠုၚ်ပ္တိုန်ထောံ စဵုကဵုမွဲသၞာံဂှ် လလောၚ်တြးလဝ်ရ။
ထိုၚ်ဝါန် ဒဳမဝ်ကရေတ်တေတ် ဂွံအခေါၚ်အုပ်ဓုပ်အပိုၚ်ဂှ်ဝွံ စၟတ်သမ္တီလဝ် နဒဒှ်တိဍာ်ဒေသတွဵုဒၞက်လစှ်ေ ဗေကျေန်တုဲ မၞုံဒၟံၚ် ပ္ဍဲအကြာအန္တရာယ် နွံပၟိက်မ္ဂး သ္ပအနိၚ်အထက် သီကေတ်နကဵုဇြဟတ်တံ မဒှ်ရ။
ပ္ဍဲလက်ထက်သမ္မတကြုက် ယှဳကျေန်ဖျေန်ဂှ် ပွမဓဇန်ကြမ်ကြကြုက်တံဝွံ အပ္ဍဲသၞာံဟွံလအ်တံဏံ သာသ္ကာတ်မြဟ်ကၠုၚ်တုဲ ညံၚ်ရဴရုယှာ လုပ်စိုပ်ၜက်ၜေတ်လဝ် ယူကရုၚ်ဂှ်ကီု ပရေၚ်ဒှ်ဓဝိၚ် လအာတုပ် ဗေကျေန်သီကေတ် တ္ကအ်ထိုၚ်ဝါန်မာန်တံလေဝ် နွံဒၟံၚ်ရ။
ပရေၚ်ဘပဠကြုက် လ္တူထိုၚ်ဝါန် ဒဒှ်ရသာပြာကတ်ကၠုၚ်ဂှ် သမ္မတထိုၚ်ဝါန် ဟီုဂးလဝ် ပ္ဍဲပေါဲသောၚ်ကလးလိက်ပရိုၚ်ရ။
“ညးလဵုမွဲမှ ဟွံမိက်ဗ္တိုက်ပၞာန်ကီုလေဝ် ပရေၚ်ၜိုဟ်လလမ် သွက်ကောန်ရးညးဍုၚ်ကွာန်အဲဂှ် ဟွံစှ်ေကၠုၚ် နူအကးပုဟ်” သာ်ဝွံ ညးဟီုဂးလဝ်ရ။
“ဒဒှ်မဒးယိုက်ဂၠေၚ်တာလျိုၚ်ပၞာန် လလအ်ပွိုၚ်ပန်ဂိတုလၟုဟ်ဂှ်ဝွံ သွက်ဂွံဖ္ဍိုက်ဗပေၚ်ကဵု အကာဲအရာမြက်ဇက်တုဲ မပြံၚ်သၠာဲဒၟံၚ်လၟိုန်တံဂှ် ဟွံရုမ်ဂပ်ပုဟ်။ စနူကဵုသၞာံ ၂၀၂၄ တုဲ သွက်ဂွံယိုက်ဂၠေၚ်ပၞာန် ပွိုၚ်မွဲသၞာံဂှ် ပိုယ်တံ သ္ဂုတ်သွာတ်လဝ်ရ” သာ်ဝွံ ညးထပ်ဟီုဂးလဝ်ရ။
အလဵုအသဳထိုၚ်ဝါန်တုဲကၠုၚ်တေံဂှ် စွံအဓိကကဵု ဇြဟတ်ညးယိုက်ဂၠေၚ်ပၞာန်နကဵုစေတနာတံတုဲ နကဵုတၚ်ရန်တၟံ သွက်ဂွံဖန်ဗဒှ်ဇြဟတ်ဂှ် အခိၚ်ဒးယိုက်ဂၠေၚ်ပၞာန် ဟွံဒေါအ်ဟွံဂွံဂှ် နူမွဲသၞာံ ဖအောန်ဖျေံလဝ် စဵုကဵုပန်ဂိတုရ။
ဆ္ဂး ပ္ဍဲကဵုလိက်ကံက်ကပှ်လဝ်တၚ်နၚ် ခြာဟွံလအ်မွဲဂှ် သတီုလၟိဟ်မၞိဟ်ထိုၚ်ဝါန် ပန်ဂအုံပိဂအုံပြၚ်ဂှ်ဝွံ အခိၚ်အာယုက်ဒးယိုက်ဂၠေၚ်ပၞာန် (၄) ဂိတုဂှ် အောန်တဴဗွဲမလောန်ရောၚ် ဟီုဂးပါ်ပရအ်ဒၟံၚ် လညာတ်တံ နွံရ။
ဒၟါနူသြန်အောန်တုဲ ဒပ်ပၞာန်ထိုၚ်ဝါန်ဝွံ သွက်ဂွံထိၚ်ဒက် ပရေၚ်ယိုက်ဂၠေၚ်တာလျိုၚ် အခိၚ်ပေၚ်ၚ်မာန်ဂှ် ဒးရုန်ဂ္စါန်ဒၟံၚ်ရောၚ် သ္ဂးရ။
“သွက်တၞောဝ်အနာဂတ်ဂမၠိုၚ် ဗီုပြၚ်ဘဝမံၚ်တန်တဴ မစှ်ေကဵုသၞောတ်ဒဳမဝ်ကရေဇြဳ ဂွံချိုတ်ပၠိုတ်ဂှ် ဒှ်တၚ်သ္ဂုတ်သွာတ် ဝါတ်ဂါတ်လောန်မွဲရ” သာ်ဝွံ စပ်ကဵုပရေၚ်သၠုၚ်ပ္တိုန်အာယုက်ဂှ်တုဲ သမ္မတသာၚ် ဟီုဂးလဝ်ရ။
Ref: CNA