မတ်မလီု – ဂျာန္နဝါရဳ(၂၄)
ဒဒှ်ရတၚ်ဂုဏ်ကဵု ကၟိန်ဍုၚ်ကြုက် ဒတူလာၚ်ကဵုလဝ် လပါ်ကောန်ညးဍုၚ်ကွာန် ကၟိန်ဍုၚ်ဗၟာ ပ္ဍဲကဵုကံၚ်ဇြဳပရေၚ်ဂီုကၠီု ကုလသမဂ္ဂဂှ် ဝန်ဇၞော်ပရေၚ်ဍုၚ်သ္အာၚ် အလဵုအသဳပရေၚ်ညဳသၟဟ်ကောန်ဂကူ ဒဝ်ဇြေန်မာအံၚ် ဟီုသ္ဂးလဝ်ရ။
ပ္ဍဲဂိတုဂျာန္နဝါရဳ တုဲကၠုၚ် စၟတ်တ္ၚဲ(၂၂)ဂှ် ဓမံက်ထ္ၜးလဝ် ပ္ဍဲလိက်သဝဏ် ပလံၚ်ဗစိုပ်ဏာလဝ် ကုဝန်ဇၞော်ပရေၚ်ဍုၚ်သ္အာၚ်ကြုက် Quin Gang ဂှ်ရ။
သတ်ကၟဝ် ဇဝ်ပ္ကဴပရေၚ်ပၠန်ဂတး NUG ပ္တိတ်ဒၟံၚ်ဇြဟတ်ဂှ် ဟွံဇီုကပိုက်ဒး ဒတုဲဖိုလ်ပရေၚ်ပိုန်ဒြပ် ကၟိန်ဍုၚ်ဝုတ်ဒိုဟ် ပ္ဍဲကဵုဒေသ မပါလုပ်သီုကၟိန်ဍုၚ်ကြုက်တုဲ ကဵုက္တဵုဗဒှ်ကဵု ဒတုဲဖိုလ်ရဂှ် ဟီုသ္ဂးလဝ်ရ။
သ္အာၚ်နူဂှ်ပၠန် ပ္ဍဲကၠောံသၞာံ (သၞာံဗ္တာဲ)ကၠုၚ်စိုပ်ဂတဏံဂှ် သာတုဲဆက်ဆောံကၠုၚ် ဍုက်က်ကေဝ်ကေဝ် မာန်ဏောၚ်ဂှ် ဓမံက်ထ္ၜးလဝ် ပ္ဍဲလိက်သဝဏ် NUG ဂှ်ရ။
တၚ်သ္ဂုတ်သွာတ်ပရေၚ်ကၟိန်ဍုၚ်ဗၟာ တၚ်သွက်ဂွံဗလးကဵု ကောန်ထံၚ်ပရေၚ်ဍုၚ်ကွာန် မပါလုပ် သီုဒဝ်အံၚ်သာန်သုကျဳတအ် ဗွဲမပြဟ်ကီု၊ သွက်ပရေၚ်ပ္ကီုပရာပ် ကံၚ်ဇြဳပၞာန် ကလိလောန်ဒၟံၚ်ဂှ် ဂွံတန်ဒေါံအာ မပါလုပ်ဒၟံၚ်တအ်ဂှ် ကၟိန်ဍုၚ်ဗျိတိၚ်က္ဍိုက်က္ဍိုပ် ပတိုန်ထ္ၜးလဝ်ဂှ် ပါ်မာဲသ္ဂုတ်သွာတ် သ္ပကၠုၚ်လဝ်ဒ္တန် ပ္ဍဲဂိတုဒဳဇြေမ်ဗာ သၞာံ ၂၀၂၂ တေံရ။
တၚ်သ္ဂုတ်သွာတ်ဂှ် ကၟိန်ဍုၚ်လုပ်ဂကောံ ကံၚ်ဇြဳပရေၚ်ဂီုကၠီုကုလ (၁၅)ကၟိန်ဍုၚ် ပါ်မာဲသ္ဂုတ်သွာတ်ကၠုၚ်လဝ်ဂှ် ကၟိန်ဍုၚ်ကြုက်၊ ရုယှာ ကေုာံအိန္ဒိယတအ် ဟွံကဵုမာဲတုဲ ကၟိန်ဍုၚ်သှ်ေဒၟံၚ် (၁၂)ကၟိန်ဍုၚ်တအ်ဂှ် ကဵုကၠုၚ်လဝ်မာဲ ထံက်ဂလာန်ရဂှ် ဂွံတီကေတ်လဝ်ရ။
နကဵုကြုက်ဂှ် ပ္ဍဲတၚ်သ္ဂုတ်သွာတ် ကံၚ်ဇြဳပရေၚ်ဂီုကၠီုဂှ် ကၟိန်ဍုၚ်ကြုက် ဟွံဒတူလာၚ် ကရောံဂကောံပၞာန်ပ္ကီုပရာပ် ဍဵုဍိုက်ပ္ကီုပရာပ်ဒၟံၚ် ကောန်ညးဍုၚ်ကွာန်တအ်တုဲ ထ္ၜးပျးဒၟံၚ် ဒှ်ကၟိန်ဍုၚ်ဝုတ်ဒိုဟ် ခိုဟ်ပြဲသွက်ကၟိန်ဍုၚ်ဗၟာ မွဲဍုၚ်ရဂှ် ဝန်ဇၞော်ပရေၚ်ဍုၚ်သ္အာၚ် NUG ဟီုသ္ဂးလဝ်ရ။
ပ္ဍဲအကြာညးသ္ၚဳဂၠိပ်ပါ်ပါဲ ပရေၚ်ဍုၚ်ကွာန်တအ်လေဝ် ပရေၚ်သ္ၚဳဂၠိပ် စပ်ကဵုပရေၚ်ဆက်ဆောံ အကြာကြုက်ကဵု ကံၚ်ဇြဳပၞာန် လီုလာ်ကၠုၚ်ဒၟံၚ်ဂှ်လေဝ် နွံကၠုၚ်ဒၟံၚ်ရ။
ပရိုၚ်-သြၚ်လောန်တိုၚ်(မ်)