မတ်မလီု၊ ဂျူလာၚ် (၂၂)
ဗွဲကြဴဒပ်ပၞာန်သီအဝဵုတုဲ ညးအဝဲဟွံခိုၚ်ကၠိုက်တံ ဟိုတ်နူအကြေပ်ဂြတ် ပရေၚ်ပိုန်ဒြပ်ဘဝမၞိဟ် မက္တဵုဒှ်ကၠုၚ်တံဂှ်တုဲ ထပ်ဒးဒုၚ်စသိုၚ်ဒၟံၚ် ပြသၞာပရေၚ်ပိုန်ဒြပ်ကဵု ပရေၚ်စသုၚ်မံၚ်စံၚ် သ္ၚိကၟိန်တံ ပရေံပရေံရဂှ် ညးမရီုဗၚ်ရေၚ်တၠုၚ်ကဵုဒၟံၚ် ပရေၚ်ညးအဝဲဟွံခိုၚ်ကၠိုက်တံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ညးအဝဲဟွံခိုၚ်ကၠိုက်တံဝွံ ဗွဲကြဴဒပ်ပၞာန်သီအဝဵုတုဲ ပွမဒးဒုၚ်ပ္တိတ်ထောံ နူကမၠောန်ကီု၊ ပါလုပ်အာ ပ္ဍဲကဵုလၟေၚ်ကမၠောန် မဒးဒုၚ်ဖအောန်ဖျေံ ညးဒုၚ်ကာဂမၠိုၚ်ကီု၊ သြန်လုပ်လၟေၚ်ၚ် ဟွံမွဲရဂှ်တုဲ ဒးဒုၚ်စသိုၚ်ဒၟံၚ် ပြသၞာပရေၚ်ထတ်ယုက်ကဵု ပရေၚ်စသုၚ်မံၚ်စံၚ် သ္ၚိကၟိန်တံ ဗွဲမလောန်ရ။
ညးအဝဲဟွံခိုၚ်ကၠိုက်တံဝွံ အခိၚ်မဆောံလေၚ်အာလဝ် အခေါၚ်အဝဵုကမၠောန်ကၟိတ်တံဂှ်ရ ထပ်ဒးဆေၚ်ဒၟံၚ်မုက်ကဵု အကာဲအရာၚုဟ်ဗၞိက်သၠုၚ်တိုန်ကၠုၚ် မွဲဆမွဲတာန်တံဂှ်တုဲ ပွမမၚ်မွဲကဵု ပရေၚ်ထတ်ယုက်တံလေဝ် ဟွံဂွံလဝ်အိုတ်ရဂှ် သ္ဂးရ။
စပ်ကဵုအကာဲအရာဏံတုဲ ညးမရီုဗၚ်ရေၚ်တၠုၚ်ကဵုဒၟံၚ် ပရေၚ်ညးအဝဲဟွံခိုၚ်ကၠိုက်မွဲတၠ ဟီုလဝ် ဗီုလၟုဟ်ရ။
“ပရေၚ်စသုၚ်မံၚ်စံၚ်ဗွိုက်လ္တက်တံကဵု ပရေၚ်ပိုန်ဒြပ် (၂) ဏံ အဓိကရဂှ် တီဟာ၊ အခေါၚ်အဝဵုကမၠောန်ကၟိတ် သွက် (၂) ဏံဂှ် လၟုဟ်တှ်ေ သွက်ညးအဝဲဟွံခိုၚ်ကၠိုက် ဟွံသေၚ်တံကီုဂှ် ကမၠောန်ကြေပ်ဂြတ်တုဲ သာဒှ်ကၠုၚ် ကမၠောန်ကၟိတ်ဟွံမွဲအိုတ်ဂှ်ရ မၞိဟ်ဟွံခိုၚ်ကၠိုက်တံဂှ် သာပရေံကၠုၚ်ဟဂှ်ရ၊ ပရေၚ်စသုၚ်မံၚ်စံၚ်ကဵု ပရေၚ်မၚ်မွဲပရေၚ်ထတ်ယုက်တံဂှ် သာတုဲ ပၟိက်ဇၞော်ရ၊ ကမၠောန်လ္ၚဵုတံ ကလေၚ်ကော်ဒၟံၚ်ကီုလေဝ် ညးဟွံခိုၚ်ကၠိုက်တံ ဟွံပါကၠုၚ်ပုဟ်၊ အေဗီုဏံတံရ၊ ညးအဝဲဟွံခိုၚ်ကၠိုက်တံဂှ် အတိုၚ်သၞောတ်တြေံ ဒးတုဲဒးပၠန်ရ” သာ်ဝွံ သ္ဂးရ။
အခိၚ်လၟုဟ် ညးအဝဲဟွံခိုၚ်ကၠိုက်တံဝွံ ဟိုတ်နူပြသၞာပရေၚ်ထတ်ယုက်ကဵု ပရေၚ်စသုၚ်မံၚ်စံၚ်သ္ၚိကၟိန်တံတုဲ ပွမဇီုကပိုက် စပ်ကဵုရုပ်ခန္ဓ၊ စိုတ်တံ နွံကၠုၚ်တုဲ သီုကဵု ဒးဒုၚ်စသိုၚ်ဒၟံၚ် စၞအာဟာရ ဟွံဍိုက်ပေၚ်တံရ။
ဟိုတ်ဂှ်ရ နကဵုညးဍုၚ်ကွာန်တံ ၜိုတ်သ္ပမာန်ကဵုမာန် သွက်ဂွံပါလုပ်ရီုဗၚ်ကဵု ညးအဝဲဟွံခိုၚ်ကၠိုက်တံဂှ် ညးမရီုဗၚ်ရေၚ်တၠုၚ်ကဵုဒၟံၚ် သွက်ပရေၚ်ညးဟွံခိုၚ်ကၠိုက်တံ ဖ္တိုက်ဖ္အောဝ်လဝ်ရ။
မွဲလ္ပာ်ဂှ်ပၠန် ညးအဝဲဟွံခိုၚ်ကၠိုက်တံဝွံ ဗွဲကြဴဒပ်ပၞာန်သီအဝဵုတုဲ ဒးဆောံလေၚ်ကၠုၚ် အခေါၚ်အရာဗ္ဒါဲကြပ်ဖအိုတ်တုဲ ပ္ဍဲအရာမအာ အာတ်ပ္တိုန်ကမၠောန်တံဂှ်လေဝ် ဒးဒုၚ်ပါဲကၠေံ လၞုက်သ္ကုတ်ထောံဒၟံၚ်ရ။
ပ္ဍဲကၟိန်ဍုၚ်ဗၟာဂှ် အတိုၚ်စရၚ်လၟိဟ်မၞိဟ် သၞာံ ၂၀၁၉ ဂှ်မ္ဂး လၟိဟ်မၞိဟ်ကၟိန်ဍုၚ် ဗဒါဲ (၁၃) တၟံကၠံဂှ်ဝွံ ဒှ်ညးဟွံခိုၚ်ကၠိုက်တံရောၚ်ဂှ် ထ္မံက်ထ္ၜးလဝ်ရ။
ပရိုၚ်−သြၚ်လောန်တိုၚ်(မ်)