မတ်မလီု၊ ဒဳဇြေမ်ဗာ (၃)
ပ္ဍဲသၞာံတၟိ ၂၀၂၃ စဏံဂှ် ၚုဟ်ထဝ်အပ္ဍဲဍုၚ်ဝွံ လ္တူနူကဵုၚုဟ်သၞာံတုဲတေံဂှ် စှ်ေအာလဝ် ဟွံမွဲတုဲ စပံက်လဝ် ဗွဝ်ဖျာ နကဵုၚုဟ်သၠုၚ်ၚ် (၂၇) ကိုဋ်ဒ္ကေဝ်ဂှ် ညးတာလျိုၚ် ဂကောံတၠကမၠောန်ထဝ်တံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ၚုဟ်ထဝ်အပ္ဍဲဍုၚ်ဝွံ သၞာံတုဲကၠုၚ် ပ္ဍဲဂိတုဒဳဇြေမ်ဗာ အပ္ဍဲသတ္တာဟ လက္ကရဴအိုတ်ဂှ် ထဝ်ဒကောၚ်မဳဠေန်မွဲဒ္ကေဝ် နူကဵုၚုဟ်မၞုံ (၂,၆၈၀,၀၀၀) ဒ္ကေဝ်ဓဝ်ဂှ် တ္ၚဲဏံ ပ္ဍဲဂိတုဂျာန္နဝါရဳ (၂) ဂှ် စပံက်လဝ်ဗွဝ်ဖျာ နကဵုၚုဟ် ပွဳပွူ (၂,၇၁၀,၀၀၀) ဒ္ကေဝ်ရ။
မွဲကရောံ ၚုဟ်ထဝ်ဂၠးတိ ကလေၚ်သၠုၚ်တိုန်ကၠုၚ်ညိညဂှ် ၚုဟ်ဒဝ်ဠာ ကလေၚ်ဗက်တိုန်ကၠုၚ်တုဲ ၚုဟ်ထဝ်အပ္ဍဲဍုၚ် သၠုၚ်တိုန်ကၠုၚ်ကီုရဂှ် ညးတာလျိုၚ် ဂကောံတၠကမၠောန်ထဝ်မွဲတၠ ဟီုရ။
“ၚုဟ်ထဝ်ဂၠးတိ တိုန်တှ်ေ ၚုဟ်ဒဝ်ဠာအပ္ဍဲဍုၚ် တိုန်ကၠုၚ်ညိညရ၊ ၚုဟ်ထဝ်ဂှ် ကလေၚ်တိုန်ဒၟံၚ် ဆက်က်ဟဂှ်ရ၊ ၚုဟ်ဂၠးတိဂှ်တှ်ေ ဍေံဂှ် တိုန်ဗက်ၜိုတ်ဒဝ်ဠာ (၁၀၀) ၊ ကလေၚ်စှ်ေအာ ၜိုတ်ဒဝ်ဠာ (၁၀၀) အရာမဝေၚ်ဒၟံၚ်ၚုဟ်တံဏံဂှ်ရ ပိုယ်တံ ဒးဗက်ရပ်ဒၟံၚ်၊ ပ္ဍဲကဵုဗွဝ်ဖျာဂှ် ပရေၚ်သွံရာန် ဟွံဒှ်ဒၟံၚ်ပုဟ်၊ ၚုဟ်ရ တိုန်ဒၟံၚ်အိုတ်၊ သွံဂွံမွဲၜါဒကုတ်ဂှ် စိုပ်ဇိုၚ်သဝ်တ္ၚဲတှ်ေ ဒးကလေၚ်ဗက်ဒၟံၚ်သၠုဲဂှ် တၟာကလှ်ေရ” သာ်ဝွံ သ္ဂးရ။
ၚုဟ်ထဝ်ဂၠးတိတံဝွံ အပ္ဍဲသတ္တာဟ လက္ကရဴအိုတ် ဂိတုဒဳဇြေမ်ဗာဂှ် မွဲအံက်သ နူကဵုမၞုံကၠုၚ် ပွဳပွူ (၁၇၉၀) ဒဝ်ဠာဂှ် ပြဟ်ဟ်ဏံ ၚုဟ်သၠုၚ်တိုန်ကၠုၚ်မံၚ် စဵုကဵုပွဳပွူ (၁၈၂၃) ဒဝ်ဠာရ။
ၚုဟ်ဒဝ်ဠာတံဝွံ ပ္ဍဲဂိတုဒဳဇြေမ်ဗာ အပ္ဍဲသတ္တာဟ လက္ကရဴအိုတ် တုဲကၠုၚ်တေံဂှ် မွဲဒဝ်ဠာ နူကဵုမၞုံကၠုၚ် ပွဳပွူ (၂၈၀၀) ဒ္ကေဝ်ဂှ် တ္ၚဲဏံ ၚုဟ်ကလေၚ်သၠုၚ်တိုန်လဝ်ညိည စဵုကဵု (၂၈၅၀) ဒ္ကေဝ်ရ။
ၚုဟ်ထဝ်အပ္ဍဲဍုၚ် ဂွံကလေၚ်သၠုၚ်တိုန်ကၠုၚ်ဂှ်ဝွံ ၚုဟ်ထဝ်ဍုၚ်ဗၟာ သၠုၚ်မ္ဂး ထဝ်ဍုၚ်သ္အာၚ် လုပ်စိုပ်ကၠုၚ်မာန်တုဲ ယဝ်ရၚုဟ်ထဝ်ဍုၚ်ဗၟာ သဝ်မ္ဂး ထဝ်ဂမၠိုၚ် တိတ်အာဍုၚ်သ္အာၚ်မာန်ဂှ်ရ တန်တဴကဵု လ္တူၚုဟ်ထဝ်ဂၠးတိ ကဵု လ္တူၚုဟ်ဒဝ်ဠာတုဲ ဒးခုတ်ကေတ်ရောၚ် တၠကမၠောန်ထဝ်မွဲတၠ ဟီုရ။
“တန်တဴကဵု လ္တူၚုဟ်ထတ်ဂၠးတိ ၊ ၚုဟ်ဒဝ်ဠာတံတုဲ ၚုဟ်ထဝ်ဍုၚ်ဗၟာ ဒှ်ဒၟံၚ်တိုန်စှ်ေဏောၚ်တှ်ေ ၊ ၚုဟ်ထဝ်ဂှ်တှ်ေ ၚုဟ်ဒဝ်ဠာစှ်ေမ္ဂး ဒးဖျေံဗက်ဏောၚ်၊ မူဟိုတ်ရောမ္ဂး ၚုဟ်ထဝ်ဍုၚ်ဗၟာ သၠုၚ်ဒၟံၚ်ဟီုတှ်ေ ထဝ်ဍုၚ်သ္အာၚ်တံ လုပ်ကၠုၚ်ဏောၚ်၊ ထဝ်ဂှ်တှ်ေ အတိုၚ်ဗ္ၜတ်အလုံဂၠးတိဂှ်မ္ဂး ၚုဟ်ထဝ်ဍုၚ်ဗၟာ သဝ်မ္ဂး ထဝ်ဇကုတံ တိတ်အာဍုၚ်သ္အာၚ် တွဵုဏောၚ်၊ အေဂှ်တှ်ေ ၚုဟ်ထဝ်ဂှ် တန်တဴကဵု လ္တူၚုဟ်ဒဝ်ဠာ၊ ၚုဟ်ထဝ်ဂၠးတိတုဲတှ်ေ ဒးခုတ်ကေတ်ဏောၚ်” သာ်ဝွံ သ္ဂးရ။
ပ္ဍဲကဵုသၞာံတၟိမံက်ဏံဂှ် ၚုဟ်ထဝ်အပ္ဍဲဍုၚ် ကလေၚ်သၠုၚ်တိုန်ကၠုၚ်လဝ်ဂှ်ရ အပ္ဍဲဗွဝ်ဖျာ မၞိဟ်ရာန်ပကောံပကေဝ် ဗီုကၠာတေံ စဵုကဵုဟွံမွဲ အောန်ကၠုၚ်တုဲ ပရေၚ်သွံရာန် ဟွံဂြိပ်ပုဟ်ဂှ် ဂွံတီကေတ်ရ။
ကံၚ်ဇြဳပၞာန်ဂှ် သွက်ၚုဟ်ထဝ်အပ္ဍဲဍုၚ် ဂွံစှ်ေဂးတုဲ သွံတြးကဵုဒၟံၚ် ထဝ်တၚ်္ကာတံ ဗက်ကဵုလျိုၚ်တုဲ မွဲဒ္ကေဝ်၊ ၜါမး၊ မွဲမး ဂးတုဲ သွံတြးကဵုဒၟံၚ်ကီုလေဝ် ဒၟါနူသွံဒၟံၚ် အတိုၚ်ၚုဟ်ဗွဝ်ဖျာ မ္ၚးတံဂှ်ရ ၜိုတ်ထေၚ်လဝ် ၚုဟ်ထဝ်အပ္ဍဲဍုၚ် စှ်ေကၠုၚ်လဝ် ဟွံမွဲရ။
သၞာံတုဲကၠုၚ် ပ္ဍဲဂိတုအဝ်ဂါတ် သတ္တာဟလက္ကရဴအိတ်ဂှ် ၚုဟ်ဒဝ်ဠာ သၠုၚ်တိုန်ကဵုဆတုဲ မွဲဒဝ်ဠာ က္တဵုဒှ်လဝ် စဵုကဵုပွဳပွူ (၄၅၀၀) ဒ္ကေဝ်တုဲ ၚုဟ်ထဝ်အပ္ဍဲဍုၚ်ဂှ်လေဝ် ထဝ်ဒကောၚ်မဳဠေန် မွဲဒ္ကေဝ်ဂှ် ၚုဟ်ကေၚ်သၠုၚ်တိုန်ကၠုၚ်လဝ် စဵုကဵုပွဳပွူ (၃၅) ကိုဋ်ဒ္ကေဝ်ရ။
ပ္ဍဲဍုၚ်ဗၟာဂှ် ၚုဟ်ထဝ်အပ္ဍဲဍုၚ်ဝွံ ပ္ဍဲလက်ထက်အလဵုအသဳ NLD ဂှ် ထဝ်ဒကောၚ်မဳဠေန်မွဲဒ္ကေဝ်ဂှ် နူကဵုၚုဟ်မၞုံ ပွဳပွူ (၁၃) ကိုဋ်ဒ္ကေဝ်ဓဝ်ဂှ် ကြဴနူဒပ်ပၞာန်သီအဝဵုတုဲ ၚုဟ်ထဝ် သၠုၚ်တိုန်ကၠုၚ် စဵုကဵုဗ္ဒါဲ (၃) ဆတုဲ ၚုဟ်ဟွံညိၚ်ဝတ်တံလေဝ် က္တဵုဒှ်ဒၟံၚ် မွဲဏှမွဲဏှရ။
ပရိုၚ်−သြၚ်လောန်တိုၚ်(မ်)