ဗြဝတဳ၊ ဂျာန္နဝါရဳ(၆)
ဒဒန်ပရေၚ်ဆာန်ကၟိန် သေံ-ဗၟာ စၟတ်(၁) ဒးဒုၚ်ကၟာတ်လဝ် ဟိုတ်နူဒပ်ပၞာန်သီအဝဵု မွဲကရောံကဵု ယဲကပ်ဂိုဝ်ဝေတ်ဂှ် ပလေဝ်ပလေတ်ဒၟံၚ် သွက်ဂွံကလေၚ်ပံၚ်ရဂှ် ကောန်ညးဍုၚ်ကွာန်တအ် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
ဒဒန်ပရေၚ်ဆာန်ကၟိန် သေံ-ဗၟာ စၟတ်(၁) ဂှ် နူကဵုဂိတုဖေဖဝ်ဝါရဳ သၞာံ ၂၀၂၂ တေံ ဟိုတ်နူပရေၚ်ယဲကပ်ကၠောံထၞာန်တုဲ ကၟာတ်သီကၠုၚ်လဝ် ညးအာတရဴကဵု ယာဉ်ကွဳစက် ဟၟဲကဵုတ္ၚဲအပိုၚ်အခြာရ။
ဆဂး ပ္ဍဲဂိတုဂျာန္နဝါရဳ စၟတ်တ္ၚဲ ၅ ဏံဂှ် သွက်ဂွံကလေၚ်ပံက် ဒဒန်ပရေၚ်ဆာန်ကၟိန် စၟတ် (၁) ဂှ် ညးမၞုံတာလျိုၚ် နူကဵုလ္ပာ်ဗၟာ ကၠောန်သ္ပဒၟံၚ် ပရေၚ်သ္အးဇ္ၚးပလေဝ်ပလေတ် ဒၞာဲစမြိုၚ်ရုၚ်တအ်ဂှ်ရ။
ဒဒန်ပရေၚ်ဆာန်ကၟိန် သေံ-ဗၟာစၟတ်(၁) ဂှ် ပ္ဍဲဂိတုဂျာန္နဝါရဳ စၟတ်တ္ၚဲ ၆ ဏံမ္ဂး ကလေၚ်ပံက်ပၠန်ဏောၚ် ၜိုန်ရပရေၚ်ညးဒေသတအ် ဟီုဂးဒၟံၚ်ကီုလေဝ် နကဵုသြၚ်လောန်တိုၚ် သ္ပဒ္တန်တၞဟ်ခြာ ဟွံမာန်ဏီရ။
အတိုၚ်လဟီုညးဒေသတအ်မ္ဂး ယဝ်ရကလေၚ်ပံက် ဒဒန်ပရေၚ်ဆာန်ကၟိန်စၟတ် (၁) မ္ဂး ကွဳစက်ပ္တိုန်လဝ်စၟတ်သမ္တီ ဗွဲမလုပ်သၞောဝ် ပ္ဍဲကဵုဍုၚ်သေံတအ်ဂှ် ဒဒှ်ရအာကၠုၚ်မာန်ဏောၚ် ဂွံမိၚ်ကေတ်လဝ်ရဂှ် ဟီုသ္ဂးဒၟံၚ်အိုတ်ရ။
သွက်ဂွံကလေၚ်ပံက် ဒဒန်ပရေၚ်ဆာန်ကၟိန် စၟတ်(၁) ဂှ် ကြဴနူလ္ပာ်သေံ ကၠောန်ကၠုၚ်ပရေၚ်ပလေဝ်ပလေတ် ပ္ဍဲဂိတုဒဳဇြေမ် တုဲကၠုၚ်တေံဂှ် အခိၚ်လၟုဟ်ဏံမ္ဂး နူကဵုလ္ပာ်ဗၟာလေဝ် ကၠောန်သ္ပကၠုၚ် ပရေၚ်ပလေဝ်ပလေတ်ကီုရ။
ဒဒန်ပရေၚ်ဆာန်ကၟိန် သေံ-ဗၟာ စၟတ် (၁)ဂှ် ၜိုန်ရဒးကၟာတ်လဝ် ပွိုၚ် (၂) သၞာံပြၚ်ကီုလေဝ် ညံၚ်ပရေၚ်ဗၞိက် ဇွောဝ်လုပ်ၜါဍုၚ် ဟွံဂွံဒေါံဇူအာဂှ် ၜိုန်ရကဵုလဝ်အခေါၚ် ကူသာန်ဗၞိက် နူကဵုဒဒန်ပရေၚ်ဆာန်ကၟိန် စၟတ် (၂)ကီုလေဝ် ကၟာတ်လဒဵုလဝ် အခေါၚ် ညးအာတရဴတအ် လုပ်တိတ်ရ။
ပရိုၚ် – သြၚ်လောန်တိုၚ်(မ်)