ကျာ်ပိ၊ ဂျာန္နဝါရဳ(၂၅)
နကဵုသ္ဇိုၚ်ဝန် ယိုက်ဒၟံၚ်ဝန် သၟဝ်တဲကံၚ်ဇြဳပၞာန် မၞုံပ္ဍဲဍုၚ်ကျာ်ပိ တိဍာ်ဒပ်မဟာ (၆) ဗော်သွးကောန်ဂကူကရေၚ် KNU ထိၚ်ဒဝ်လဝ်ဂှ် ညံၚ်ဂွံပံၚ်တောဲကဵု ညးဍုၚ်ကွာန်တအ် ဗွဲမပြဟ်တုဲ သွက်ဂွံသ္ပ CDM ဂှ် ဂကောံဒပ်ပံၚ်ကောံ ဒပ်ဒမၠုက်ဍုၚ်ကျာ်ပိ လလောၚ်တြးလဝ်ရ။
ပ္ဍဲဂိတုဂျာန္နဝါရဳ စၟတ်တ္ၚဲ (၂၃) တ္ၚဲတုဲကၠုၚ်တေံ ပ္ဍဲအခိၚ်ဗ္တံဂှ် ရုၚ်ကောပ်ကာဲ ပရေၚ်မၞိဟ်လုပ်တိတ်၊ ရုၚ်သ္ကိုပ်ပရေၚ်အုပ်ဓုပ် ကေုာံရုၚ်သာယျာဍိုပ်ဍဴ မဒှ်ရုၚ်ဆေၚ်စပ်ကဵု ဌာနကံၚ်ဇြဳပၞာန်ဂှ် ဂကောံဒပ်ပံၚ်ကောံ ဒပ်ဒမၠုက်ဍုၚ်ဇၞော်ကျာ်ပိတအ် လုပ်စိုပ်ပသောၚ်သ္အး စံၚ်ကၠုၚ်လဝ်ရ။
စပ်ကဵုပရောဒဒှ်ဏံတုဲ ဂကောံဒပ်ပံၚ်ကောံ ဒပ်ဒမၠုက်ဍုၚ်ကျာ်ပိဂှ် နကဵုကသ္ဇိုၚ်ဝန် သၟဝ်တဲကံၚ်ဇြဳပၞာန်ဂမၠိုၚ် ညံၚ်ဂွံပံၚ်တောဲကဵု ညးဍုၚ်ကွာန်တအ်တုဲ သွက်ဂွံသ္ပ CDM ဂှ် ဗတိုက်ဖ္အောဝ်ကၠုၚ်ရ။
ပ္ဍဲကဵုဍုၚ်ကျာ်ပိ သ္ဇိုၚ်ဝန်ကၠောန်ဒၟံၚ်ကမၠောန် သၟဝ်တဲကံၚ်ဇြဳပၞာန်တအ်ဂှ် ယဝ်ရပရေၚ်ပရော မမိက်ကဵုမွဲမွဲ က္တဵုဒှ်ကၠုၚ်မ္ဂး ညးလဵုလေဝ် စဵုဒၞာကဵုမာန် ဟွံသေၚ်ရဂှ် ဂွံညာတ်လဝ် ပ္ဍဲကဵုပရောဒဒှ် တ္ၚဲတုဲကၠုၚ်တေံမာန်ရဂှ် ဂကောံဒပ်ပံၚ်ကောံ ဒပ်ဒမၠုက်ဍုၚ်ကျာ်ပိ ဟီုသ္ဂးလဝ်ရ။
ဟိုတ်ဂှ်ရ လ္ပဆက်ယိုက်ဂၠေၚ်တာလျိုၚ် သၟဝ်တဲကံၚ်ဇြဳပၞာန်တုဲ ပံၚ်တောဲကဵု ညးဍုၚ်ကွာန်တအ် ဗွဲမပြဟ်တုဲ ညံၚ်ဂွံသ္ပ CDM ဂှ် ဂကောံဒပ်ပံၚ်ကောံတအ် ဗတိုက်ဖ္အောဝ်လဝ်ရ။
သ္အာၚ်နူဂှ်ပၠန် အထံက်တိုၚ်ကံၚ်ဇြဳပၞာန် ကဵုဒၟံၚ်ပရိုၚ် သွက်ကံၚ်ဇြဳပၞာန် သၟာဒဳကွဳလိုန်ဓာတ်လိုၚ်ကီု၊ မၞိဟ်ပူဂိုလ်တအ်ကီုဂှ်လေဝ် စနူကဵုတ္ၚဲဏံတုဲ သွက်ဂွံဒေါံဇူအာ ကမၠောန်ပြဝဇကုတအ် မဒးကဵုဏာသတိရဂှ် ဂကောံဒပ်ပံၚ်ကောံ ဒပ်ဒမၠုက်ဍုၚ်ဇၞော် ဍုၚ်ကျာ်ပိဂှ် လလောၚ်တြးလဝ်ရ။
ရုၚ်ဌာနဆေၚ်စပ်ကံၚ်ဇြဳပၞာန် မၞုံပ္ဍဲဍုၚ်ကျာ်ပိ (၃)ရုၚ်ဂှ် ဂကောံဒပ်ပံၚ်ကောံ ဒပ်ဒမၠုက်ဍုၚ်ဇၞော်တအ် စံၚ်ပလီုလဝ်တုဲဂှ် နူလပါ်ဒပ်ကံၚ်ဇြဳပၞာန်ကဵု ဒပ် BGF တအ် လုပ်စိုပ်ကေတ်လဝ်ဒၞာဲကီု ကောန်ဍုၚ်ကွာန် ညးဒေသလ္ၚဵုတအ်ဂှ်လေဝ် ဂြိပ်တိတ်အာ လပါ်ဍုၚ်သေံ နွံကၠုၚ်ဒၟံၚ်ကီုရ။
ပရိုၚ်-သြၚ်လောန်တိုၚ်(မ်)