ပဠဝ်၊ ဂျာန္နဝါရဳ(၂၀)
ကွာန်ယှာတ်ပုမ်၊ ပွိုၚ်ဍုၚ်ပဠဝ်၊ ရးဒေသဇၞော်တၞၚ်သဳဂှ် ပ္ဍဲဂိတုဂျာန္နဝါရဳ စၟတ်တ္ၚဲ (၁၉) စနူအခိၚ်နူဂယး တုဲ ဒပ်ကံၚ်ဇြဳပၞာန် စံၚ်ပလီုဒၟံၚ်ရဂှ် ညးဒေသဂမၠိုၚ် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
တုဲကၠုၚ်မွဲၜါတ္ၚဲဏံ ပ္ဍဲကွာန်ယှာတ်ပုမ်ဂှ် ကြဴနူပေါဲဗတိုက် အကြာကံၚ်ဇြဳပၞာန်ကဵု ဒပ်ပရေၚ်စဵုဒၞာဒေသတအ်က္တဵုဒှ်လဝ်တုဲ ဒပ်ကံၚ်ဇြဳပၞာန် ဇြဟတ်ဂၠိုၚ်တိုန်ကၠုၚ်ဒၟံၚ်ဂှ် တ္ၚဲဏံ စစံၚ်ပလီုကၠုၚ် သ္ၚိဒၟံၚ်မၞိဟ်ဟွံမံၚ်တန်တဴ အရာပ်တၞုၚ်ကွာန်ဂှ်ရ။
ဟိုတ်နူဒပ်ကံၚ်ဇြဳပၞာန် စံၚ်ပလီုလဝ်တုဲ ပြဟ်ဟ်ဏံ သ္ၚိဒၟံၚ်(၉) မ တူပၟတ်လီုလာ်လဝ်ဂှ်ရ ညးဒေသတအ်လေဝ် ဒးဂြိပ်ဒဴဒၟံၚ် ပ္ဍဲကၠအ် ကေုာံဒၞာဲဌာန်ဗၠးဘဲတအ်ရဂှ် ဂွံတီကေတ်ရ။
အတိုၚ်ညးဒေသတအ် ဟီုဂးလဝ်မ္ဂး ဒပ်ကံၚ်ဇြဳပၞာန်ဂှ် ပေါဲဗတိုက်ဟၟဲမွဲသာ် စံၚ်ပလီုဒၟံၚ်သ္ၚိဒၟံၚ်ညးဒေသဂြိပ်ဒဴအာတအ်ဂှ်ကီု စဵုကဵုလၟုဟ်ဏံလေဝ် ဖျေံလဝ်ဗ္ဒပ် ပ္ဍဲကွာန်ယှာတ်ပုမ်ရဂှ် ဟီုသ္ဂးလဝ်ရ။
ပ္ဍဲဂိတုဂျာန္နဝါရဳ တုဲကၠုၚ် စၟတ်တ္ၚဲ (၁၆)ဂှ် ဂကောံကံၚ်ဇြဳပၞာန်ကဵု ပျူသဝ်ထဳ ဖျေံလဝ်ဗ္ဒပ် ပ္ဍဲကွာန်ယှာတ်ပုမ်ဂှ် ဒးဒုၚ်ဗတိုက်လဝ်တုဲ (၄)တၠ ဒးချိုတ်လဝ်ကီု လွဟ်လက်နက် ကေုာံကပေါတ်ဆက်စပ်လ္ၚဵုတအ်ဂှ် ဂကောံပရေၚ်စဵုဒၞာညးဍုၚ်ကွာန်ဒေသတအ် သီဂွံလဝ်ရ။
တ္ၚဲဏံ ပ္ဍဲအခိၚ်နူဂယးဂှ်လေဝ် ဒပ်ကံၚ်ဇြဳ ထ္ပက်ကၠုၚ်ကရောၚ်ပၞာန် ကွာန်တိုဝ်ဘေတ် ဍုၚ်ပဠ ပွိုၚ်ဍုၚ်ပဠဝ်ဂှ် ဒပ်ပရေၚ်စဵုဒၞာဒေသပံၚ်ကောံတအ် တံၚ်ခတိုဟ် ဗတိုက်လဝ်နကဵုမာၚ်တုဲ အကာဲအရာဇီုကပိုက်ချိုတ်ဂျိုၚ်လဝ်ဂှ် ဆက်ဂၠိုက်ဂၠာဲ ပကောံပကေဝ်ဒၟံၚ်ရဂှ် ညးတာလျိုၚ်လလောၚ်ပရိုၚ် တံဒပ်လၟိဟ်(၁) ခရိုၚ်ဗိက် ဟီုသ္ဂးလဝ်ရ။
ပ္ဍဲပွိုၚ်ဍုၚ်ပဠဝ်၊ ရးဒေသဇၞော်တၞၚ်သဳဂှ် စတမ်နူ ဂိတုဂျာန္နဝါရဳ သတ္တာဟပဌမတုဲ ပရေၚ်ပၞာန် အကြာဒပ်ကံၚ်ဇြဳကဵု ဒပ်ပရေၚ်စဵုဒၞာတအ် ၜါလ္ပာ်ကြံၚ်မ္ၚိုဟ်တိုန်ကၠုၚ်ဒၟံၚ်တုဲ ခြာဟွံလအ်ဟွံလအ် ပေါဲဗတိုက်ဇီုဓဗတ်တအ် ဆက်က္တဵုဒှ်ဒၟံၚ်ရ။
ပရိုၚ်-သြၚ်လောန်တိုၚ်(မ်)