မေန်ဗူ-ဂျာန္နဝါရဳ(၂၀)
ဟွံမိက်ကဵုဒှ် ဗီုအကာဲအရာ ကံၚ်ဇြဳပၞာန်ပန်ပှ်ောညးဍုၚ်ကွာန် ညံၚ်ပ္ဍဲကျာ်ဣသိယဵုဂှ်တုဲ သွက်ဟွံဂွံအာ သ္ဘၚ်ကျာ်မာန်ယှိုဲသေတ်တဝ်ဂှ် ဒပ်ရပ်လွဟ်ဖျေံသ္ဇိုၚ်ရးမဂွေ PRA Magway ကဵုကၠုၚ်လဝ်သတိ ကုညးဍုၚ်ကွာန်တအ်ရ။
ပ္ဍဲဂိတုဂျာန္နဝါရဳ ကၠုၚ်စိုပ်ပ် စတမ်နူ စၟတ်တ္ၚဲ (၁၅) စဵုကဵုစိုပ်ဂိတုဨဗြဴ ကၠောန်ဗဒှ်အာ ပေါဲသ္ဘၚ်ကျာ်မာန်ယှိုဲသေတ်တဝ် ကဵုဂိတုရောၚ်ဂှ် ကံၚ်ဇြဳပၞာန် လလောၚ်တြးလဝ်တုဲ သွက်ညးဍုၚ်ကွာန်တအ် ဂွံသ္ပသတိကဵု ပရေၚ်ဂီုကၠီုဂှ် PRA Magway ကဵုလဝ်သတိရ။
“အတိုၚ်ပရေၚ်ပၞာန်တှ်ေ ခရိုၚ်မေန်ဗူဂှ် ဒှ်ဒၞာဲပရေၚ်ကၠောန်ပ္တိတ်လွဟ်ကီု သီုပရေၚ်ထံက်ပလံၚ်စကစ ပၟိက်ကိစ္စဇၞော်တုဲ ခြာဟွံလအ်ဏံ ဂကောံဇြဟတ်ပရေၚ်ပၠန်ဂတးတအ် ပြေၚ်ကၠုၚ်ပၞာန်မာန်ဒၟံၚ်ဏောၚ် ဣဏံဂှ် ဂုဏ်နူစကစတအ် တီလဝ်တုဲ ကၠောန်ဗဒှ်သ္ဘၚ်ကျာ်ဂှ် ဒှ်ပရေၚ်စဵုဒၞာဍေံတအ်ရ” ဂှ် ဥက္ကဋ္ဌ PRA Magway ကိုဝ်နေမန် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
သ္အာၚ်နူဂှ်ပၠန်ကံၚ်ဇြဳပၞာန် ကေတ်ပရေၚ်စဵုဒၞာကဵု ညးဍုၚ်ကွာန်တအ်တုဲ သုၚ်စောဲကၠုၚ် နဒဒှ်ဒေၚ်ဒၞာဒုၚ်မာန်ဒၟံၚ်ဂှ်ရ ၜိုန်မိက်ဂွံကဵု ညးဍုၚ်ကွာန်တအ် မိပ်မြဟ်ကီုလေဝ် သွက်ဂွံစွံသတိကဵု ပရေၚ်ဂီုကၠီု နွံဒၟံၚ်ပၟိက်ရောၚ်ဂှ် ညးဟီုဂးလဝ်ဏီရ။
ပ္ဍဲသ္ဘၚ်ကျာ်မာန်ယှိုဲသေတ်တဝ်ဂှ် ကံၚ်ဇြဳပၞာန်ဂွံဒၟံၚ်သြန် နူကမၠောန်ဗ္ဒမ်ဇူဒီု ကေုာံဆေၚ်စသုၚ်တအ်တုဲ ညံၚ်ဂွံဒှ်ဗီုပြၚ် ဍုၚ်ကွာန်ညိၚ်ဝတ်ဒၟံၚ်ဂှ် ကံၚ်ဇြဳပၞာန်ချပ်ကၠောန်သ္ပဒၟံၚ်ရဂှ် ညးဒေသဂမၠိုၚ် ဟီုသ္ဂးလဝ်ရ။
ပ္ဍဲသ္ဘၚ်ကျာ်မာန်ယှိုဲသေတ်တဝ်ဂှ် ကံၚ်ဇြဳပၞာန်သ္ပကဵုအာအခေါၚ် ဗ္ဒမ်ဇူဒီု ဗွိုၚ်(၁၀၀၀)ဗ္ဒမ် ကေုာံဆေၚ်ဖျာ ဗွိုၚ်(၅၀၀)ဖျာတုဲ ဗ္ဒမ်ဇူဒီု မွဲဗ္ဒမ်မ္ဂး ကံက်ကေတ်ဒၟံၚ်သြန် နူၜါလက်ဒကေဝ် စဵုကဵုမသုန်လက်ဒကေဝ်ရဂှ် လလောၚ်တြးလဝ်ရ။
နကဵုညးဍုၚ်ကွာန်တအ် ဇၟာပ်ပ်သၞာံ ၜိုန်ရအာစိုပ်ဒၟံၚ် ပေါဲသ္ဘၚ်ကျာ်မာန်ယှိုဲသေတ်တဝ်ကီုလေဝ် ပ္ဍဲသၞာံဏံဂှ် ပါဲနူပေါဲဗတိုက် ကံၚ်ဇြဳပၞာန်ကဵု ပ္ဍဲဒေသတအ်တုဲ ဟိုတ်နူပျူသဝ်ထဳ ကေုာံဂကောံတၞဟ် သၟဝ်တဲကံၚ်ဇြဳပၞာန် ပ္တဝ်လဝ်ကဵု ညးဍုၚ်ကွာန် ပြိုက်ဂစိုတ်ဒၟံၚ်တအ်တုဲ နဒဒှ်သွက်ဂွံသ္ပဂရုကဵု ပရေၚ်ဂီုကၠီုတုဲ ညံၚ်ဟွံဂွံအာဂှ် ဂကောံဇြဟတ်ပရေၚ်ပၠန်ဂတးတအ် အာတ်မိက်ကၠုၚ်လဝ်ရ။
“ဒှ်ကိစ္စ ဂကောံပၞာန် တက်ဒၟံၚ်ဗီု ပတောံ ညံၚ်ကဵုကၟိန်ဍုၚ်ပိုဲ ပြေပြံၚ်ဒၟံၚ်ရ။ သွက်ဂွံပြံၚ် အာရီုညးဍုၚ်ကွာန်တအ် ကၠေံဒၟံၚ်စိုတ် ပ္ဍဲပရေၚ်ပၠန်ဂတးတုဲ ပေါဲသ္ဘၚ်ပတောံတအ် ပေါဲပံက်မုမုတအ်ဂးတုဲ ဗက်ဂၠာဲကၠောန်ဒၟံၚ် ကမၠောန်ကြီုစရ”ဂှ် ကိုဝ်ချေတ်ဝေန်မောၚ် နူကဵုကဝ်မတဳပေါဲဗတိုက်ညးဍုၚ်ကွာန် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
သ္အာၚ်နူဂှ်ပၠန် တၚ်ကမၠောန်ကံၚ်ဇြဳပၞာန် ကၠောန်သ္ပဒၟံၚ်တအ်ဂှ် ဒှ်ကမၠောန်ကၠောန်ဒၟံၚ် ညံၚ်အာရီုညးဍုၚ်ကွာန်တအ် ဂွံအောန်ယအ်စှ်ေအာ နူကဵုပရေၚ်ပၠန်ဂတးရဂှ် ညးဟီုသ္ဂးလဝ်ဏီရ။
ပ္ဍဲကၟိန်ဍုၚ်ဗၟာ ကြဴနူဒပ်ပၞာန်သီအဝဵုတုဲဂှ် ပ္ဍဲတိဍာ်ကောန်ဍုၚ်အရၚ်တအ်၊ ပ္ဍဲကဵုတိဍာ်ဇြဟတ်ပရေၚ်ပၠန်ဂးခိုဟ်ဒၟံၚ် ဗီုကဵုသေတ်ဂါၚ် ကေုာံမဂွေတအ်ဂှ် ကၠောန်သ္ပဒၟံၚ် ပရေၚ်ပြိုက်ဂစိုတ်ဒၟံၚ် မၞိဟ်ဂအုံဂအုံဗွဝ်ဝ်ကီု၊ ပရေၚ်ပန်ပှော်နကဵုက္ၜၚ်ကျာ ကေုာံပန်ပှော်ဖျေံ လွဟ်ဇၞော်တအ်ရ။
ပ္ဍဲဂိတုအံက်တဝ်ဗာ သၞာံတုဲကုုၚ်ဂှ် တွဵုရးဍုၚ်မန် ပ္ဍဲဗ္ဒပ်ကပေါဝ် တံဒဵုကျာ်ဣသိယဵုဂှ် ပရေၚ်ပန်ပှော်က္တဵုဒှ်လဝ်တုဲ ညးဗြဴလ္ၚောဝ်ကျာ် (၃)တၠ ဒးချိုတ်အာလဝ်တုဲ ဟွံအောန်နူ(၁၇)တၠ ဇီုကပိုက်ဂွံလဝ်ဘဲဝပ်ရ။
ပရိုၚ်-သြၚ်လောန်တိုၚ်(မ်)
ဗီုရု- CJ