လံၚ်လုၚ်၊ ဒဳဇြေမ်ဗာ(၃၀)
ရးဒေသဇၞော်တၞၚ်သဳ၊ ပွိုၚ်ဍုၚ်လံၚ်လုၚ်၊ ပ္ဍဲကွာန်ဝေဒဳ ပ္ဍဲဂိတုဒဳဇြေမ်ဗာ စၟတ်တ္ၚဲ ၂၉ ပ္ဍဲပေါဲမ္ၚဵုထပ်တဲ ကၠောန်ဗဒှ်လဝ် အခိၚ်နူဂယး မွဲပေါဲဂှ် ဟိုတ်နူ ဗုမ်ခတိုဟ်လဝ်တုဲ သီုကောန်ၚာ်သၟတ်မွဲတၠ ပါလုပ် မၞိဟ် ၇ တၠက္လိဂွံလဝ်ဘဲဝပ်ရဂှ် ညးဒေသဂမၠိုၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
တ္ၚဲဏံ ပ္ဍဲအခိၚ်နူဂယး ၈ နာဍဳဂှ် ပ္ဍဲကွာန်ဝေဒဳ သ္ကုတ်လဒေါဝ်ကွာန် ပ္ဍဲသ္ၚိဥူတေန်တုၚ်ကဵု ဒဝ်ဨချေတ် ဃောကၠောန်ဗဒှ်ဒၟံၚ် ပေါဲမ္ၚဵုထပ်တဲဂှ် ဂဗုတ်ဗုမ်ခတိုဟ် က္တဵုဒှ်လဝ်ရ။
မဗုမ်ဂှ် ခတိုတ်တိတ်ကၠုၚ် နူကဵုဒၞာဲစွံလဝ်သံၚ်ဗံက် ကၞာထးဂှ်ရ။ အတိုၚ်ညးဒေသတအ် ဟီုဂးလဝ်မ္ဂး ပ္ဍဲကွာန်ဝေဒဳ ယဝ်ကၠောန် ပေါဲမ္ၚဵုထပ်တဲမ္ဂး သွက်မွဲပေါဲ ဒးကဵုသြန် ၂ ကိုတ်ဒကေဝ် ဂကောံပျူသဝ်ထဳ ဟီုဂးလဝ်တုဲ ပေါဲမ္ၚဵုထပ်တဲဏံ ဟိုတ်နူဟွံကဵုတုဲ ဖံက်ခတိုဟ်လဝ် ဒှ်မာန်ရဂှ် ဟီုသ္ဂးလဝ်ရ။
ဂကောံစဵုဒၞာညးဍုၚ်ကွာန် (ပ.က.ဖ) ပွိုၚ်ဍုၚ်လံၚ်လုၚ်ဂှ်လေဝ် ပရေၚ်ပေါဲမ္ၚဵုထပ်တဲ ဗုမ်ခတိုဟ်လဝ်ဂှ် ဒဒှ်ရဟွံဆေၚ်ဆက်ကဵု ညးတအ်ကီု ပ္ဍဲလတူပရေၚ်ပရော က္တဵုဒှ်လဝ်ဂှ်လေဝ် ဒဒှ်ရပျုတ်ဗ္ဒေက်ဖျဝ်ကီုဂှ် လလောၚ်တြးလဝ်ရ။
သ္အာၚ်နူဂှ်ပၠန် ပ္ဍဲရေၚ်ပၠန်ဂတးဂှ် ဟိုတ်နူသွာၚ်နာနာ လီုလာ်ယောၚ်ယာကၠုၚ် သီုကဵုဇြဟတ်ဓရိုဟ် ကၟိန်ဍုၚ်နာနာမပါလုပ်ဂှ်တုဲ နကဵုညးဍုၚ်ကွာန်ဂမၠိုၚ် ညံၚ်ဂွံထေၚ်ဗၠေတ် ကၠောန်သ္ပကၠုၚ်ပရေၚ်ဂြိုဟ်ပလီုဂှ်ရ သွက်ဂွံဝေၚ်ပါဲ ပေါဲသၠးကဵုဒါန်၊ ပေါဲမ္ၚဵု၊ ပေါဲမိပ်မြဟ် ကေုာံ ဒၞာဲမၞိဟ်ကောံတအ်ဂှ် ကံၚ်ဇြဳပၞာန် ဟီုဗတိုက်ဖ္အောဝ်လဝ်ရ။
မၞိဟ်က္လိဂွံလဝ်ဘဲဝပ် ဟိုတ်နူပရေၚ်ဗုမ်ခတိုဟ်လဝ်တအ်ဂှ် ဂကောံရီုဗၚ်ပရေၚ်မၞိဟ်ဂမၠိုၚ် ပလံၚ်ဗစိုပ်လဝ် ရုၚ်ဂဥုဲညးဍုၚ်ကွာန် ပွိုၚ်ဍုၚ်လံၚ်လုၚ်ရဂှ် ဟီုသ္ဂးလဝ်ရ။
ပ္ဍဲဂိတုဒဳဇြေမ်ဗာ တုဲကၠုၚ် စၟတ်တ္ၚဲ ၁၈ ဂှ်လေဝ် ပ္ဍဲပွိုၚ်ဍုၚ်လံၚ်လုၚ်၊ ကွာန်တေဝ်ပုမ်၊ ပ္ဍဲလတူဒဵုအၚ်ဝ ဃောကၠောန်ဗဒှ်ဒၟံၚ် ပေါဲသၠးကဵုဒါန် ဗုမ်ရမျှာၚ်ၜါမ ကေၚ်ခတိုဟ်လဝ်တုဲ မၞိဟ်ဇီုကပိုက် က္လိဂွံလဝ်ဘဲဝပ် ဟၟဲရောၚ်ဂှ် ဂွံတီကေတ်လဝ်ရ။
ပရိုၚ်- သြၚ်လောန်တိုၚ်(မ်)