ဗြဝတဳ၊ ဂျာန္နဝါရဳ (၂)
လ္တူညးဍုၚ်ကွာန်အာတရဴဓမ္မတာ မအာကၠုၚ်ဒၟံၚ် လ္တူဂၠံၚ်ကွဳစက် ဒဵုဒဝ်ဏ (ထို့ကော်ကိုး) ဒၞါဲကံၚ်ဇြဳပရေၚ်ၜိုဟ်လလမ်ကရေၚ် KNU/KNLA-PC ထိၚ်ဒက်ဂှ် ဟွံကံက်သြန်မွဲသာ် ကုယာန်အာတရဴ မအာကၠုၚ်ဒၟံၚ် နကဵုပရေၚ်ပိုန်ဒြပ်တံဂှ်ဟေၚ် ကံက်လဝ်သြန်ဂှ် ညးမၞုံအခေါၚ်ဟီုဂး KNU/KNLA-PC သ္ကိုပ်ဗိုလ်ဇၞော်သဝ်ကျဝ်ညောအ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ဒၟါနူအကာဲအရာပေါဲဗ္တိုက်ကအ်ကြိက် မက္တဵုဒှ်ဒၟံၚ်လၟုဟ်တုဲ ဂၠံၚ်ဇၞော်အာယှ ဗြဝတဳ−ကအ်ကြိက်တံဝွံ ဒးဒုၚ်ကၟာတ်လဝ်တုဲ ဒၟါနူယာန်အာကၠုၚ်တံ ဒေါအ်ဒေၚ်အာလဝ်ဂှ်ရ ညးအာတရဴတံ ဒးသုၚ်စောဲအာကၠုၚ်ဒၟံၚ် ဂၠံၚ်ဒဵု (ထို့ကော်ကိုး) နူကဵုတိဍာ် KNU/KNLA-PC ထိၚ်ဒက် သၟဝ်ကျာဍုၚ်ကအ်ကြိက်ရ။
ဂၠံၚ်ဒဵု (ထို့ကော်ကိုး) ဝွံ ဒှ်ဂၠံၚ်တိတုဲ ကွဳစက်ဇၞော်ဇၞော်တံ အာကၠုၚ်ဟွံဂွံတုဲ ကွဳစက်ဍောတ်တ်တံဟေၚ် ကဵုလဝ်အခေါၚ်အာကၠုၚ်တုဲ နူကဵု (ထို့ကော်ကိုး) ဂှ်မွဲကဆံၚ် စိုပ်လ္ပာ်တေန်ဂါန်ညဳနံၚ် ကေုာံ လ္ပာ်ဍုၚ်ဗြဝတဳတေံရ။
စပ်ကဵုကိစ္စ ဂကောံဒပ်ကံၚ်ဇြဳပရေၚ်ၜိုဟ်လလမ်ကရေၚ် KNU/KNLA-PC ကံက်လဝ်သြန် လ္တူယာန်အာတရဴ လ္ပာ်ဂၠံၚ် (ထို့ကော်ကိုး) ပြဟ်ဟ်ဏံ မအာကၠုၚ်ဂၠိုၚ်ဒၟံၚ်တံဂှ်တုဲ ညးမၞုံအခေါၚ်ဟီုဂး KNU/KNLA-PC သ္ကိုပ်ဗိုလ်ဇၞော်သဝ်ကျဝ်ညောအ် ကလေၚ်သောၚ်ထ္ၜးလဝ် သာ်ဏံရ။
“ပရိုၚ်တံဏံ ဟွံဍာံပုဟ်ဂှ်လေဝ် အဲဟွံတးပါဲပုဟ်၊ လ္တူကွဳစက်ညးအာတရဴ မအာကၠုၚ်ဒၟံၚ်သာ်ဏံတံကဵုဒှ်၊ လ္တူမဒးရေၚ်တၠုၚ်ဒၟံၚ် နကဵုပရေၚ်ပိုန်ဒြပ်ကဵုဒှ် နကဵုပိုယ်တံ ကၠောန်သ္ပစၞောန်ပ္ညုၚ် နူကဵုဂအုပ်ဌာနမွဲကဆံၚ် တံလေဝ်နွံ၊ အဓိကဂှ်တှ်ေ လ္တူညးဍုၚ်ကွာန်အာတရဴဓမ္မတာတံဂှ် ပိုယ်တံ ဟွံကံက်ပုဟ်၊ ၜိုန်ဂှ်ကီုလေဝ် ကုကွဳစက် မကၠောန်ဒၟံၚ်ပရေၚ်ပိုန်ဒြပ် အာကၠုၚ်ဒၟံၚ်တံဂှ် နကဵုပရေၚ်ဂီုကၠီုကဵုဒှ်၊ သ္ဂောံထိၚ်ဒက်ပလေဝ်ပလေတ် ဂၠံၚ်ပိုယ်တံ ခိုၚ်ၚ်ကၠိုက်က် မဟွံမွဲဏီတံကဵုဒှ်၊ ဗီုပြေပြံၚ် ကံက်ဒၟံၚ်တံ နွံဂှ် အဲကၠိုဟ်ကေတ်ရ” သာ်ဝွံ သ္ဂးရ။
ပွမကံက်သြန် လ္တူကွဳစက်အာတရဴလၟုဟ်တံဂှ် ဟိုတ်နူဗီုပြၚ်အာကၠုၚ်ဒၟံၚ် နကဵုပရေၚ်အုပ်ဓုပ် စှ်ေကဵုသၞောတ် ဗီုကၠာတေံ ဟွံသေၚ်ဂှ်ရ အကြာကောန်ဂကောံ မရေၚ်တၠုၚ်ဒၟံၚ် နတဲဍာံဍာံတံကဵု အကြာညးဍုၚ်ကွာန်တံဂှ် အရာဟွံထေက်ကဵုဒှ်တံ ကေုာံ သ္ကုတ်ဟွံစှ်ေကဵုသၞောတ်တံ နွံတှ်ေ နွံမာန်ဏောၚ် သ္ကိုပ်ဗိုလ်ဇၞော်သဝ်ကျဝ်ညောအ် သ္ဂးရ။
သွက်ကိစ္စပရူပရာတံဏံဂှ် ဂကောံဒပ်ကံၚ်ဇြဳပရေၚ်ၜိုဟ်လလမ်ကရေၚ် KNU/KNLA-PC တံ ဂ္ဇအ်ကောံဓရီုကာမံက်တိုန်တုဲ ညံၚ်ယဝဵုဂလၚ် လ္တူညးဍုၚ်ကွာန်တံ ဂွိုအ်ဇြိုၚ်အာဂှ် ရေၚ်တၠုၚ်စဳဇန်စၞောန်ပ္ညုၚ်လဝ် ကုညးတာလျိုၚ် မဆေၚ်စပ်တံတုဲယျရောၚ် သ္ကိုပ်ဗိုလ်ဇၞော် သဝ်ကျဝ်ညောအ် သ္ဂးရ။
“အဓိကဂှ်တှ်ေ အပ္ဍဲကာလအကြေပ်အဂြတ်အခက်အခုဲ အလုံဍုၚ်မွဲ မ္ဒးဆေၚ်ဒၟံၚ်မုက်ဂှ် ညးဍုၚ်ကွာန်တံလေဝ် အခိၚ်ဒးဆေၚ်ဒၟံၚ်မုက် နကဵုအခက်အခုဲနာနာသာ်တံဂှ် နကဵုပိုယ်တံ သွက်ပရေၚ်အာကၠုၚ် ညးဍုၚ်ကွာန်တံဂှ် ကဵုအရီုဗၚ်မွဲမွဲသာ် ကၠောန်ကဵုဟွံမာန်ကီုလေဝ် ညံၚ်ညးဍုၚ်ကွာန်အာကၠုၚ်ဒၟံၚ်တံ ယဝဵုဂလၚ် ဂွိုအ်ဇြိုၚ်အာဂှ် ပ္ဍဲဗ္တံတုဲကၠုၚ်တေံရ ဂ္ဇအ်လဝ်ကောံဓရီု ကုက္ဍိုပ်သ္ကိုပ်မဆေၚ်စပ်တံတုဲ လၟုဟ်တှ်ေ က္ဍိုပ်သ္ကိုပ်ဂမၠိုၚ် စဳဇန်ကၠောန်ဒၟံၚ်ယျ” သာ်ဝွံ သ္ဂးရ။
ဂကောံဒပ်ကံၚ်ဇြဳပရေၚ်ၜိုဟ်လလမ်ကရေၚ် KNU/KNLA-PC ဝွံ ဖျေံသ္ဇိုၚ်ပ္ဍဲဒေသ (ထို့ကော်ကိုး) သၟဝ်ကျာကအ်ကြိက်တုဲ ဒှ်ဂကောံရပ်လွဟ်ကရေၚ် ထ္ပက်လဝ်စၟတ်တဲ NCA မွဲဂကောံတုဲ သီုကဵုဒှ်ဂကောံ အာစိုပ်ဆဵုဂဗလဝ် ပရေၚ်ၜိုဟ်လလမ် ကုကံၚ်ဇြဳပၞာန် မွဲဂကောံကီုရ။
သ္အာၚ်နူဂှ်ပၠန် ဂကောံဒပ်ကံၚ်ဇြဳပရေၚ်ၜိုဟ်လလမ် KNU/NLA-PC ဂှ်ဝွံ နူဂိတုဒဳဇြေမ်ဗာ (၂၇) စဵုကဵု (၃၀) လလအ်ပွိုၚ် (၄) တ္ၚဲ သွက်လၟေၚ်ကမၠောန် ပရေၚ်ၜိုဟ်လလမ် ကေုာံ ပရေၚ်ပလေဝ်သၞောဝ်သ္ဇိုၚ်ဂှ် အာစိုပ်ဆဵုဂဗလဝ်ကဵု ကမ္မတဳသဳကၠဳပရေၚ်ၜိုဟ်လလမ် ကံၚ်ဇြဳပၞာန်ရ။
ပရိုၚ်−သြၚ်လောန်တိုၚ်(မ်)