ဗာလေန် – ဂျာန္နဝါရဳ(၂၀)
အမေရိကာန်ဂှ် ယဝ်ရတုပ်စိုတ် သွက်ဂွံဗလးဏာ ကွဳစက်ခြပ်ပသဲညးတအ်ပိုၚ်ပြဳလဝ်မ္ဂး သွက်ဂွံကဵုရီုဗၚ် ကၟိန်ဍုၚ်ယူကရုၚ်ဂှ် ဗလးဏာကဵုကွဳစက်ခြပ်ပသဲ ဂျာမာန်ကၠောန်ကီုဏောၚ်ဂှ် တမ်ရိုဟ်တၚ်ဂၞၚ်ပရိုၚ် အလဵုအသဳဂျာမာန်ဂှ် ဟီုကဵု ဌာန်ပရိုၚ်ရိုက်တာရ။
အဓိပတိဂျာမာန် အိုဝ်လေဖ်စကအ်ဂှ် စပ်ကဵုတၚ်ပျးဌာန် ဟွံဓမံက်ယၟု ပ္ဍဲအခိၚ်တုဲကၠုၚ်လဝ် ဟွံလံဏံဂှ်တုဲ ဟီုသ္ဂးဒၟံၚ် ပ္ဍဲလပါ်လကြဴဂၠိုၚ်ၚ်ကဵုအလန်ရဂှ် တမ်ရိုဟ်တၚ်ဂၞၚ်ပရိုၚ်ဂှ် ဟီုသ္ဂးလဝ်ရ။
သွက်ဂွံထပ်ကဵု လွဟ်လက်နက် သွက်ကၟိန်ဍုၚ်ယူကရုၚ်ဂှ် က္ဍိုပ်သ္ကိုပ်မဟာမိတ် ကၟိန်ဍုၚ်ပလိုတ်ဂမၠိုၚ် ဆဵုဂဗအာ ပ္ဍဲဗ္ဒပ်ပၞာန်ကျာ ဖျေံသ္ဇိုၚ်ဂျာမနဳရောၚ်ဂှ် ဂွံတီကေတ်လဝ်ရ။
ကၟိန်ဍုၚ်ဂျာမနဳဂှ် စပ်ကဵုတၚ်သ္ဂုတ်သွာတ် သွက်ဂွံဗလးဏာကွဳစက်ခြပ်ပသဲ Leopard ညးတအ် သွက်ယူကရုၚ် မထေက်ကြိုက်အိုတ်ဂှ်တုဲ သ္ပဒၟံၚ်အာရီု ဗွဲတၟေၚ်ရ။
သမ္မတပိုဝ်လာန်လေဝ် ကုညးမတိုန်စိုပ်ကၠုၚ် ပ္ဍဲကဵုဖိုဝ်ရာမ်ပရေၚ်ပိုန်ဒြပ် မကၠောန်ဗဒှ်လဝ် ပ္ဍဲကၟိန်ဍုၚ်ဇြောတ်သလာန်တအ်ဂှ် ဒၟာနူဂွိၚ်ဖေက်ကၠောန်ကၠုၚ်ပရေၚ်ထ္ပက်ပၞာန်တၟိ ပ္ဍဲဍုၚ်ယူကရုၚ်တုဲ သွက်ဂွံဗ္ဂပ်ကဵု ကွဳစက်ခြပ်ဂတာပ်ခေတ် ကေုာံကမ်လှောဝ်တအ် ပၟိက်ဇၞော်ဒၟံၚ်ရဂှ် ဗတိုက်ဖ္အောဝ်လဝ်ရ။
ဖေန်လာန်ကဵု ပိုဝ်လာန်တအ်လေဝ် ယဝ်ရဂျာမနဳကဵုအခေါၚ်မ္ဂး ဖ္အောဝ်ဗလးဏာကဵု ကွဳစက်ခြပ်ပသဲ Leopard ဏောၚ်ဂှ် ဟီုသ္ဂးလဝ်တုဲ တၚ်သ္ဂုတ်သွာတ်ဏံဂှ် ဒှ်ကၠုၚ်တၚ်သ္ဂုတ်သွာတ် ပဌမကိုပ်ကၠာ ပ္ဍဲအစဳဇန် ဘိုဝ်ရေစ်ပေစ်သတိုဝ်ရာပ်စ် ဝန်ဇၞော်ပရေၚ်စဵုဒၞာဂျာမာန်တၟိဂှ်ရ။
ဝန်ဇၞော်ပရေၚ်စဵုဒၞာဂျာမာန်ဂှ် ပ္ဍဲဂိတုဂျာန္နဝါရဳ စၟတ်တ္ၚဲ(၁၉) သွက်ဂွံဒုၚ်တဲဆဵုဂဗကဵု ဝန်ဇၞော်ပရေၚ်စဵုဒၞာအမေရိကာန် လွိုက်အဝ်သတေန် နွံဒၟံၚ်ရောၚ်ဂှ် ဂွံတီကေတ်ရ။
ကၟိန်ဍုၚ်အမေရိကာန်ဂှ် သွက်ယူကရုၚ် ဂွံဒုၚ်တဝ်စၞေဟ် ပ္ဍဲလတူဒပ်ပၞာန်ရုယှာဂှ် ကဵုလဝ်ကတိပါၚ် သွက်ဂွံအပ်ပြာပ်ကဵု သြန်ဒဝ်ဠာအမေရိကာန် (၂၄) ဗဳလျာန်ရ။
အတိုၚ်လဟီုသၞာဲဒဴအမေရိကာန် ဟွံမိက်ဓမံက်ယၟုမွဲတၠ ဟီုဂးလဝ်မ္ဂး ဂကောံအလဵုအသဳသမ္မတဗိုၚ်ဒေန်ဂှ် သွက်ကၟိန်ဍုၚ်ယူကရုၚ် ပ္ဍဲသၞာံကၠုၚ်စိုပ်ဂတဏံ ၜိုန်ရစၟဳလဝ် သွက်ဂွံသ္ပကဵုအခေါၚ် ယာဉ်ကွဳစက်ခြပ် Stryker ကီုလေဝ် သွက်ဂွံကဵုအာ ကွဳစက်ခြပ်တၞဟ် မပါလုပ်သီု ကွဳစက်ခြပ် M1 Abrams တအ်ဂှ် ဟွံဒှ်ဒတုဲဏီရဂှ် ဟီုသ္ဂးလဝ်ကဵု ဌာန်ပရိုၚ်ရိုက်တာရ။
Ref,Reuters