ဗဝ်လခေဝ်၊ ဂျာန္နဝါရဳ(၂၂)
တွဵရးကရေၚ်ဍာဲ၊ ပွိုၚ်ဍုၚ်ဗဝ်လခေဝ် ပ္ဍဲဗ္ဒာဲကွာန်နာန်ဖေဝ် ဗ္ဒပ်ကံၚ်ဇြဳပၞာန်ဖျေံလဝ်ဗ္ဒပ် ပ္ဍဲလတူကုန်ဒဵုမေဝ်သလောၚ် ဗိုန်ဗိုန်ခိုၚ်ၚ်ဂှ် ဗတိုက်သီကေတ်မာန်လဝ် ပ္ဍဲဂိတုဂျာန္နဝါရဳ စၟတ်တ္ၚဲ (၂၀) တေံရဂှ် ဒပ်စဵုဒၞာကောန်ဂကူကရေၚ်ဍာဲ (KNDF) လလောၚ်တြးလဝ်ရ။
ဗ္ဒပ်ကံၚ်ဇြဳပၞာန်ဂှ် ဒပ်ပံၚ်ကောံ KNDF တအ် စဗတိုက်ကၠုၚ်လဝ် ပ္ဍဲအခိၚ်နူဂယးၜိုတ် (၇) နာဍဳ (၅၀) မိနေတ်တုဲ လအ်ပွိုၚ်ၜိုတ် (၁) နာဍဳကဵု (၂၀) မိနေတ် အခိၚ်နူဂယး ၜိုတ် (၉) နာဍဳကဝက် သီကေတ်ဂွံလဝ် ဗ္ဒပ်ကုန်ဒဵုမေဝ်သလောၚ်ဂှ်ရ။
ပ္ဍဲပေါဲဗတိုက်သီဗ္ဒပ်ဂှ် ဒးပသောၚ်သ္အးလဝ် ဇွကောန်ဒပ်ကံၚ်ဇြဳပၞာန် (၅)တၠ ချိုတ်ဒၟံၚ်ကီု ဟိုတ်နူကောန်ဒပ်ကံၚ်ဇြဳသှ်ေနူဂှ်တအ် ဂြိပ်တိတ်အာလဝ်တုဲ စံၚ်ပလီုလဝ် ဗ္ဒပ်ကံၚ်ဇြဳပၞာန်ရဂှ် ဓမံက်ထ္ၜးလဝ် ပ္ဍဲတၚ်လလောၚ်တြးဂှ်ရ။
ပ္ဍဲပေါဲဗတိုက်သီဗ္ဒပ်ဂှ် ဒပ်ကံၚ်ဇြဳပၞာန် ကၠုၚ်စိုပ်ပန်ရီုကဵုက္ၜၚ်ကျာ(၁)ဖ္ဍိုက် စဵုကဵု (၃)ဝါတုဲ ဒပ်ကံၚ်ဇြဳပၞာန်ဖျေံလဝ်သ္ဇိုၚ် ပ္ဍဲကဵုဗဝ်လခေဝ်ဂှ် ၜိုန်ရပန်ဒၟံၚ်လွဟ်ဇၞော် ဂၠိုၚ်ၚ်ကဵုအလန်ကီုလေဝ် ဒပ်ပံၚ်ကောံ KNDF တအ် သီကေတ်လဝ် ဗ္ဒပ်ကံၚ်ဇြဳပၞာန်မာန်ကၠုၚ်ရ။
ပ္ဍဲပေါဲဗတိုက်သီဗဒိုပ်ဂှ် လွဟ်ဇၞော် နူဒပ်ကံၚ်ဇြဳပၞာန် ဗွဲမဂၠိုၚ် ကေုာံကပေါတ်အရပ်စပ်ပၞာန်လ္ၚဵုဂှ်လေဝ် ဒပ်ပံၚ်ကောံ KNDF တအ် သီဂွံလဝ်တုဲ ပ္ဍဲပေါဲဗတိုက်သီဗဒိုပ်ဂှ် သ္ဂံၚ်ဒပ်ပၞာန်ကရေၚ်ဍာဲ (KA) မွဲတၠ ဒးပြဟ်လလုဲလဝ်ရ။
ဗ္ဒပ်ကံၚ်ဇြဳပၞာန် မၞုံပ္ဍဲကုန်ဒဵုမေဝ်သလောၚ် ပွိုၚ်ဍုၚ်ဗဝ်လခေဝ်ဂှ် ဟိုတ်နူဒှ်ဗ္ဒပ်ပၟိက်ကိစ္စဇၞော် သွက်ပရေၚ်ပၞာန်တုဲ ဒှ်ဗ္ဒပ်နူလပါ်ကံၚ်ဇြဳပၞာန် ဖျေံကၠုၚ်လဝ်သ္ဇိုၚ် ဂၠိုၚ်ကဵုသၞာံ ခိုၚ်ဗိုန်မွဲဗ္ဒပ်ရဂှ် ဂွံတီကေတ် အတိုၚ်တၚ်လလောၚ်တြး ဒပ်စဵုဒၞာကောန်ဂကူကရေၚ်ဍာဲ (KNDF) ရ။
ပရိုၚ် – သြၚ်လောန်တိုၚ်(မ်)