ညံၚ်လေဝ်ပေန်၊ ဂျာန္နဝါရဳ (၂၁)
ပ္ဍဲခရိုၚ်ညံၚ်လေဝ်ပေန် တိဍာ်ထိၚ်ဒဝ် ဒပ်မဟာ (၃) ဗော်သွးကောန်ဂကူကရေၚ် KNU ဂှ် နူဂိတုဂျာန္နဝါရဳ (၁) စဵုကဵု ဂိတုဂျာန္နဝါရဳ (၁၅) အပ္ဍဲကပါ်ဂိတုဂှ် အကြာဒပ်ကံၚ်ဇြဳပၞာန် ကဵု KNLA, KNDO တံဂှ် ပေါဲဗ္တိုက်အပံၚ် (၅၅) ဝါ က္တဵုဒှ်လဝ်ရောၚ် KNU လလောၚ်ပ္တိတ်လဝ်ရ။
အပ္ဍဲပွိုၚ်ကပါ်ဂိတုဏံဂှ် အကြာဒပ်ပၞာန်ဗၠးၜးကောန်ဂကူကရေၚ် (KNLA) ၊ ဂကောံဒပ်စဵုဒၞါကောန်ဂကူကရေၚ် (KNDO) ၊ ဂကောံဒပ် Federal Wings Drone သၟဝ်တဲတံ ကေုာံ ဒပ်ကံၚ်ဇြဳပၞာန်တံဂှ် ပေါဲဗ္တိုက်တံ က္တဵုဒှ်လဝ် အရိုဟ်ဒဒှ်တ္ၚဲတုဲ ဂကောံဒပ် Federal Wings Drone ဂှ်လေဝ် ကၠောန်သ္ပလဝ်ပရေၚ်ဗ္တိုက် နူကဵုဂၠးအကးဂှ် အပံၚ်ဗၞတ် (၁၄) ဝါရ။
အပ္ဍဲပေါဲဗ္တိုက်တံဏံဂှ် သီုကဵုပါလုပ် ဒုသ္ကိုပ်တမ်ဒပ် ဒပ်ကံၚ်ဇြဳပၞာန် (၁) တၠဂှ် (၄၇) တၠ ချိုတ်အာလဝ်တုဲ (၁၉) တၠ ဇီုကပိုက်ဂွံလဝ်ဝပ်တုဲ ပရေၚ်ဇီုကပိုက်ချိုတ်ဂျိုၚ် သ္ပဒတန်ဟွံမာန်တံလေဝ် နွံဒၟံၚ်ဏီဂှ် ထ္မံက်ထ္ၜးလဝ် ပ္ဍဲတၚ်လလောၚ်တြး KNU ဂှ်ရ။
သ္အာၚ်နူဂှ်ပၠန် နူကဵုဒပ်ပၞာန်ဗၠးၜးကောန်ဂကူကရေၚ် (KNLA) ၊ ဒပ်စဵုဒၞါကောန်ဂကူကရေၚ် (KNDO) ဂှ် သၠးဏာလမျီု သွက်ဍုၚ် သွက်ဂကူဂှ် (၂) တၠတုဲ (၂) တၠ ဇီုကပိုက်ဂွံလဝ်ဝပ်ရောၚ်ဂှ် သ္ဂးရ။
အပ္ဍဲပေါဲဗ္တိုက် မက္တဵုဒှ်ဒၟံၚ် ကြပ်အရိုဟ်ဒဒှ်တ္ၚဲတံဂှ် ဒပ်ကံၚ်ဇြဳပၞာန် ဟိုတ်နူပန်ပှော်လဝ် လွဟ်လက်နက် အပ္ဍဲကွာန်ဂမၠိုၚ် ဒၞါဲညးဍုၚ်ကွာန်တံ မမံၚ်တန်တဴတံ နကဵုတၚ်ရန်တၟံနွံနွံဂှ်ရ ဒတုံဗ္တိုဟ်ထ္ကးအာလဝ် အပ္ဍဲညံၚ်လေဝ်ပေန်၊ ကျံက်ကျဳ ကေုာံ အပ္ဍဲပွိုၚ်ဍုၚ်မုၚ်တံရ။
ဟိုတ်နူပရေၚ်ပန်ပှော်လွဟ်ဇၞော် နူကဵုဒပ်ကံၚ်ဇြဳပၞာန်တံဂှ်တုဲ ညးဗြဴမွဲတၠ ကလိဂွံလဝ်ဝပ်တုဲ ညးဍုၚ်ကွာန်မှာဇန် အပံၚ် (၅၀၀၀) ပြၚ်ဝွံ ဒးဂြိပ်ဒဴပါဲဒလေတ်ဒၟံၚ် ဒၞါဲဗၠးဘဲတံရောၚ်ဂှ် ဂွံတီကေတ် အတိုၚ်တၚ်လလောၚ်တြး KNU ဝွံရ။
ပရိုၚ်−သြၚ်လောန်တိုၚ်(မ်)