တံၚ်ၚူ – ဂျာန္နဝါရဳ(၂၄)
ပ္ဍဲဗ္ဒာဲဂၠံၚ် တရဴဇမ္ၚောဲ လဂုၚ်-အၚ်ဝ မိုၚ်တိုၚ် (၁၆၁)ဂှ် ညးတာလျိုၚ်ပရေၚ်စၟဳစၟတ် သ္ကိုပ်ဗိုလ်တာန်ထောဋ်(ဒုသ္ကိုပ်ဗိုလ်ဇၞော် စမ်ၜတ်) ပ္တောံလဝ်ဗီုပြၚ်တုဲ ရပ်ကေတ်ဒၟံၚ် သ္ဂံၚ်ပၠန်ဂတး UG တအ် ကေုာံအကြာပ်ဒပ်ဇၞော် မျေအ်အံၚ် တအ်ဂှ် ဂကောံပံၚ်တောဲ ဒပ်လပါ် ၃၊ ကေုာံဒပ်လပါ် ၆ တံဒပ် ၃၅၀၁၊ PDF ခရိုၚ်တံၚ်ၚူတအ် ပန်ပှော်ရပ်ကေတ်လဝ်ရဂှ် Bago Region PDF လလောၚ်တြးလဝ် ပရိုၚ်ရ။
ညးဒးဒုၚ်ပန်ပှော် ရပ်စပ်လဝ်ကဵု ဂကောံစဵုဒၞာညးဍုၚ်ကွာန်တအ်ဂှ် ဒှ်သ္ကိုပ်တံဒပ် စရက(၁) သ္ကိုပ်ဗိုလ်တာန်ထောဋ်(ဒုသ္ကိုပ်ဗိုလ်ဇၞော် စမ်ၜတ်) မဒှ်ညးတာလျိုၚ်ပရေၚ်စၟဳစၟတ် နူကဵုဒပ်အရန်ပရေၚ်ဂီုကၠီု ဆေၚ်ရာကဵုသွာၚ်ပၞာန် စၟတ်(၁) ပ္ဍဲဗ္ဒာဲဇြေန်တာ North Point – Ocean ဂၠံၚ်ပြန် ၉-မာၚ်ကဝက် ရးဒေသဇၞော်လဂုၚ် ကေုာံအကြာပ်ဒပ်ဇၞော် မျေအ်အံၚ်တအ်ရဂှ် ဂွံတီကေတ်ရ။
ဍေံတအ်ဂှ် ဗက်ဂၠိုက်ဂၠာဲဒၟံၚ် အဆက်အဆေန် ပရိုၚ်သ္ဂံၚ်ပၠန်ဂတးတအ်တုဲ ထ္ၜးဟိုတ်ကဵုရာန်လွဟ်ဏောၚ်ဂးတုဲ ဒှ်မၞိဟ်ကၠောန်သ္ပဒၟံၚ် ပရေၚ်ရပ်စပ်ဒၟံၚ် သ္ဂံၚ် UG တအ်ရဂှ် ဂွံတီကေတ်ရ။
ယာဉ်ကွဳစက် စၟတ် YGN 2N 6158 OYOTA VANGUARD ညးတာလျိုၚ်စၟဳစၟဳ သ္ကိုပ်ဒပ်စရက (၁) သ္ကိုပ်ဗိုလ်ဇၞော် တာန်ထောဋ်(ဒုသ္ကိုပ်ဗိုလ်ဇၞော် စမ်ၜတ်) ကေုာံအကြာပ်ဒပ်ဇၞော်တအ် ဍိုက်ပါဗက်ကၠုၚ်ဂှ် တိတ်ကၠုၚ်ဒၟံၚ် အတိုၚ်ဂၠံၚ် တရဴဇမ္ၚောဲ လဂုၚ်-အၚ်ဝယျဂှ် ဂကောံ YUA ပလံၚ်ဗစိုပ်နၚ် ပရိုၚ်ဂှ်ရ ဒပ်စဵုဒၞာညးဍုၚ်ကွာန်တအ် မၚ်ဒၟံၚ်ကၚ်တုဲ ပဒေါံကွဳစက် စၟဳစၟတ်လဝ်ရ။
ပ္ဍဲအခိၚ်ကၟာတ်လဒဵုစၟဳစၟတ်ဒၟံၚ်ဂှ် ဒၟာနူညးတအ်ညးၜါ ကလေၚ်စဵုဒၞာကၠုၚ် နကဵုလွဟ်ပါဒၟံၚ် ကရောံညးတအ်ဂှ်တုဲ ပ္ဍဲအခိၚ်ဒပ်စဵုဒၞာတအ် ကလေၚ်ပန်ဏာဂှ် သီုၜါတၠ ဒးချိုတ်အိုတ်အာလမျီု ပ္ဍဲဒၞာဲဂှ်ရဂှ် ဂွံတီကေတ်ရ။
သီကေတ်ဂွံလဝ် နူကဵုကောန်ဒပ်ကံၚ်ဇြဳပၞာန် ချိုတ်အာလဝ်ၜါတၠတအ် လွဟ်ဂၠေံ 9MM (၂)ဒကိုအ်၊ မကမ်(၁၂)မ၊ လိုၚ်ဇြေန်ယာန် ကေုာံတၞးလိက်တၚ်ဂၞၚ်လ္ၚဵုတအ်ဂှ်တုဲ စံၚ်ပလီုလဝ် ကွဳစက်ရဂှ် ဓမံက်ထ္ၜးလဝ် ပ္ဍဲတၚ်လလောၚ်တြး Bago Region PDF ရ။
သ္အာၚ်နူဂှ်ပၠန် ပ္ဍဲအခိၚ်ကော်ကေတ်ဏာ မၞိဟ်တြုံမွဲတၠကဵု မၞိဟ်ဗြဴမွဲတၠ ပါဗက်ကၠုၚ် ကရောံကောန်ဒပ်ကံၚ်ဇြဳပၞာန် သွက်ဂွံသၟာန်သၟုက် စၟဳစၟတ်ဂှ် ဒၟာနူပ္တိတ်ကၠုၚ်ဇြဟတ် သွက်ဂွံပၠံၚ်ကေတ်လွဟ် ဂွံဂြိပ်တိတ်တုဲ ဒးချိုတ်အာ ပ္ဍဲအခိၚ်ပန်ပှော်ရပ်ကေတ်ရဂှ် ဂွံတီကေတ်ရ၊
ဒပ်ပၠန်ဂတး ပါလုပ်ချဳဒရာၚ် ပ္ဍဲပရေၚ်ချဳဒရာၚ်ပၞာန်ဏံဂှ် ဇီုကပိုက် ဂွံလဝ်ဘဲဝပ် ဟၟဲမွဲတုဲ ကလေၚ်ဆုတ်တိတ် မာန်ကၠုၚ်လဝ်ရဂှ် ဂွံတီကေတ်ရ။
စပ်ကဵုကိစ္စဏံတုဲ နကဵုသြၚ်လောန်တိုၚ်(မ်) ၜိုန်ရပ္တိတ်ဇြဟတ် သွက်ဂွံဆက်စၠောံသၟာန်သၟုက်ကဵု ဂကောံ Bago Region PDFကီုလေဝ် ဆက်စၠောံကၠုၚ် ဟွံဂွံလဝ်ရ။
ပရိုၚ်-သြၚ်လောန်တိုၚ်(မ်)
ဗီုရုပ်- Bago Region PDF