သဓီု၊ ဂျာန္နဝါရဳ (၂၁)
အပ္ဍဲခရိုၚ်သဓီု တိဍာ်ထိၚ်ဒဝ် ဒပ်မဟာ (၁) ဗော်သွးကောန်ဂကူကရေၚ် KNU ဂှ် ကုညးမဂ္စါန်ရေၚ်တၠုၚ်ဒၟံၚ် သွက်ပေါဲရုဲမာဲ ကံၚ်ဇြဳပၞာန်တံ မကၠောန်ဗဒှ် ညံၚ်သ္ဂောံဒှ်တံဂှ် ကေတ်အာအရေဝ် ဗွဲမစိုပ်တရဴရောၚ် ခရိုၚ်သဓီု KNU ကဵုလဝ်သတိရ။
ကံၚ်ဇြဳပၞာန် သီအဝဵုဝွံ အပ္ဍဲသၞာံ ၂၀၂၃ ဏံ သွက်ဂွံကၠောန်ဗဒှ်ပေါဲရုဲမာဲဂှ် စနူဂိတုဂျာန္နဝါရဳ (၉) တုဲကၠုၚ်တေံတုဲ ပ္ဍဲကဵုပွိုၚ်ဍုၚ်ကျာ်ထဝ်၊ ပံၚ်၊ ၜါသွာၚ်၊ မတ်မလီု ကေုာံ ပွိုၚ်ဍုၚ်ကျာ်မြဟ် တွဵုရးဍုၚ်မန်တံဂှ် ဗက်ကံက်ဒၟံၚ် စရၚ်လၟိဟ်မၞိဟ်ဗလးတိတံရ။
ခရိုၚ်သဓီု KNU ဂှ် ပေါဲရုဲမာဲကံၚ်ဇြဳပၞာန် မကၠောန်ဗဒှ်ဂှ် ဒဒှ်ရဓဝ်ပတှ်ေဟွံမွဲလးလးဂှ်ကီု ကဵုအာအခေါၚ်ကၠောန်ပေါဲရုဲမာဲ ဟွံသေၚ်ပုဟ်ဂှ် လလောၚ်ပ္တိတ်လဝ်ရ။
ဟိုတ်ဂှ်ရ အပ္ဍဲခရိုၚ်သဓီု တိဍာ်ထိၚ်ဒဝ် KNU ဂှ် ကုမၞိဟ်မဂ္စါန်ဒၟံၚ် သွက်ပေါဲရုဲမာဲ ကံၚ်ဇြဳပၞာန်တံ မကၠောန်ဗဒှ် ညံၚ်သ္ဂောံဒှ်တံဂှ် ကေတ်အာအရေဝ် ဗွဲမစိုပ်တရဴရောၚ် ညးမၞုံအခေါၚ်ဟီုဂး ခရိုၚ်သဓီု KNU ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“တၚ်လလောၚ်တြး KNU ဗဟဵု လလောၚ်တြးလဝ် နွံဒၟံၚ်။ လလောၚ်တြးလဝ်ဂှ်တှ်ေ ပေါဲရုဲမာဲကံၚ်ဇြဳပၞာန် မကၠောန်ဗဒှ်ဂှ် ဟွံထံက်ဂလာန်ပုဟ်။ ကၠောန်ကၠုၚ်မ္ဂး ပ္ဍဲကဵုသၟဝ်ပၠတရဴ KNU ဗဟဵုဂှ်ရ ကေတ်အာအရေဝ် အတိုၚ်ဥပဒေဏောၚ်” သာ်ဝွံ သ္ဂးရ။
သ္အာၚ်နူဂှ်ပၠန် ကုညးမဂ္စါန်ဒၟံၚ် သွက်ပေါဲရုဲမာဲကံၚ်ဇြဳပၞာန် ညံၚ်သ္ဂောံဒှ် မဟွံကဵုလဝ်အခေါၚ်တံဂှ်လေဝ် ယဝ်ရလုပ်စိုပ်ၜက်ၜေတ်ကၠုၚ်တိဍာ်မ္ဂး ကေတ်အာအရေဝ် ရေၚ်တၠုၚ်အာ ဗွဲမသၟဟ်ကဵု သၞောဝ်ဥပဒေ ဗော်သွးကောန်ဂကူကရေၚ် KNU ရောၚ်ဂှ် သ္ဂးရ။
ပ္ဍဲပွိုၚ်ဍုၚ်ဘာအၚ် KNU ဂှ်လေဝ် ပေါဲရုဲမာဲ ညးဍုၚ်ကွာန်တံ ဟွံဒုၚ်တဲဂှ် ကဵုအာအခေါၚ်ကၠောန် ပ္ဍဲတိဍာ်ဇကုတံ ဟွံသေၚ်မွဲသာ် အကြာမတာဒၞါလဝ်ဂှ် ကုမၞိဟ်မဂ္စါန်ဒၟံၚ် ညံၚ်ပေါဲရုဲမာဲ ဂွံဒှ်တံဂှ် ထ္မံက်ပ္တိတ်တုဲ ကေတ်အာအရေဝ် ဗွဲမသ္ကာတ်မြဟ်ရောၚ် ပ္ဍဲဂိတုဂျာန္နဝါရဳ (၂၀) တေံ လလောၚ်ပ္တိတ်လဝ် လိက်ကဵုသတိရ။
ကံၚ်ဇြဳပၞာန်ဂှ် ပ္ဍဲအကာဲအရာပြဟ်ဟ်ဏံ ပ္ဍဲလ္တူဍုၚ်ဘာအၚ်၊ သဓီု၊ ၜဳကလေၚ်၊ ကျာ်ထဝ် မၞုံအပ္ဍဲခရိုၚ်သဓီု ကေုာံ ကွာန်ဂမၠိုၚ် မၞုံဗ္ဒါဲဗ္ဒါဲဍုၚ်တံဂှ် ကၠောန်ၜိုတ် ဗက်ကံက်ဒၟံၚ် စရၚ်လၟိဟ်မၞိဟ်ဗလးတိတံရ။
ဆ္ဂး ပ္ဍဲကဵုကွာန် အပ္ဍဲတိဍာ်ထိၚ်ဒဝ် ခရိုၚ်သဓီုတံဂှ် ပွမကံက်စရၚ်လၟိဟ်မၞိဟ်ဗလးတိတံ ဟွံမွဲဏီပုဟ်ဂှ် သ္ဂးရ။
တုဲကၠုၚ် ဂိတုဂျာန္နဝါရဳ (၁၃) တုဲကၠုၚ်တေံ သ္ကိုပ်အုပ်ဓုပ် ကွာန်ဒံၚ်သောန်၊ ပွိုၚ်ဍုၚ်သဓီု ဥူသဵုတုၚ် ကေုာံ တခဳဗြဴမွဲတၠ မကံက်ဒၟံၚ်စရၚ်လၟိဟ်မၞိဟ်တံဂှ် ဂကောံဒပ်စဵုဒၞါညးဍုၚ်ကွာန်ပွိုၚ်ဍုၚ်သဓီု (ပကဖ) တံ ပန်ပသောၚ်လဝ်ရ။
ပရိုၚ်−သြၚ်လောန်တိုၚ်(မ်)