ပါရဳ၊ ဂျာန္နဝါရဳ(၂၂)
သၟာကမၠောန်ပြၚ်သေတ် မွဲပြကောဋိကိုတ်ပြၚ်တအ်ဂှ် ဒစဵုဒစး ထ္ၜးကၠုၚ်ဆန္ဒကဵု အစဳဇန်တၟိအလဵုအသဳ ပြုပြေၚ်ပြံၚ်သၠာဲကၠုၚ် ကိစ္စပေန်ဇြေန် မပါလုပ် သီုပရေၚ်သၠုၚ်ပတိုန် အပိုၚ်ခြာအာယုက် ကေတ်ပေန်ဇြေန် ဒေါံဇူဂှ်ရ။
ပရေၚ်သၠုၚ်ဂလိုၚ်ပတိုန် အခိၚ်ဂွံဒေါံဇူဂှ် ဒှ်ဒတုဲဖိုလ် သွက်တၠကမၠောန်တအ်ကဵု ညးသိုက်လောဲတအ်ဏောၚ်ဂှ် တီဒၟံၚ် ဇၟာပ်ပ်မၞိဟ်ရဂှ် သမဂ္ဂသၟာကမၠောန်ပြၚ်သေတ်တအ် ပံၚ်တောဲ လလောၚ်တြးကၠုၚ်ရ။
သမ္မတပြၚ်သေတ် အဳမာန်နျူအေဝ်မာကွောန်ဂှ် အပိုၚ်အခြာ အခိၚ်ဂွံဒေါံဇူဂှ် နူကဵု (၆၂) သၞာံဂှ် ပ္တိတ်ဒၟံၚ်ဇြဟတ်သွက်ဂွံထိၚ်ဒဝ် ပရေၚ်ဘဏ္ဍာ သၞောတ်သြန်ဂိတု ပေန်ဇြေန် စဵုကဵု (၆၄)သၞာံတုဲ ပရေၚ်ပြံၚ်သၠာဲဏံဂှ် ဒှ်ပရေၚ်ဘပဠဒၟံၚ် သၟာကမၠောန်တအ်ရဂှ် သမဂ္ဂဂမၠိုၚ် ဟီုသ္ဂးလဝ်ရ။
ဂကောံသမဂ္ဂတအ် ၜိုန်ရပတိုန်လဝ်ဂလာန် သွက်အစဳဇန်ညံၚ်ကဵု ညးလောဲသိုက်တအ် ဂွံဒုၚ်အကံက်အခေါန် ဟွံသေၚ်မ္ဂး တၠကမၠောန်တအ် ညံၚ်ဂွံထပ်ဗပဵုစုတ်ကဵု သြန်ဂိတု ၚုဟ်ကမၠောန်ကီုလေဝ် မာကွောန် ဟီုသ္ဂးလဝ် အစဳဇန်ညးဂှ် ဒှ်နဲကဲ သွက်ဂွံသောၚ်ကလး အကာဲအရာဏံ ခိုဟ်အိုတ်ရ။
“ပြသၞာဏံဂှ် ပါဲနူပရေၚ်ကံက်ကေတ်အခေါန်တုဲ သောၚ်ကလးအာကဵု နဲကဲတၞဟ်မာန်ဏီရ။ သွက်ဂွံဒးကဵု သွက်ပရေၚ်ထ္ၜးသြန်နွံပၟိက် ကဏ္ဍညးဍုၚ်ကွာန်ဂှ် သၟာကမၠောန်တအ် ဟွံဒးကဵုပုဟ်”ဂှ် က္ဍိုပ်သ္ကိုပ် သမဂ္ဂသၟာကမၠောန် ကၟိန်ဍုၚ်ပြၚ်သေတ်ဇၞော်အိုတ် CFDT ဟီုသ္ဂးလဝ်ရ။
မာကွောန် မၞုံဒၟံၚ် ပ္ဍဲဗာဇြဳလိုဝ်နာ သွက်ပေါဲသဳကၠဳပြၚ်သေတ်-သပုၚ်ဂှ် ၜိုန်ရသ္ပစၟတ်သမ္တီကဵု ပရေၚ်မၞိဟ်ဂမၠိုၚ်ဟွံပေၚ်စိုတ်ကီုလေဝ် သွက်ဂွံဒးဟေန်ဆာဲ သြန်ဂိတုပေန်ဇြေန်ပြၚ်သေတ်ဂှ် နွံဒၟံၚ်ပၟိက်ကဵု ပရေၚ်ပြံၚ်သၠာဲဏောၚ်ဂှ် ဟီုသ္ဂးလဝ်ရ။
ပ္ဍဲပြၚ်သေတ် ညးဗျုအာယုက်ဇၞော်ဂမၠိုၚ် ဂၠိုၚ်တိုန်ကၠုၚ်ဒၟံၚ်ဂှ် ကဵုဒၟံၚ်ဇြဟတ်ဓရိုဟ် ကုအလဵုအသဳ မွဲကရောံကဵု ကတိကဝတ် ညံၚ်ညးဂမၠိုၚ်သီုဖအိုတ် ဂွံက္လိဂွံ သြန်ဂိတုပေန်ဇြေန်ကၟိန်ဍုၚ် ညံၚ်ဂွံလုပ်လၟိဟ် ပ္ဍဲကဵုသၞောတ်ဏံမွဲစွံရ။
ပြဟ်ဟ်ဏံမ္ဂး ညးဍုၚ်ကွာန်တအ် ဒစဵုဒစးပါဲတးဒၟံၚ် ပရေၚ်ပြံၚ်သၠာဲဏံတုဲ အတိုၚ်တၚ်ဂၞၚ် ကံက်ကေတ်လဝ်ဂှ် မၞိဟ်ဗွဲမဂၠိုၚ်တအ် တးပါဲဖျေံ တၚ်ပတိုန်ဂလာန်ဂှ်တုဲ အလုံမွဲကၟိန်ဍုၚ် ပေါဲမၞိဟ်ကောံကလောံ (၂၀၀) ဝါပြၚ် က္တဵုဒှ်ကၠုၚ်လဝ်ဂှ်ရ ဗကပ်ကၠုၚ်ဗဗေၚ်ကဵု ပရေၚ်ဆက်စၠောံဂၠံၚ်ဍာန်၊ ဘာဗ္တောန်လိက် ကေုာံကမၠောန်ရေၚ်တၠုၚ်ကဵုညးဍုၚ်ကွာန်တအ် တၞဟ်သ္အာၚ်ရဂှ် ဂွံတီကေတ်ရ။
ပ္ဍဲဍုၚ်ပေဝ်ရေတ် သၟးဂှ် အပံၚ်မၞိဟ် (၈)ကိုတ် ထ္ၜးကၠုၚ်လဝ်ဆန္ဒတုဲ အလုံမွဲကၟိန်ဍုၚ် အပံၚ်လၟိဟ်မၞိဟ်(၁.၁) ပြကောဋိကိုတ်ပြၚ် ထ္ၜးကၠုၚ်လဝ်ဆန္ဒရဂှ် ဌာနဝန်ဇၞော် ပရေၚ်အပ္ဍဲဍုၚ် ဟီုလဝ်တုဲ သမဂ္ဂသၟာကမၠောန်တအ်ဂှ်မ္ဂး အလုံမွဲကၟိန်ဍုၚ် မၞိဟ်ပါလုပ် ပ္ဍဲပေါဲထ္ၜးဆန္ဒ ၜါပြကောဋိကိုတ်ပြၚ်ရဂှ် ဟီုသ္ဂးလဝ်ရ။
ပ္ဍဲပေါဲထ္ၜးဆန္ဒတအ်ဂှ် ပရေၚ်ဇီုဓဗတ်ကဵု ဒပ်ဗၠာဲသၟိၚ်က္တဵုဒှ်ကၠုၚ်လဝ် နွံဒၟံၚ်ညိညဇြိုၚ်သာတုဲ ညးဍုၚ်ကွာန်ကဵုဒါဇြေန်ဗွဲမဂၠိုၚ် ဒပ်ဗၠာဲသၟိၚ်တအ် ရပ်ဏာလဝ်ကီု ပရေၚ်ပန်ပှော်လဝ် နကဵုဗုမ်ဍာ်ရမတ်တအ်လေဝ် ကၠောၚ်သ္ပကၠုၚ်လဝ်ရဂှ် ဂွံတီကေတ်ရ။
သွက်ဂွံကဵုအာ ဇြဟတ်ဓရိုဟ်အစဳအဇန်သမ္မတပြၚ်သေတ်ဂှ် ပ္ဍဲဂိတုဂျာန္နဝါရဳ စၟတ်တ္ၚဲ (၃၁)ဏံ သွက်ဂွံထ္ၜးအာဆန္ဒ အလုံမွဲကၟိန်ဍုၚ်ဂှ် သမဂ္ဂဂမၠိုၚ် အာတ်မိက်ကၠုၚ်လဝ်ရ။
Ref,Fox Business