မတ်မလီု၊ ဒဳဇြေမ်ဗာ(၃၀)
သ္ကိုပ်ဝန်ဇၞော် တွဵုရးဍုၚ်မန် ဒံက်တာဨဇြာန် ဒးဒုၚ်ဖျေံလဝ် ဒဏ်ထံၚ်ပွိုၚ် ၂၇ သၞာံဂှ် နူကဵုထံၚ်စာတ်ဗဟဵုကျာ်မြဟ်ဂှ် ကံၚ်ဇြဳပၞာန် ပြံၚ်စၠောံဏာ ထံၚ်စာတ်ဒိုက်ဥူ၊ ရးဒေသဗဂေါရဂှ် ဂွံတီကေတ် နူတွဳဗွိုၚ် ညးစုက်လုက်ကဵု ရုၚ်သၞောဝ်တအ်ရ။
ကံၚ်ဇြဳပၞာန်ဂှ် သွက်ဂဗုတ်စောဲလဝ် လတူဒံက်တာဨဇြာန် သီုဖအိုတ်ဂှ် ဖျေံကၠုၚ်ဒုဟ်ဒဏ်ထံၚ်စုၚ်ဇဳတုဲဂှ် ပ္ဍဲဂိတုဒဳဇြေမ်ဗာ သတ္တာဟလကြဴအိုတ်ဏံ ပြံၚ်စၠောံဏာ ထံၚ်စာတ်ဒိုက်ဥူရ။
သ္ကိုပ်ဝန်ဇၞော် ဒံက်တာဨဇြာန်ဂှ် ကြဴနူဒပ်ပၞာန်သီအဝဵုတုဲ ဒးဒုၚ်ရပ်စုတ်လဝ်ထံက်စာတ် ဗ္ဒာဲကရပ် ပွိုၚ် ၂ သၞာံ ပ္ဍဲထံၚ်ဗဟဵုကျာ်မြဟ်တုဲဂှ် ဒးဒၚ်ပြံၚ်စၠောံဏာ ထံၚ်စာတ်ဒိုက်ဥူရ။
ထံၚ်ဒိုက်ဥူ ရးဒေသဗဂေါဂှ် ဒှ်ထံၚ် လၟိဟ်မၞိဟ် ၁၀၀၀ တၠလုပ် မွဲထံၚ်ကီု သီုဒှ်ထံၚ် သုၚ်စောဲနဲကဲနာနာတုဲ ပျဲပျာံဒၟံၚ် ကောန်ထံၚ်တအ် မွဲထံက်ကီုရ။
သ္ကိုပ်ဝန်ဇၞော် တွဵုရးဍုၚ်မန် ဒံက်တာဨဇြာန် ဂွံအာယုက် ၆၈ သၞာံဂှ် ကြဴနူဒပ်ပၞာန်သီအဝဵုတုဲ ကံၚ်ဇြဳပၞာန် ဖျေံကၠုၚ်လဝ် သွက်ဂဗုတ်အဂတိ ၉ ဂဗုတ် ဒဏ်ထံၚ် ၂၁ သၞာံ၊ နကဵု ၅၀၅(ခ)ဂှ် ဒဏ်ထံၚ် ၂ သၞာံ၊ နကဵုၝောံပိုဒ် ၁၃၀(က)ဂှ် ဒဏ်ထံၚ် ၂ သၞာံ၊ သွက်ဂဗုတ် ၁၇၁ (စ) ၂ ဂဗုတ်ဂှ် ဒဏ်ထံၚ် ၂ သၞာံ၊ အပံၚ်ဒဏ်ထံၚ် ပွိုၚ် ၂၇ သၞာံရ။
ပရိုၚ် – သြၚ်လောန်တိုၚ်(မ်)