မတ်မလီု – ဂျာန္နဝါရဳ(၂၀)
ပ္ဍဲ (CDM) ပရေၚ်ချဳဒရာၚ်ဒစဵုဒစးပၠန်ဂတးအဝဵု မဒှ်ဇြဟတ်ဓရိုဟ်အဓိကပၠန်ဂတးက္ညၚ်ဂှ် သွက်သ္ဇိုၚ်ဝန် ဌာနအလဵုအသဳစုၚ်ဇဳ ဂွံပါလုပ်ကၠုၚ်ဂှ် ပရေၚ်ဆဝ်ပ္ၚုဟ်တအ် နွံကၠုၚ်ဗွဲမဂၠိုၚ်ဂၠေၚ်ရ။
ယဝ်ရသ္ဇိုၚ်ဝန်အလဵုအသဳဂမၠိုၚ် နုက်တိတ်နူကမၠောန်မ္ဂး ဒေါံတန်ကဵု ယန္တရာပရေၚ်အုပ်ဓုပ် ကံၚ်ဇြဳပၞာန်မာန်ရောၚ်ဂှ် နကဵုတၚ်ပတှ်ေဏံ NUG ထံက်ပၚ်ကဵုအာသြန် ကုသ္ဇိုၚ်ဝန်အလဵုအသဳ ပါလုပ် ပ္ဍဲပရေၚ်ချဳဒရာၚ် CDM ရောၚ်ဂှ် ပရေၚ်ဟီုဂးလဝ် နွံကၠုၚ်ဒၟံၚ်ရ။
အခိၚ်လၟုဟ်ဏံ မွဲဒမြိပ် ပရေၚ်ပၠန်ဂတးက္ညၚ် ပြံၚ်သၠာဲကၠုၚ် နဒဒှ်ဗီုပြၚ် ပၠန်ဂတးရပ်လွဟ်ဗက်ဂှ် ပရေၚ်သ္ပဂရု ပ္ဍဲလတူ သ္ဇိုၚ်ဝန်ပၞာန် ဂွံစၞးတိတ်နူကမၠောန် သာတုဲဇြဟတ်ခိုဟ်ကၠုၚ်ဒၟံၚ်ရဂှ် ဂွံတီကေတ်ရ။
PDF တအ် ဗက်ပြိုက်ဂစိုတ်ဒၟံၚ် မၞိဟ်ဆက်ကၠောန်ဒၟံၚ်ကမၠောန်ရဂးတုဲ သွက်ဂွံသ္ပသတိ ကံၚ်ဇြဳပၞာန်ဂှ် သုၚ်စောဲကၠုၚ် နဲကဲပ္တိုန်ဒုဟ် နဒဒှ်လွဟ်လက်နက်မာန်ဂှ် ဂကောံသုတေသန ဉာဏ်လေန်တေတ် ဗတိုက်ဖ္အောဝ်လဝ်ရ။
ပ္ဍဲပရေၚ်ချဳဒရာၚ် ဒစဵုဒစးပၠန်ဂတးဟွံပ္ကီုပရာပ်ဂှ် အကွပ်မၞိဟ်စုၚ်ဇဳ နကဵုနဲကဲစုၚ်လေၚ် အတိုၚ်ပၟိက်ဆန္ဒဇကုဇကု ဒၟာနူပါလုပ်မာန်ဒၟံၚ်ဂှ်ရ ၜိုန်ရကၠောန်ဒၟံၚ် သၟဝ်တဲကံၚ်ဇြဳပၞာန်ကီုလေဝ် ညံၚ်ကမၠောန်ဂွံလဇုဲလဇ ပွမကၠောန်ရေၚ်တၠုၚ်ကီု၊ ညံၚ်ဂွံဒေါံဒေၚ်အာ ပွမကၠောန်သ္ပကီုဂှ် ပါလုပ်ဒၟံၚ် ပ္ဍဲပရေၚ်ထံက်ပၚ် ဂကောံဇြဟတ်ပရေၚ်ပၠန်ဂတးဏောၚ် ဝိုတ်ထောံဟွံဂွံရဂှ်လေဝ် ဟီုသ္ဂးလဝ်ရ။
မွဲလပါ်ပၠန်လေဝ် ပ္ဍဲပရေၚ်ပၠန်ဂတးက္ညၚ်ဂှ် ပရေၚ်ညးပါလုပ်ဒၟံၚ် နဒဒှ်သတ်ပညောန်နွံဒၟံၚ်ဂှ်လေဝ် ဝိုတ်ထောံ ဂွံဟွံသေၚ်တုဲ ပ္ဍဲ Zoom Meeting ဝန်ဇၞော်ကံၚ်ဇြဳပၞာန် ဒဝ်တေတ်တေတ်ခိုၚ် ဂှ်မ္ဂး “ဆလအ်ဟွံကဵုအခေါၚ်အုပ်ဓုပ်ပုဟ်” ဂးတုဲ ပရေၚ်ချဳဒရာၚ် လုပ်စိုပ်ထ္ၜးလဝ်ဆန္ဒတအ်လေဝ် နွံကၠုၚ်လဝ်ရ။
ကောန်ပၞာန်တအ် ယဝ်ရတိတ်အာနူဒပ်ပၞာန်မ္ဂး ကဵုပရေၚ်ထံက်ပၚ်သြန်ဏောၚ်ဂးတုဲ ပရေၚ်လလောၚ်တြးလဝ် နွံကၠုၚ်ဒၟံၚ်ကီု ယဝ်ရလုပ်စိုပ်ဖျေံလွဟ် သီုလွဟ်မ္ဂး၊ ပလီုပလာ်မပ္တံကွဳစက်ခြပ်ပသဲ က္ၜၚ်ကျာတအ်တုဲ ယဝ်လုပ်ဖျေံလွဟ်မ္ဂး ထံက်ပၚ်ကဵုသြန် ကေုာံပရေၚ်ဂီုကၠီုဏောၚ်ဂးတုဲ အလဵုအသဳပၠန်ဂတးလလောၚ်တြးကၠုၚ်လဝ် နွံရ။
လိက်စံၚ်ဂကောံသုတေသန ဉာဏ်လေန်တေတ် အခန်ကဏ္ဍဂကောံဇြဟတ်တၞံပရေၚ်ပၠန်ဂတး ပ္ဍဲပရေၚ်ချဳဒရာၚ်ဒစဵုဒစးပၠန်ဂတးအဝဵု ဟွံပ္ကီုပရာပ် နကဵုဘာသာဗၟာဂှ် https://bit.ly/3ZGrzS2 ဘာသာအေၚ်္ဂလိက်ဂှ် https://bit.ly/3iQFKTR ၜါဘာသာဒံၚ်လံက်ကေတ် ဗှ်လ္ၚတ်ကေတ်မာန်ရဂှ် ဂွံတီကေတ်ရ။
ပရိုၚ် – သြၚ်လောန်တိုၚ်(မ်)