လှာဒကှ်၊ ဂျာန္နဝါရဳ(၂၁)
ဒပ်ကံၚ်ဇြဳ ထ္ပက်ကၠုၚ်ကရောၚ်ပၞာန် ပ္ဍဲပွိုၚ်ဍုၚ်လှာဒကှ် တိဍာ်ဗော်သွးကောန်ဂကူကရေၚ် KNU ဒပ်မဟာ(၆)ဂှ် စံၚ်ပလီုလဝ် စမြိုၚ်သ္ၚိဒၟံၚ်ကပေါတ်ကညောတ် ညးဍုၚ်ကွာန်တအ်တုဲ ကေတ်ဏာလဝ်ကယျိုၚ်ကယျဝ်ထဝ်သြန် ကေုာံကပေါတ်တအ်ရဂှ် ကရောၚ်ပၞာန်နာ်ဗ္ကေတ် မဒှ်ဂကောံပံၚ်တောဲ KNLA လလောၚ်တြးလဝ်ရ။
ပ္ဍဲဂိတုဂျာန္နဝါရဳ တုဲကၠုၚ် စၟတ်တ္ၚဲ(၄)ဂှ် ဂကောံပံၚ်တောဲ KNLA တအ် လုပ်စိုပ်ဗတိုက်လဝ် ဗ္ဒပ်ဌာန်ဂအုပ်တံဒပ် ကံၚ်ဇြဳပၞာန် မၞုံဗ္ဒာဲဍုၚ်လှာဒကှ်တုဲဂှ် ဒပ်ကံၚ်ဇြဳ ထ္ပက်ကၠုၚ်ကရောၚ်ပၞာန် ပ္ဍဲကွာန် မၞုံဗ္ဒာဲဍုၚ်လှာဒကှ်တအ်တုဲ ကၠောန်ကၠုၚ်ပရေၚ်ချဳဒရာၚ်ပၞာန်ဂှ်ရ ဇီုဓဗတ် ဒှ်ကၠုၚ်ပေါဲဗတိုက်ကဵု ဂကောံပံၚ်တောဲ KNLA တအ် အဆက်ဆက်ရ။
ဒပ်ကံၚ်ဇြဳ ထ္ပက်ကရောၚ်ပၞာန် လုပ်စိုပ်ကၠုၚ် ပ္ဍဲကွာန်တအ်ဗီုဏံဂှ် သုၚ်စောဲကၠုၚ် ကောန်ညးဍုၚ်ကွာန် (၃၀) တၠပြၚ် ပါလုပ်သီုကောန်ၚာ်သၟတ် မၞိဟ်အာယုက်ဇၞော်ဇၞော်တအ် နဒဒှ်ဒေၚ်ဒၞာဒုၚ်မၞိဟ် နူဂိတုဂျာန္နဝါရဳ စၟတ်တ္ၚဲ (၁၂) စဵုကဵုစိုပ် စၟတ်တ္ၚဲ (၁၆)တုဲ မၞိဟ်တြုံကောန်ညးဒေသ ဃောဒဳဒၟံၚ်ကွဳလိုန်ဓာတ်မွဲတၠဂှ်လေဝ် ပန်ဂစိုတ်လဝ်ရဂှ် ဓမံက်ထ္ၜးလဝ် ပ္ဍဲတၚ်လလောၚ်တြးဂှ်ရ။
ဒပ်ကံၚ်ဇြဳပၞာန် ကၠောန်သ္ပကၠုၚ် ပရေၚ်လုပ်စိုပ်ဒကဵုဂၟာဲ စံၚ်ပလီု သ္ၚိဒၟံၚ် ပ္ဍဲကွာန်တတာဥူ၊ ကွာန်တမေန်လေတ်၊ ကွာန်နာတ်ချောၚ် လ္ဒောဝ်၊ ကွာန်ကျိုဝ်ဝိုၚ်၊ ကွာန်မဳလောၚ်ချောၚ် ကေုာံကွာန်ကျခေတ်ချောၚ် မၞုံပ္ဍဲပွိုၚ်ဍုၚ်လှာဒကှ် ဗွဲမဂၠိုၚ်တုဲ ကေတ်ဏာလဝ် မပ္တံကဵုကယျိုၚ်ကယျဝ်ထဝ်သြန်၊ ကပေါတ်မပ္တမ်ကဵုဖုၚ် သီုသ္ၚု၊ တိရစ္ဆာန်လွဳလွတ်လဝ်တအ်ရဂှ် ဂွံတီကေတ် အတိုၚ်တၚ်လလောၚ်တြး ကရောၚ်ပၞာန်နာ်ဗ္ကေတ်ရ။
ပ္ဍဲခရိုၚ်ဒူပလာယာ တိဍာ်ဒပ်မဟာ(၆) ပွိုၚ်ဍုၚ်လှာဒကှ်ဂှ် ဒၟာနူပေါဲဗတိုက်သ္ကာတ်မြဟ် က္တဵုဒှ်ဒၟံၚ်တုဲ နကဵုကွဳစက်ပလံၚ်ညးအာတရဴဂမၠိုၚ် ညံၚ်ဟွံဂွံကၠောန်သ္ပ ပရေၚ်သုၚ်စောဲ တတ်အာကၠုၚ် ဂၠံၚ်လှာဒကှ်-ကျာ်ပိ ပတံနူ ဂိတုဂျာန္နဝါရဳ စၟတ်တ္ၚဲ (၁၆) စဵုကဵု စၟတ်တ္ၚဲ (၂၃) ပွိုၚ် (၈)တ္ၚဲဂှ် KNU ဒပ်မဟာ (၆) လလောၚ်တြးလဝ်ရ။
ဟိုတ်နူပေါဲဗတိုက်ဍုၚ်လှာဒကှ်တုဲ ညးဒေသ နူ(၂၀) ကွာန်ပြၚ် လၟိဟ်(၁၆၀၀၀) ပြၚ်တအ် ဒးဂြိပ်ဓလေတ်ပါဲဒၟံၚ် ပ္ဍဲဌာန်ဗၠးဘဲရဂှ်လေဝ် ဂွံတီကေတ် အတိုၚ်အကံက်တၚ်ဂၞၚ် ပရေၚ်အုပ်ဓုပ်ညးဍုၚ်ကွာန် ပွိုၚ်ဍုၚ်လှာဒကှ် ကံက်ကပှ်ကေတ်လဝ်ဂှ်ရ။
ပရိုၚ်-သြၚ်လောန်တိုၚ်(မ်)