ညံၚ်လေဝ်ပေန်၊ ဂျာန္နဝါရဳ(၂၂)
ပ္ဍဲတိဍာ်ဗော်သွးကောန်ဂကူကရေၚ် KNU ခရိုၚ်ညံၚ်လေဝ်ပေန် တိဍာ်ဒပ်မဟာ(၃)ဂှ် စတမ်နူသၞာံဏံမံက်တုဲ စဵုကဵုစိုပ်အခိၚ်တ္ၚဲဏံ အကြာဒပ်ပံၚ်တောဲ KNLA ကဵု ဒပ်ကံၚ်ဇြဳပၞာန်တအ် ပေါဲဗတိုက်က္တဵုဒှ်ကၠုၚ်ဒၟံၚ် ဇၟာပ်ဒဒှ်တ္ၚဲတုဲ ဟိုတ်နူဒပ်ကံၚ်ဇြဳပၞာန် ပန်ဖျေံဒၟံၚ်လွဟ်ဇၞော် ပ္ဍဲကဵုကွာန်တအ်တုဲ ကောန်ညးအရာပ်(၅၀၀၀) တၠပြၚ် ဒးဂြိပ်ဒဴ ပါဲဓလေတ်ဒၟံၚ်ရဂှ် KNU လလောၚ်တြးလဝ်ရ။
နူကဵုဂိတုဂျာန္နဝါရဳ စၟတ်တ္ၚဲ (၁) စဵုကဵုစၟတ်တ္ၚဲ (၁၅) ဂှ် ပ္ဍဲခရိုၚ်ညံၚ်လေဝ်ပေန် တိဍာ်ဒပ်မဟာ(၃) အကြာဒပ်ကံၚ်ဇြဳပၞာန်ကဵု ဒပ်ပံၚ်ကောံ KNLA တအ် ပေါဲဗတိုက် လၟိဟ် (၅၅)ဝါ က္တဵုဒှ်လဝ်တုဲ နူလပါ်ကံၚ်ဇြဳပၞာန် (၄၇) တၠ ပါလုပ်သီု ဒု-သ္ကိုပ်တံဒပ် (၁)တၠ ဒးချိုတ်အာလဝ်တုဲ ပါဲနူ(၁၉)တၠ ဇီုကပိုက်ဂွံလဝ်ဘဲဝပ်တုဲ ပရေၚ်ဇီုကပိုက်ချိုတ်ဂျိုၚ် သ္ပဒ္တန်ဟွံမာန်ဏီဂှ်လေဝ် နွံဒၟံၚ်ဏီရဂှ် ဓမံက်ထ္ၜးလဝ် ပ္ဍဲတၚ်လလောၚ်တြးဂှ်ရ။
နူလပါ်ဒပ်ပံၚ်ကောံ ဒပ်ပၞာန်ဗၠးၜးကောန်ဂကူကရေၚ် KNLA ဂှ် ဒးပြဟ်လလုဲလဝ် (၂)တၠတုဲ ဂွံလဝ်ဘဲဝပ် (၂)တၠကီု ကွဳစက်ဒပ်ကံၚ်ဇြဳပၞာန်သုၚ်စောဲ (၂၁)ဖ္ဍိုက်လေဝ် နူလပါ်ဒပ်ပံၚ်ကောံတအ် ပလီုပလာ်မာန်လဝ်ရဂှ် KNU ဟီုသ္ဂးလဝ်ရ။
ပ္ဍဲပေါဲဗတိုက်ဇၟာပ်တ္ၚဲ ပ္ဍဲပွိုၚ် (၁၅)တ္ၚဲဂှ် ဒၟာနူဒပ်ကံၚ်ဇြဳပၞာန် ပန်ဖျေံဒၟံၚ်လွဟ်ဇၞော် ပ္ဍဲကဵုကွာန်ညးဍုၚ်ကွာန်တအ် မံၚ်တန်တဴဒၟံၚ် သီုတၚ်ရန်တၟံနွံနွံတုဲ ကောန်ညးဍုၚ်ကွာန် မၞုံပ္ဍဲပွိုၚ်ဍုၚ်ကျောက်ဂျဳ ကေုာံပွိုၚ်ဍုၚ်မုၚ် ခရိုၚ်ညံၚ်လေဝ်ပေန် KNU (၅၀၀၀) တၠပြၚ်ဂှ် ဒးဂြိပ်ပါဲဓလေတ်ဒၟံၚ် ပ္ဍဲဒၞာဲဌာန်ဗၠးဘဲတုဲ ညးဒေသမွဲတၠဂှ်လေဝ် ဇီုကပိုက်ဂွံလဝ်ဘဲဝပ်ရ။
ညးတာလျိုၚ်ဂကောံပရေၚ်မၞိဟ်ကောန်ဂကူကရေၚ် ဒေသခရိုၚ်ညံၚ်လေပေန်မွဲတၠဂှ်မ္ဂး ပေါဲဗတိုက်ၜါလပါ်တအ်ဂှ် ဟိုတ်နူက္တဵုဒှ်ဒၟံၚ် ပ္ဍဲလတူဂၠံၚ်ကွဳစက် နာတ်တာန်ကွေန်-ကျောက်ဂျဳ၊ ကျောက်ဂျဳ-မုၚ်ဂှ် ဇၟာပ်တ္ၚဲဆက်က်တုဲ ညးဍုၚ်ကွာန်တအ် ဗွဲမဂၠိုၚ် စိုပ်ဒၟံၚ်ဒဒိုက်ရဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
မွဲလပါ်ပၠန်ဂှ် ၜိုန်ရဒပ်ကံၚ်ဇြဳပၞာန် လလောၚ်တြးဟီုဂးလဝ် ဒေါံဇူပရေၚ်ချဳဒရာၚ်ပၞာန် ပွိုၚ်မွဲသၞာံကီုလေဝ် ပ္ဍဲကဵုတိဍာ်ဒပ်မဟာ ခရိုၚ် KNU တၞဟ်သ္အာၚ်ကီု သီုကဵုတိဍာ်ဒပ်မဟာ(၃) ခရိုၚ်ညံၚ်လေဝ်ပေန်ဂှ် ဟိုတ်နူကၠောန်ကၠုၚ် ပရေၚ်ချဳဒရာၚ်ပၞာန် အဆက်ဟွံပိုတ်သ္ကုတ်တုဲ ပေါဲဗတိုက်က္တဵုဒှ် သ္ကာတ်မြဟ်ဒၟံၚ်တုဲ လၟိဟ်ညးပါဲဘဲပၞာန်တအ်လေဝ် သာတုဲ ဂၠိုၚ်တိုန်ကၠုၚ်ဒၟံၚ်ရ။
ပရိုၚ်-သြၚ်လောန်တိုၚ်(မ်)