ဒဳမအ်ဇြော-ဂျာန္နဝါရဳ(၆)
တွဵုရးကရေၚ်ဍာဲ ပ္ဍဲကဵုပွိုၚ်ဍုၚ်ဒဳမအ်ဇြော ပ္ဍဲကဵုဗ္ဒပ်ပါဲပၞာန်မွဲဗ္ဒပ် ဟိုတ်နူလွဟ်ဇၞော် ကံၚ်ဇြဳပၞာန်ပန်ဏာလဝ် တုဲကၠုၚ်ဏံ ပြဟ်ဒတုံ ခတိုဟ်လဝ်တုဲ ညးဗြဴပါဲဒဴဘဲပၞာန်မွဲတၠ ဒးချိုတ်အာရဂှ် ဂွံတီကေတ်ရ။
ပ္ဍဲပရေၚ်ပရောဂှ် ဂိတုဂျာန္နဝါရဳ စၟတ်တ္ၚဲ (၃) ပ္ဍဲအခိၚ်ၜိုတ် (၇) နာဍဳသဝ်တ္ၚဲဂှ် လွဟ်ဇၞော်ကံၚ်ဇြဳပၞာန်ပန်ဏာလဝ် (၂) ဒတုမ်ပြဟ်ခတိုဟ်အာ ပ္ဍဲလတူဗ္ဒပ်ပါဲပၞာန်ပၞာန် ထွဳဇြော ဒဳမအ်ဇြောသ္ကုတ်ပလိုတ် (ထုမ်ကျောက်တံၚ်)ရ။
မကမ်လွဟ်ဇၞော်ဂှ် ဟိုတ်နူဒတုမ်စှ်ေလဝ် ပ္ဍဲလတူတာဲ ဗ္ဒပ်ပါဲပၞာန်ဂှ်တပ်ပ်တုဲ ဒဝ်ဇြူမျာ အာယုက်(၅၈)သၞာံ နွံဒၟံၚ်ပ္ဍဲတာဲ ဒးချိုတ်အာလဝ်ရဂှ် ဂွံတီကေတ်ရ။
ဒပ်ကံၚ်ဇြဳပၞာန်သီအဝဵုတအ် ကၠောန်သ္ပဒၟံၚ် ပရေၚ်ပန်ဖျေံလွဟ်ဇၞော် ပ္ဍဲကဵုဗ္ဒပ်ပါဲပၞာန် ပ္ဍဲဍုၚ်ဒဳမအ်ဇြောကဵု သ္ၚိဌာန်ညးဍုၚ်ကွာန်တအ် မံၚ်တန်တဴဒၟံၚ် အဆက်ဟွံပိုတ်သ္ကုတ်ရ။
ပ္ဍဲဂိတုနဝ်ဝေမ် တုဲကၠုၚ်ဂှ်လေဝ် မကမ်လွဟ်ဇၞော် ကံၚ်ဇြဳပၞာန်ပန်ဏာလဝ် ပ္ဍဲကွာန်ဒဝ်နိုဝ်ကူဂှ် ဟိုတ်နူဒတုမ်စှ်ေလဝ် ပ္ဍဲလတူဘာထိၚ်ဒဝ်ကောန်ၚာ်တုဲ ကောန်ၚာ် အာယုက် (၅)သၞာံမွဲတၠ ဒးချိုတ်အာလဝ်ဏီရ။
သ္အာၚ်နူဂှ်ပၠန် ကံၚ်ဇြဳပၞာန် သုၚ်စောဲဒရုမ်တုဲ ပန်ဗတိုက်ဒၟံၚ် ပ္ဍဲပွိုၚ်ဍုၚ်ဒဳမအ်ဇြော ကြဳကြဳသိၚ်ၚ်ဂှ်ရ ပရေၚ်ဇီုကပိုက်ဒးဒၟံၚ် ညးဍုၚ်ကွာန်တအ် နွံဒၟံၚ်ရဂှ် ညးဒေသတအ် ဟီုသ္ဂးလဝ်ရ။
ပ္ဍဲမွဲကာလသီအဝဵု ကံၚ်ဇြဳပၞာန်ကၠောန်ကၠုၚ် ပရေၚ်ပန်ပှော် တွဵုရးကရေၚ်ဍာဲ နကဵုက္ၜၚ်ကျာ ဗ္ဒာဲ(၂၀၀) ဝါနွံတုဲ ဟိုတ်နူပန်ပှော်ဒၟံၚ်လွဟ်ဇၞော် ကရပ်ဒဒှ်အရိုဟ်တ္ၚဲဂှ်ရ ကောန်အရာပ်ညးဒေသဂမၠိုၚ် (၄၁၉)တၠ ဒးချိုတ်အာလဝ်ရဂှ် ဂကောံဇြဟတ်တဴတက်ညးဍုၚ်ကွာန်ကရေၚ်ဍာဲ PKPF လလောၚ်တြး ပ္တိတ်လဝ်ပရိုၚ်ရ။
ပရိုၚ်-သြၚ်လောန်တိုၚ်(မ်)
ဗီုရုပ်- Karenni’s Voice