ဝါလေန်တာန်၊ ဂျာန္နဝါရဳ (၂၁)
ကြဴနူကိစ္စ သ္ကိုပ်ဝန်ဇၞော်နျူဇြဳလာန် နုက်တိတ် က္တဵုဒှ်တုဲဂှ် သွက်ဂွံထ္ပက်အဇာ ဒၞါဲဂှ်မာန်ဂှ် ညးစၞးတံ ကၠောန်သ္ပလဝ် ပရေၚ်ကဵုမာဲသ္ဂုတ်သွာတ်မွဲရ။
Ardern (အာဒါန်) အာယုက် ၄၂ သၞာံဂှ် ညးဝွံ သွက်ဂွံဆက်သ္ကိုပ်သ္ကပၠတရဴ ဍုၚ်ဂှ် ဆန္ဒဟွံမွဲရပုဟ် ဟီုဂးလဝ်တုဲ ဟွံလဇုဲနူကဵု ဂိတုဂျာန္နဝါရဳ သ္ကုတ်ပြဟ်ဟ်တေံဂှ် နုက်တိတ်နူကဆံၚ်ဌာနန္တရတုဲ သွက်ဂွံကလေၚ်ဒုၚ်ရုဲစှ်ပၠန်ဂှ်လေဝ် ဒဒှ်ရဟွံပ္တိတ်ဇြဟတ်ဂ္စါန်ရပုဟ်ဂှ် ပ္ဍဲဂိတုဂျာန္နဝါရဳ (၁၉) တေံ ဟီုဂးလဝ်ရ။
ခရေဿဟာပ်ကေမ် ဝန်ဇၞော်အလဵုအသဳမွဲတၠလေဝ်ဒှ် မၞိဟ်လ္ပာ်ဒစဵုဒစးကဆံၚ်လ္တူ ညးလေဝ်ဒှ်ဂှ် အမာတ်ဗော်သၟာကမၠောန်တံ သွက်ဂွံကလိဂွံတၚ်တုပ်စိုတ် ကုအလံၚ်ညးစၞးတၟိမွဲတၠဂှ် စၟဳစလဝ်တုဲ နကဵုညး သ္ဂောံဒုၚ်ရုဲစှ် အစဳဇန်ဟွံမွဲပုဟ်ဂှ် ဟီုဂးလဝ်ရ။
“ပ္ဍဲပရေၚ်ဖျေံစၟတ် တၚ်သ္ဂုတ်သွာတ်တံဏံ သွက်ဒတုဲဖဵု ကောန်ဍုၚ်နျူဇြဳလာန်တံဂှ် သွက်ဂွံကၠောန် ညံၚ်ဂွံချိုတ်ပၠိုတ်ဂှ် ပ္ဍဲပိုယ်တံ တာလျိုၚ်နွံဒၟံၚ်ရောၚ်” သာ်ဝွံ ညးသ္ဂးရ။
အလံၚ်ညးစၞးမွဲတၠဝွံ ပ္ဍဲတ္ၚဲအဒိုတ်ကၠုၚ်စိုပ်ဏံ ယဝ်ရဟွံကလိဂွံ ပိဂအုံၜါဂအုံ ဆန္ဒမာဲ မပ္တိုန်လဝ်ဂလာန် သွက်သ္ကိုပ်ဝန်ဇၞော်လၟုဟ် သ္ဂောံဒေါအ်တာ နူတာလျိုၚ်ဂှ်မ္ဂး ပေါဲပြိုၚ်ပရေၚ်သ္ကိုပ်သ္ကပၠတရဴဏံဂှ်ဝွံ က္တဵုဒှ်အာ အကာဲအရာ မသာသၠဲလးမာန်ရောၚ်ဂှ်လေဝ် ဂွံတီကေတ်ရ။
ညးမကဵုတၚ်စၟတ်တံဂှ် ဟာပ်ကေမ်၊ ဝန်ဇၞော်ပရေၚ်ဍုၚ်ထတ်ယုက် မကေတ်လဝ်တာလျိုၚ်ကၠာတေံ ကေုာံ ဝန်ဇၞော်ဂကောံဒပ်ဗၠာဲသၟိၚ် ကေုာံ ပရေၚ်ပညာ လၟုဟ်၊ ဝန်ဇၞော်ပရေၚ်သၞောဝ်ဓဝ်လၟုဟ် ကဳရဳအေဝ်လာန်တံဝွံ သွက်အခန်ကဏ္ဍသ္ကိုပ်ဝန်ဇၞော်ဂှ် ဒှ်အလံၚ်ညးစၞး တၠုၚ်လအာမၞုံတံရောၚ်ဂှ် ထံက်ထ္ၜးလဝ်ရ။
Ardern (အာဒါန်) ဝွံ အပ္ဍဲပေါဲရုဲမာဲဂှ် သွက်ဂွံမံၚ်အကြာ ဒဒှ်ရရန်တၟံလဝ်ဂှ် တ္ၚဲသိုက်တေံ ဟီုဂးလဝ်ကဵု မဳဒဳယာတံရ။
“အရာပၟိက်ဇၞော်အိုတ်ဂှ်တှ်ေ ပိုယ်တံ သွက်ဂွံစွံအာရီုကဵု ကုလၟေၚ်ကမၠောန်တံရဏောၚ်။ မြက်ဇက်ပြဟ်ဒၟံၚ်ရ။ ညအ်ဂှ် သွက်ကောန်ဍုၚ်နျူဇြဳလာန်တံဂှ် သ္ပအာရီုကဵု ကုကိစ္စပၟိက်ဇၞော်တံဂှ်တုဲ သွက်သ္ဂောံပြံၚ်လှာဲ ဂကောံအလဵုအသဳ မြက်က်ဇက်က်ဂှ် ကဵုချိုတ်ပၠိုတ်တဴရ” သာ်ဝွံ ညး ဟီုလဝ်ရ။
သွက်တၚ်သ္ဂုတ်သွာတ် ဂွံနုက်တိတ်နူကဆံၚ်ဌာနန္တရဂှ် ပွမဂိုဟ်ဂဟောံ ဟွံမွဲပုဟ်ဂှ် ညး ဆက်ဟီုဂးလဝ်ရ။
နကဵုညးမဂွံဇၞးဂှ် ဒဵုကဵုကၠာပေါဲရုဲမာဲကၠုၚ်စိုပ်ဏံဂှ် ဂွံဒှ်ကၠုၚ် သ္ကိုပ်ဝန်ဇၞော်ရောၚ်တုဲ အာယုက်က္ဍိုပ်သ္ကိုပ် အာဒါန်ဂှ်ဝွံ ဟွံလဇုဲနူကဵု ဂိတုဖေဖဝ်ဝါရဳ စၟတ်တ္ၚဲ (၇) ဂှ် အိုတ်ရောၚ်မဒှ်တုဲ ပေါဲရုဲမာဲဂှ် ကၠောန်ဗဒှ်အာ ပ္ဍဲဂိတုအံက်တဝ်ဗာ (၁၄) တေံ မဒှ်ရ။
Ref: CNA