က္ၜၚ်ကံက်-ဂျာန္နဝါရဳ(၁)
ပ္ဍဲပရေၚ်ချဳဒရာၚ် ပရေၚ်စာ်စ္ဍးနူအန္တရာယ်ဂၠံၚ်ဍာန် ဍုၚ်သေံ ပ္ဍဲတ္ၚဲပထမဂှ်ဟေၚ် ညးဒးချိုတ်အာ (၃၇) တၠ ကေုာံညးက္လိဂွံလဝ်ဘဲဝပ် (၁၃၅) တၠ နွံလဝ်တုဲ ညးတအ်ဂှ် ဒှ်ညးက္တဵုဒှ်လဝ်ဂဗုတ် အန္တရာယ်ယာဉ် ဟိုတ်နူ ဒဳအသိၚ်လောန်ၜက်ကီု သီုကဵုဗၜူဒၟံၚ်တုဲ ဒဳဒၟံၚ်ယာဉ်ရဂှ် ဂွံတီကေတ်ရ။
ပ္ဍဲတ္ၚဲသၠးပွးကၠောံသၞာံဂှ် သွက်ဂွံယှအ်ဖအောန်ဖျေံ အန္တရာယာဉ်တုဲ ပရေၚ်ချဳဒရာၚ်စာ်စ္ဍးနူအန္တရာယ်ဂၠံၚ်ဍာန်ဂှ် ကၠောန်ဗဒှ်အာ စဵုကဵုဂိတုဂျာန္နဝါရဳ စၟတ်တ္ၚဲ (၄)တေံတုဲ အခိၚ်လၟုဟ်ဂှ် အတိုၚ်အခိုက်ကၞာယေန်သၞာၚ် ကောန်ဂကူသေံဂမၠိုၚ် သွက်ဂွံဆဵုဂဗကဵု သ္ၚိကၟိန်အိန်ထံၚ်ညးတအ်တုဲ ဒှ်အခိၚ်အာဝေၚ် တွဵုရးဌာန်တိုပ်သုက်ဇကုလေဝ် ဒှ်ရ။
ကၠာနူဟွံဂွံစကၠောန် ကာမ်ပုၚ်ဏံဂှ် ပတိတ်ကဵုလဝ် စၟတ်တဲထိၚ်ဒဝ်ယာန် ကုညးဒဳအသိၚ်ၜက်ဂမၠိုၚ် (၁၁၀၀၀၀) ပြၚ်ရဂှ် ဂကောံဒပ်ဗၠာဲသၟိၚ် ဂၠံၚ်ဒမြိပ်တရဴဇမ္ၚောဲ လလောၚ်တြးလဝ် ပရိုၚ်ရ။
အလုံမွဲကၟိန်ဍုၚ် အပံၚ်ဒၞာဲ (၃၇၀၀) ပြၚ်ဂှ် ၜိုန်ရသၞေဟ်ကၚ် စၟဳစၟတ်ဍာန် ဂၠိုၚ်ဒၟံၚ်ကီုလေဝ် ဂဗုတ်အန္တရာယ်ယာဉ်ဂှ် ဟွံကိတ်ညဳကဵု အတိုၚ်ဗ္ၜတ်တော်ချလဝ်တုဲ သွက်ကာမ်ပုၚ်တ္ၚဲပထမ ပ္ဍဲအခိၚ်ပတိတ်စရၚ် အန္တရာယ်ယာဉ်ဂှ် အတိုၚ်အလုံမွဲဍုၚ် ဂဗုတ်အန္တရာယ်ယာဉ် က္တဵုဒှ်လဝ် (၃၀၀)ဂဗုတ်ပြၚ်တုဲ မၞိဟ်(၃၅၁)တၠ က္လိဂွံလဝ်ဘဲဝပ်တုဲ (၃၇)တၠ ဒးချိုတ်အာလဝ်ရဂှ် ဂွံတီကေတ်ရ။
ပ္ဍဲကဵု ဟိုတ်ပရေၚ်ယာဉ်ဇီုတေက် အဓိကဂှ်မ္ဂး က္တဵုဒှ်လဝ် ဟိုတ်နူအသိၚ်လောန်ဂှ် (၄၁.၅၅) တၟံကၠံ ကေုာံ ဟိုတ်နူဗၜူတုဲ ဒဳလဝ်ဂှ် က္တဵုဒှ်လဝ် (၂၃.၅) တၟံကၠံရဂှ် ဒုတိယဝန်ဇၞော် ဌာနဝန်ဇၞော်ပရေၚ်အပ္ဍဲဍုၚ် ဟီုသ္ဂးလဝ်တုဲ ကွဳလိုန်ဓာတ်ဂှ် က္တဵုဒှ်လဝ် (၈၀) တၟံကၠံ ဂဗုတ်ယာဉ်တေက်ဇီုသီုဖအိုတ်တုဲ က္တဵုဒှ်လဝ် လၟိဟ်ဂၠိုၚ်အိုတ်ရဂှ် ဟီုသ္ဂးလဝ်ရ။
ဂဗုတ်အန္တရာယ်ကမ်ပရိုက်ဂှ် က္တဵုဒှ်လဝ် ပ္ဍဲအကြာအခိၚ် နူကဵု (၆)နာဍဳသဝ်တ္ၚဲ စဵုကဵု(၇)နာဍဳနူဂယးတုဲ မၞိဟ်ဒးချိုတ်လဝ်ဗွဲမဂၠိုၚ်တအ်ဂှ် ဒှ်မၞိဟ်အာယုက် ပ္ဍဲအကြာ နူ(၃၀)သၞာံ ကဵု(၃၉)သၞာံရဂှ် ညးဟီုသ္ဂးလဝ်ဏီရ။
ပ္ဍဲကၟိန်ဍုၚ်သေံ သ္ကုတ်သၟဝ်ကျာဂှ် ဂဗုတ်အန္တရာယာဉ် က္တဵုဒှ်လဝ်ဂၠိုၚ်အိုတ်တုဲ မၞိဟ်ဒးချိုတ်လဝ်ဗွဲမဂၠိုၚ်ဂှ် ဒှ်မၞိဟ် နူကဵုတွဵုရးပလိုတ် ပရာဆောတ်ကဳရဳခါန်ရဂှ် ဓမံက်ထ္ၜးလဝ်တုဲ ညးက္လိဂွံလဝ်ဘဲဝပ် ဗွဲမဂၠိုၚ်ဂှ် ဒှ်မၞိဟ် နူကဵုတွဵုရးဇြူရာတ်တနဳ သၠုၚ်ကျာရဂှ် ဓမံက်ထ္ၜးလဝ် ပ္ဍဲတၚ်လလောၚ်တြးဂှ်ရ။
Ref: The Thaiger