မတ်မလီု၊ ဂျာန္နဝါရဳ (၁၉)
အလုံကၟိန်ဍုၚ်မွဲ စဵုကဵုဗ္ဒါဲၜါသၞာံ ဒပ်ပၞာန်သီလဝ်အဝဵုဂှ် စက်ယန္တယာပရေၚ်ထတ်ယုက် ကလေၚ်ဂေတ်ဂြိပ် အတိုၚ်ဗီုတြေံ ဟွံမာန်ဏီတုဲ ပွမရေၚ်တၠုၚ်ဒုၚ်ကာတံဂှ်လေဝ် သာပရေံကၠုၚ်ရောၚ်ဂှ် ဂကောံဟံၚ်ပြာ်ပရေၚ်မၞိဟ် ကေုာံ ညးဍုၚ်ကွာန်တံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ပ္ဍဲကဵုရုၚ်ဂဥုဲ ကံၚ်ဇြဳပၞာန် မထိၚ်ဒက်လဝ်တံဂှ် ဒၟါနူကဵုပရေၚ်ချဳဒရာၚ် ဒစဵုဒစးအဝဵု နနဲဟွံပကီုပရာပ် CDM တံဂှ်တုဲ ဇြဟတ်အ္စာဂဥုဲ ကေုာံ အ္စာဗြဴတံ ဟွံရုမ်ဂပ်ကီု၊ ဂဥုဲဇဗ ကေုာံ ကပေါတ်မဆက်စပ်တံ ဟွံဍိုက်ပေၚ်ကီု၊ ပရေၚ်အုပ်ဓုပ်ကောပ်ကာဲ ဇြဟတ်ဍိုန်လျတံကီုဂှ်ဝွံ သွက်ဂွံရေၚ်တၠုၚ်ကဵု ဍိုက်က်ပေၚ်ၚ်မာန်ဂှ် ဒှ်တၚ်ကော်ဆဴ အဓိကမွဲရ။
မွဲလ္ပာ်ပၠန်ဂှ် ကံၚ်ဇြဳပၞာန်ဝွံ ဟိုတ်နူပရေၚ်ချဳဒရာၚ် CDM တုဲ ပ္ဍဲကဵုရုၚ်ဂဥုဲတံဂှ် ခါန်ကၞက်အ္စာဂဥုဲတံကဵု အ္စာဗြဴတံ ဍိုက်က်ပေၚ်ၚ်ဟွံမာန်ဏီတုဲ ရုၚ်ဂဥုဲပွိုၚ်တိုက်လ္ၚဵုတံလေဝ် ဒဵုကဵုအခိၚ်လၟုဟ် ဒးကၟာတ်လဝ်ဖိုဟ်ရ။
ကောန်ဂကောံဟံၚ်ပြာ်ပရေၚ်မၞိဟ်မွဲတၠဂှ် ပ္ဍဲကဵုရုၚ်ဂဥုဲ လက်ထက်ကံၚ်ဇြဳပၞာန်တံဂှ် လ္တူနူကၠာတေံဂှ် ပွမရေၚ်တၠုၚ်ဒုၚ်ကာပရေၚ်ထတ်ယုက်တံ စှ်ေအာလဝ် ဟွံအောန်နူကဵု (၅၀) တၟံကၠံတုဲ မၞိဟ်ယဲပၟိက်ဇၞော်တံမ္ဂးလေဝ် အခိၚ်ဍေံတံသၠးမှဟေၚ် ဒှ်ကၠုၚ်အကာဲအရာ လွဳလွတ်ကဵုရဂှ် ဟီုရ။
“ ဒးပ္တောံၜတ်ကဵုဗီုပြၚ်ကၠာတေံမ္ဂး တၞဟ်ခြာအာ တၟာဂလိုၚ်ရ၊ ကၠာတေံဂှ်တှ်ေ အရာမရေၚ်တၠုၚ်ဒုၚ်ကာတံဂှ် ခိုဟ်ဒၟံၚ်ဏောဝ်၊ လၟုဟ်ဂှ် ပရေၚ်ရေၚ်တၠုၚ်တံဂှ် အောန်စှ်ေကၠုၚ်ရ၊ ယအ်ကၠုၚ်ရ ယအ်စှ်ေအာ စဵုကဵု (၅၀) တၟံကၠံရ၊ အရာမသ္ပဂရုတံလေဝ် ဟွံမွဲရပုဟ်၊ အလဵုမၞိဟ်မကၠောန်ဒၟံၚ်တံဂှ် ဒှ်ဒၟံၚ်ဗီုပြၚ် စိုတ်ကဵုမၞိဟ် ဟွံကာတ်ဒၟံၚ်ပုဟ်၊ ဗီုပြၚ်စေတနာဟွံမွဲတံဂှ် ပိုယ်တံဂွံဆဵုဒၟံၚ်ရ၊ မၞိဟ်ယဲပၟိက်ဇၞော်တံမ္ဂးလေဝ် ဍေံတံသၠးမှ ဗီုပြၚ်ကၠောန်ကဵုတံ နွံရ၊ မွဲပၠန်ဂှ် ဒၞါဲဏံ ပိုယ်တံ မုထပ်ဒှ်ရောဟီုတှ်ေ ပိုယ်တံ အာပလံၚ်မၞိဟ်ယဲ မလုတ်ဒကုတ်ဒးအာလဝ် ပ္ဍဲကဵုသကဲဂၠံၚ်ကွဳစက်တံဂှ်မ္ဂး မၞိဟ်မၚ်ယဲ ဟွံပါမ္ဂး ဒှ်ဒၟံၚ်အကာဲအရာ ပိုယ်တံ ဒးကလေၚ်မၚ်ဒၟံၚ်တံလေဝ် နွံရ၊ ပြဿနာဏံမွဲဂှ် ဇၟာပ်ပ်ဗွိုၚ်ပရေၚ်မၞိဟ်တံ ဒးဂဗဒၟံၚ်ရ” သာ်ဝွံ သ္ဂးရ။
သ္အာၚ်နူဂှ်ပၠန် ပ္ဍဲကဵုရုၚ်ဂဥုဲ သၟဝ်တဲကံၚ်ဇြဳပၞာန်တံဂှ် ယဝ်ရအာပလံၚ်ဗစိုပ် မၞိဟ်ယဲကာမံက်တိုန်မ္ဂး လွဳလွတ်ကဵုလွာဲဂှ်ဂှ် ဟွံမွဲရတုဲ အခိၚ်တၠမၞိဟ်ယဲကၠုၚ်မှဟေၚ် လွဳကဵုတံ နွံတုဲ ကုမၞိဟ်မပြဟ်လလုဲအာတံဂှ်လေဝ် ကလိဂွံလိက်ဂဥုဲဗၠာဲသၟိၚ်တံမှဟေၚ် ဒုၚ်ကဵုတဲတံ နွံဂှ် ဂွံတီကေတ်ရ။
ညးဍုၚ်ကွာန်မွဲတၠ မကေၚ်အာစိုပ်လွဳလဝ် ပ္ဍဲရုၚ်ဂဥုဲဂှ်လေဝ် ပ္ဍဲကဵုရုၚ်ဂဥုဲ လက်ထက်ကံၚ်ဇြဳပၞာန်တံဂှ် လွဳကဵုမၞိဟ်ယဲကာမံက်တိုန်တံ လွာဲဂှ်ဂှ် ဟွံမွဲရတုဲ ကဵုမၚ်ဒၟံၚ်တံ နွံတုဲ ပ္ဍဲအရာဟီုဂးဆက်ဆောံတံဂှ်လေဝ် ကြံၚ်မ္ၚိုဟ်ကၠုၚ်ဂှ် ဟီုလဴထ္ၜးကဵုလဝ် တၚ်ဆဵုဂဗညးရ။
“စိုပ်ရုၚ်ဂဥုဲတုဲ အေဒၞါဲဂှ် ဍေံတံ သၟာန် ယၟု၊ ယၟုမိမတံရ၊ သၟာန်တုဲမ္ဂး ချူကဵုလိက်ရ၊ ချူလိက်တုဲမ္ဂး ဍေံတံ ကဵုဂ္ဇအ်မၚ် ၜိုတ်ဘာ်နာဍဳ၊ ဒးဟီုမ္ဂး လအ်ဒၟံၚ် ပ္ဍဲကဵုကံၚ်တာရုၚ်ဂဥုဲဂှ်ရ၊ မၞိဟ်ဂှ် နွံဒၟံၚ်ရ၊ အ္စာဗြဴ ဂၞိန်ဗ္ကေတ်ကီု သာ်ဍီုကီုဂှ် ဂွံဆဵုဒၟံၚ်ရ၊ ဗီုကၠာတေံဂှ် ဟွံသေၚ်စကွေံကွေံရပုဟ်လေဝ် တီမံၚ်သေၚ်ဟာ၊ လၟုဟ်ဂှ် ဟွံကၠောန်ကဵုကွေံကွေံရပုဟ်၊ ဟီုအရေဝ်ဂှ်လေဝ် ကြံၚ်မ္ၚိုဟ်ဒၟံၚ်ညိညိရ၊ ကၠောန်ကဵု ဍိုန်န်ဍောတ်တ်ဂှ် ဟွံမွဲရပုဟ်၊ ဟီုအရေဝ်ဂှ်လေဝ် ဒှ်ကၠုၚ် မ္ၚိုဟ်ဟ်အိုတ်ရ” သာ်ဝွံ သ္ဂးရ။
သ္အာၚ်နူဂှ်ပၠန် နကဵုညးဍုၚ်ကွာန်တံ ပ္ဍဲကဵုရုၚ်ဂဥုဲ သၟဝ်တဲကံၚ်ဇြဳပၞာန်တံဂှ် ဟိုတ်နူဟွံဂွံအခေါၚ်လွဳလွတ် ဗီုကၠာတေံဂှ်ရ ယဝ်ရအာထ္ၜး ပ္ဍဲရုၚ်ဂဥုဲ ပုဂ္ဂလိကမ္ၚးတံမ္ဂးလေဝ် သၠုဲသၠာ်အိုတ် ဂၠိုၚ်ကဵုဆဂှ်ရ ဒးဆေၚ်ဒၟံၚ်မုက်ကဵု အခက်အခုဲနာနာသာ်ရ။
ရုၚ်ဂဥုဲ သၟဝ်တဲကံၚ်ဇြဳပၞာန်တံဝွံ ဒုၚ်တဲလွဳကဵုလဝ် မၞိဟ်ယဲတံ လွာဲဂှ် ဗီုကၠာတေံဟွံမွဲဂှ်ရ နကဵုညးဍုၚ်ကွာန်တံ ဟွံဂွံဒုၚ်လွဳ ဗွဲမဂတာပ်အခိၚ်ဂှ်ရ ဟွံထေက်ကဵုချိုတ်မွဲသာ် ဒးချိုတ်အာတံလေဝ် နွံဒၟံၚ်ရောၚ်ဂှ် သ္ဂးရ။
မွဲလ္ပာ်ပၠန်ဂှ် ကံၚ်ဇြဳပၞာန်ဝွံ ဗက်ရပ်ဒက်ဒၟံၚ် အ္စာဂဥုဲ CDM တံကဵု အ္စာဗြဴတံ နွံဒၟံၚ်တုဲ ညံၚ်ဂွိုအ်ခါန်ကၞက် ညးဒုၚ်ကာပရေၚ်ထတ်ယုက် CDM တံ ပ္ဍဲရုၚ်ဂဥုဲပုဂ္ဂလိကမ္ၚးတံဂှ်လေ၁် ပွမကဵုဇြဟတ်ဂရိုဟ်ဘပဠတံဂှ် ကၠောန်ဒၟံၚ် အဆက်က်ရ။
ပရိုၚ်−သြၚ်လောန်တိုၚ်(မ်)