ဇြပ်ဗု၊ ဂျာန္နဝါရဳ (၂၁)
ကြဴနူဗ္ဒိုပ်ဗၠာဲသၟိၚ်တိဍာ်ကွာန်ပြဳ ကံၚ်ဇြဳပၞာန် မၞုံကွာန်ပြဳ ပွိုၚ်ဍုၚ်ဇြပ်ဗု တွဵုရးဍုၚ်မန် ဒးဒုၚ်ဗ္တိုက်တုဲ ပ္ဍဲဂိတုဂျာန္နဝါရဳ (၁၉) ဂှ် ကောန်ဂကောံဒပ်ဗၠာဲသၟိၚ်တံ စ္ဍးတိတ်အာအိုတ်ယျဂှ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ဗ္ဒိုပ်ဗၠာဲသၟိၚ်ကွာန်ပြဳ ကောန်ဂကောံဒပ်ဗၠာဲသၟိၚ် ဗၞတ် (၁၀) တၠ မမံၚ်တန်တဴဒၟံၚ်ဂှ် ပ္ဍဲဂိတုဂျာန္နဝါရဳ (၁၈) ၜိုတ်ပယျာံဂယး ဗၞတ် (၆) နာဍဳကဝိုက်ဂှ် ဂကောံဒပ်ဒမၠက်ဍုၚ်ရေဝ် ကေုာံ ဒပ်ပံၚ်ကောံ PDF တံ အာစိုပ်ဗ္တိုက်လဝ်ရ။
ကြဴနူပရေၚ်ဗ္တိုက်ဏံတုဲဂှ် ကောန်ဂကောံဒပ်ဗၠာဲသၟိၚ် နူဗ္ဒိုပ်ဗၠာဲသၟိၚ် ကွာန်ပြဳတံ စ္ဍးတိတ်အာ နူဗ္ဒိုပ်ဂှ်တုဲ ကၠုၚ်စိုပ်ပံၚ်တောဲလဝ်ကဵု ဗ္ဒိုပ်ဗၠာဲသၟိၚ်ၝောံဍုၚ်ဇြပ်ဗုဂှ် ဂွံတီကေတ်ရ။
အတိုၚ်ဂလာန်ညးဒေသတံဂှ်မ္ဂး ပ္ဍဲဗ္ဒိုပ်ဗၠာဲသၟိၚ်ကွာန်ပြဳဂှ် ကောန်ဂကောံဒပ်ကံၚ်ဇြဳပၞာန်တံ ဟွံမွဲရကီုလေဝ် ပ္ဍဲကဵုပွဳပွူ ဗ္ဒါဲကွာန်ပြဳဂှ် ဒပ်ကံၚ်ဇြဳပၞာန်တံ ထ္ပက်ဒၟံၚ်ကရောၚ်ပၞာန်ရောၚ်ဂှ် ဟီုရ။
ပ္ဍဲပေါဲဗ္တိုက်ဗ္ဒိုပ်ဗၠာဲသၟိၚ်ကွာန်ပြဳဂှ် ကောန်ဂကောံဒပ်ဗၠာဲသၟိၚ် (၃) တၠ ချိုတ်တုဲ (၅) တၠ ကလိဂွံလဝ်ဝပ်ဂှ်ကီု ပရေၚ်ဗ္တိုက်ဂှ်ဝွံ ၜိုန်ရရန်တၟံလဝ် စဵုကဵုသ္ဂောံသီဗ္ဒိုပ်ကီုလေဝ် ဟိုတ်နူဗၞတ်ဗ္ၜတ်အခိၚ်တုဲ ဒးကလေၚ်ဆုတ်ကလေၚ်လဝ်ဂှ် ညးဒုၚ်တာလျိုၚ် ဂကောံဒပ်ဒမၠုက်ဍုၚ်ရေဝ် ဗိုလ်ယာန်နာၚ် ဟီုဂးလဝ်ကဵု ဌာန်ပရိုၚ်သြၚ်လောန်တိုၚ်(မ်) ရ။
ကောန်ဂကောံဒပ်ဗၠာဲသၟိၚ်တံ ဒဒှ်မစ္ဍးတိတ်အာ နူကဵုဗ္ဒိုပ်ဗၠာဲသၟိၚ်ကွာန်ပြဳဂှ်ဝွံ ပ္ဍဲတွဵုရးဍုၚ်မန်ဂှ် ကြဴနူဒပ်ပၞာန်သီအဝဵုတုဲ ဒှ်ကၠုၚ်ပရေၚ်ဒးဗလးတဲ ကုဗ္ဒိုပ်ဗၠာဲသၟိၚ် နူလ္ပာ်ဒပ်ကံၚ်ဇြဳပၞာန်တံ ကိုပ်ကၠာအိုတ်မွဲရ။
ပရိုၚ်−သြၚ်လောန်တိုၚ်(မ်)