မတ်မလီု၊ ဂျာန္နဝါရဳ (၂၂)
မွဲဒမြိပ် ၚုဟ်သြန်ဗာတ် ကလေၚ်က္ဍၚ်တိုန်ကၠုၚ်ဂှ် ဟိုတ်နူခက်ခုဲ ပရေၚ်ပလံၚ်ဗစိုပ်တုဲ ပ္ဍဲတွဵုရးဍုၚ်မန် ၚုဟ်မးကပေါတ်ဗၞိက်သေံ ထပ်က္ဍၚ်တိုန်ကၠုၚ်ရဂှ် သၟာဗၞိက်ဂမၠိုၚ် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
ၚုဟ်မးသြန်ဗာတ်ဂှ် ပ္ဍဲဂိတုဂျာန္နဝါရဳ ပဌမသတ္တာဟ တုဲကၠုၚ်တေံ နူၚုဟ်သြန်ဗာတ် (၁)ဗာတ် မၞုံဒၟံၚ် ဗွိုၚ်ၜိုတ်(၈၀) ဒကေဝ်ဂှ် ပ္ဍဲဂိတုဂျာန္နဝါရဳ သတ္တာဟဒုတိယဏံဂှ် ၚုဟ်ကလေၚ်တိုန်ကၠုၚ် စဵုကဵုဗွိုၚ် (၈၆)ဒကေဝ်ရ။
ဟိုတ်နူၚုဟ်သြန်ဗာတ် ကလေၚ်က္ဍၚ်တိုန်တုဲ ကပေါတ်ဗ္ကန်ကေတ် ပၠုပ်နၚ်ဒၟံၚ် နူကဵုဍုၚ်သေံတအ်ဂှ် တုဲတဴကဵုဂကူတုဲ ၚုဟ်ကလေၚ်က္ဍၚ်တိုန် အကြာ ၜိုတ်(၁၀၀၀)ဒကေဝ် စဵုကဵု(၃၀၀၀)ဒကေဝ်ပၠန်ရ။
ၚုဟ်ကပေါတ်ဗၞိက်သေံ ထပ်က္ဍၚ်တိုန်ကၠုၚ်ဒၟံၚ်ဂှ် ဒၟာနူၚုဟ်ကပေါတ် နူလပါ်ဍုၚ်သေံတေံ က္ဍၚ်တိုန်ဟွံသေၚ်တုဲ ဒှ်ကၠုၚ် ဟိုတ်နူၚုဟ်မးသြန်ဒကေဝ် ဆုတ်စှ်ေတုဲ မူဝါဒသြန်ကၟိန်ဍုၚ်ဗၟာ ညိၚ်ဝတ်မှ ၚုဟ်မးဗွဝ်ဖျာ ကလေၚ်ညိၚ်ဝတ်ကၠုၚ်မာန်ဏောၚ်ဂှ် သၟာဗၞိက်မွဲတၠ ဟီုသ္ဂးလဝ်ရ။
“ၚုဟ်မးသြန်ဗာတ်လေဝ် တိုန်ကၠုၚ်ဒၟံၚ် ညိညရ။ သြန်ဗၟာပိုဲဂှ် တော်ကဵုကၠာတေံတှ်ေ မိက်ဂွံကလေၚ်ဆုတ်စှ်ေကၠုၚ် ညိရ။ ကပေါတ်ဗၞိက်သေံ ၚုဟ်က္ဍၚ်တိုန် ဟွံသေၚ်ပုဟ်။ ၚုဟ်မးသြန်ဗၟာဏောၚ် စှ်ေအာ။ ကပေါတ်ဗၞိက်သေံ ဥပမာဍေံ-ကပေါတ်ၚုဟ်နွံဒၟံၚ် မသုန်ဗာတ်ဂှ် ဍေံမံၚ်မသုန်ဗာတ်ရ။ ရာန်ကၠာတေံလေဝ် မသုန်ဗာတ်ရ။ရာန်လၟုဟ်လေဝ် မသုန်ဗာတ်ရ။ ကပေါတ်သေံ တိုန်ဒၟံၚ် ဗီုဂှ်ဟွံသေၚ်ပုဟ်။ ၚုဟ်သြန်ဏောၚ် တိုန်ဒၟံၚ်ရ။ ယဝ်ရဒးဟီုကဵုဥပမာတှ်ေ -လၟုဟ်ဂှ် ဒှ်အာၜိုတ်(၈၆)ယျတှ်ေ ဂုဏ်နူဂှ်ရ ညးတၞဟ်တအ်ဟီုစ ကပေါတ်ဗၞိက်သေံ ၚုဟ်တိုန်ကၠုၚ်ရ။ ပ္ဍဲကဵုၚုဟ်မးဗွဝ်ဖျာ သြန်ဂၠးဂှ် ၚုဟ်သြန်ဗာတ် တိုန်အာတုဲ ၚုဟ်သြန်ဍုၚ်ဇကု စှ်ေကၠုၚ် ၚုဟ်သြန်ဂှ်လေဝ်။ သၞောတ်သြန်ဗၟာရ။ ယဝ်ရညိၚ်ဝတ်ဏောၚ်တှ်ေ ပရေၚ်ပိုန်ဒြပ်ခိုဟ်ဏောၚ်။ အဓိကဍေံ ညံၚ်ၚုဟ်မးသြန်ဗၟာ ဂွံညိၚ်ဝတ် ယဝ်ထိၚ်ကဵု ညံၚ်မူဝါဒသြန် ဂွံညိၚ်ဝတ်မာန်တှ်ေ ဟွံပရေံပုဟ်လေဝ်” သာ်ဏံ ဟီုသ္ဂးလဝ်ရ။
အခိၚ်လၟုဟ်ဏံ ပ္ဍဲဒၞာဲဗ္ကန်ကေတ် ပၠုပ်နၚ်ဒၟံၚ် ကပေါတ်သေံဂှ်လေဝ် ဟိုတ်နူပေါဲဗတိုက်အကြာဂၠံၚ်တရဴတုဲ အခက်ခုဲပရေၚ်အာကၠုၚ် နွံကၠုၚ်ဒၟံၚ်ကီု ဒၟာနူအခိၚ်လအ်လတုဲ ဟိုတ်နူစရိတ်အိုတ် သာတုဲ အိုတ်ဂၠိုၚ်ကၠုၚ်ဒၟံၚ်တုဲ ၚုဟ်ကပေါတ်ဗၞိက်တအ်လေဝ် ဗက်တိုန်ကၠုၚ်ရဂှ် ဟီုသ္ဂးလဝ်ရ။
ဟိုတ်ဂှ်ရ ယဝ်ရ မိက်ဂွံၚုဟ်ကပေါတ်ဗၞိက်ဖျာ ကလေၚ်စှ်ေဏောၚ်တှ်ေ နကဵုကံၚ်ဇြဳပၞာန် ထေက်ကဵုဒးကၠောန်သ္ပ ညံၚ်ၚုဟ်မးသြန်ဗၟာ ဂွံကလေၚ်တိုန်ကၠုၚ်ဂှ်တုဲ ယဝ်ဟွံကၠောန်မ္ဂး ၚုဟ်မးဗွဝ်ဖျာတအ် ဆက်တိုန်ကၠုၚ် မာန်မံၚ်ဏီရဂှ် သၟာဗၞိက်ဂမၠိုၚ် သ္ၚဳဂၠိပ်လဝ်ရ။
ပ္ဍဲတွဵုရးဍုၚ်မန်မ္ဂး ပရေၚ်ကပေါတ်ဗၞိက်သေံလုပ်ကၠုၚ်ဒၟံၚ် နူကဵုဍုၚ်ဗြဝတဳ ပယျဵုဒၞက်သေံမွဲကဆံၚ်ဂှ် ကပေါတ်ဗၞိက်သ္ဇိုၚ်စသုၚ်၊ ဂဥုဲ၊ ကပေါတ်ပယျေဝ်ဖျေံဖျောန်၊ ကပေါတ်အရပ်စပ်မၞိဟ် ကေုာံသ္အာၚ်နူကပေါတ်ပရေၚ်သိုၚ်ခၞံတုဲ ကပေါတ်ဗၞိက် သုၚ်စောဲနာနာသာ်တအ်လေဝ် လုပ်ကၠုၚ်ဒၟံၚ် အရိုဟ်ဒဒှ်တ္ၚဲရ။
ၚုဟ်မးသြန်ဗာတ်သေံဂှ် ကိုပ်ကၠာနူပၞာန်ဟွံဂွံသီအဝဵု ပ္ဍဲလက်ထက်အလဵုအသဳ NLD တေံ သြန်ဗာတ်(၁)ဗာတ်ဂှ် နူကဵုၚုဟ်နွံဒၟံၚ် (၃၀)ဒကေဝ်ပြၚ်ဂှ် ကြဴနူဒပ်ပၞာန်သီအဝဵုတုဲ ၚုဟ်တိုန်ကၠုၚ် စဵုကဵု(၂)ချပြၚ်ရ။
ပရိုၚ်-သြၚ်လောန်တိုၚ်(မ်)