သေတ်ဒိုဲ၊ ဂျာန္နဝါရဳ (၆)
ပရူပရာ သၞာဲဒဴ (၃) တၠ သီုကဵုပါလုပ် သ္ကိုပ်က္ဍိုက်ပ်ပၞာန် သ္ကိုပ်ဗိုလ်ဇၞော် ခိုၚ်သဵုမျ နူဒပ်ပၞာန်ဗၠးၜးဍုၚ်ရခေၚ် (ALA)၊ ကမ္မတဳကေၚ်ကာဗဟဵု ဗော်ဗၠးၜးဍုၚ်ရခေၚ် (ALP) တံ ဒးဒုၚ်ဂစိုတ်ဂှ်ဝွံ ဒှ်တၠတဲ ဒပ်ပၞာန်ရခေၚ် (ULA/AA) ရောၚ်ဂှ် ALP စောဲစပ်လဝ်ရ။
ပ္ဍဲဂိတုဂျာန္နဝါရဳ (၄) ဂှ် သၞာဲဒဴ (၃) တၠ သီုကဵုပါလုပ် သ္ကိုပ်က္ဍိုက်ပ်ပၞာန် သ္ကိုပ်ဗိုလ်ခိုၚ်သဵုမျတံ ၜိုတ် (၈) နာဍဳကဝိုက် ပယျာံဂယး အခိၚ်မအာဒၟံၚ် လ္တူဍုၚ်သေတ်ဒိုဲ နကဵုကွဳစက်ဂှ် ဟိုတ်နူဒပ်ပၞာန်ရခေၚ် (ULA/AA) ပကီုပရာပ် ကၠတ်ပန်လဝ်ဂှ်ရ ဒးစုတိအာလဝ် နကဵုဝပ်သေနာတ် လ္တူကွဳစက် မဍိုက်ကၠုၚ်တံဂှ်ရောၚ် ALP လလောၚ်ပ္တိတ်လဝ် ပ္ဍဲဂိတုဂျာန္နဝါရဳ (၅) တေံရ။
ULA/ AA ဝွံ ဟွံမွဲကဵုဓဝ်ဗ္စာ အကြာကောန်ဂကူရခေၚ်ရေၚ်သ္ကအ်တုဲ ပွမကၠောန်သ္ပပကီုပရာပ် ကၠတ်ပန်လဝ် ကုသ္ကိုပ်က္ဍိုက်ပ်ပၞာန် သ္ကိုပ်ဗိုလ်ခိုၚ်သဵုမျ ကေုာံ သ္ကိုပ်တမ်ဒပ် (၂) တၠဂှ်ဝွံ သ္ကဵုဇီုကပိုက်ကၠေံ ပရေၚ်ညဳသၟဟ်ကောံကလောံ အလုံကောန်ဂကူရခေၚ်သၟးဟွံက သီုသ္ကဵုညးဍုၚ်ကွာန်ရခေၚ်တံ ဖေက်ဒဇပ်ဇတဝ်ဂှ်ရ ALP ဒစဵုဒစးဗျိပၠုတ် သ္ကာတ်တ်မြဟ်ဟ်ဂှ် သ္ဂးရ။
လ္တူသၞာဲဒဴ (၃) တၠ သီုကဵုပါလုပ် သ္ကိုပ်က္ဍိုက်ပ်ပၞာန် သ္ကိုပ်ဗိုလ်ခိုၚ်သဵုမျတံ ဒးဒုၚ်ကၠတ်ပန်ဂစိုတ်ဂှ် ဒုဥက္ကဌ ဗော်ဗၠးၜးဍုၚ်ရခေၚ် (ALP) ဒဝ်သဝ်မျလေန် ကလေၚ်ခၠေဝ်လဝ် ဗီုလၟုဟ်ရ။
“လလောၚ်ပ္တိတ် တၚ်လလောၚ်တြးတုဲယျဟီုဂှ် ဇကုဂှ် ဟွံတီမံၚ်ပုဟ်၊ မုမှလေဝ် ဟွံကၠောန်ဏီပုဟ်၊ ဇၟာပ်ဌာန်ပရိုၚ်တံ သၟာန်ဂှ် ဟီု အရေဝ်ပိပါၚ်ရဏောၚ်၊ ဂၞန် (၁) ဂှ် မိက်ဂွံဂစိုတ်တုဲ ကၠုၚ်ဂစိုတ်၊ ဂစိုတ်တုဲ ချိုတ်အာ၊ ဍုၚ်ရခေၚ် ပရေၚ်ဂီုကၠီု ဟွံမွဲပုဟ်၊ ဟီုပိသာ်ဏံရ၊ တၞဟ်သ္အာၚ်ဂွံဟီုဂှ်လေဝ် ဟွံမွဲဏီပုဟ်၊ လၟုဟ်ဂှ်တှ်ေ နဒဒှ်စၟတ်သမ္တီတ္ၚဲဒှ်လၞီအောန်စိုတ် သွက်က္ဍိုပ်သ္ကိုပ် မပြဟ်လလုဲအာတံဂှ် စၟတ်လဝ် (၇) တ္ၚဲရ၊ တုဲမ္ဂး ပ္တိုန်အလာံကဝက်ဏောၚ်၊ အလာံသာ်ဗ္စံက်ဂှ် စွံလဝ်လ္တူရ၊ ပါဲနူဂှ်တုဲ မုမှလေဝ် ဟွံဟီုဏီပုဟ်” သာ်ဝွံ ညးသ္ဂးရ။
ပ္ဍဲကဵုလိက်လလောၚ် ALP ဂှ် ULA/AA ဂှ် ရပ်ဒက်ပျဲပျာံ၊ ကၠတ်ပြိုက်ဂစိုတ် ကုက္ဍိုပ်သ္ကိုပ် ဗော်/ဒပ်ပၞာန်ဇကုတံ၊ ကောန်ဂကောံတံ ကေုာံ ကောန်ဗော်တံသၟးဟွံက သီုကဵုညးဍုၚ်ကွာန်၊ ခမဳသၚ် ဟၟဲကဵုဒုဟ်တံ၊ ကောန်ဂကောံက္ဍိုပ်သ္ကိုပ် ဗော်ပရေၚ်ဍုၚ်ကွာန်ရခေၚ်တံ ဟွံကဵုသှ်ေ ရပ်ဒက်ပျဲပျာံ ဟွံမွဲကဵုသၞောဝ်၊ ကၠတ်ဂစိုတ်တံဂှ် ကၠောန်ဒၟံၚ်အဆက်က်ဂှ်ရ ညံၚ်ဗဗွဲဓဝ်သ္ဂောံနွံ ရေၚ်တၠုၚ်အာရောၚ် သ္ဂးရ။
စပ်ကဵုသၞာဲဒဴ (၃) တၠ သီုကဵုသ္ကိုပ်က္ဍိုက်ပ်ပၞာန်တံ ဒးချိုတ်အာဂှ်တုဲ လ္တူတၚ်လလောၚ်တြး ALP မစောဲစပ်လဝ်ဂှ် နကဵုသြၚ်လောန်တိုၚ်(မ်) ဆက်စၠောံလဝ် ညးမၞုံအခေါၚ်ဟီုဂး ဒပ်ပၞာန်ရခေၚ် (AA) ဥူခိုၚ်သုခ (၃) ဝါဟွံကကီုလေဝ် ဟွံဂွံလဝ်အဆက်ရ။
ဗော်ဗၠးၜးဍုၚ်ရခေၚ် (ALP) ဝွံ ဒှ်ဂကောံရပ်လွဟ်ကောန်ဍုၚ်အရၚ် ထ္ပက်လဝ်စၟတ်တဲ ဒေါအ်ပန်ပှော် အလုံကၟိန်ဍုၚ် (NCA) ပ္ဍဲဂိတုအံက်တဝ်ဗာ သၞာံ ၂၀၁၅ တေံရ။
ကြဴနူဒပ်ပၞာန်သီအဝဵု သၞာံ ၂၀၂၁ တုဲ ပ္ဍဲသၞာံ ၂၀၂၂ ဂိတုဨပရဴ ပ္ဍဲပေါဲသဳကၠဳပရေၚ်ၜိုဟ်လလမ် က္ဍိုပ်သ္ကိုပ်ပၞာန် သ္ကိုပ်ပၞာန်ဇၞော်မေန်အံၚ်လှာၚ် မစကော်ဘိက်လဝ်ဂှ် ဗော်ဗၠးးဍုၚ်ရခေၚ် (ALP) တိုန်စိုပ်သဳကၠဳလဝ် စဵုကဵု (၂) ဝါတုဲ ပ္ဍဲသၞာံ ၂၀၂၂ ကြပ်အိုတ်ဏံဂှ် တိုန်စိုပ်သဳကၠဳလဝ် နဒဒှ်အလန်တတိယရ။
ပရိုၚ်−သြၚ်လောန်တိုၚ်(မ်)