ကျာ်ထဝ်၊ ဂျာန္နဝါရဳ (၂၅)
ဟိုတ်နူကံၚ်ဇြဳပၞာန် ပန်ဖျေံလွဟ်ဇၞော် ပ္ဍဲကွာန် မၞုံပွိုၚ်ဍုၚ်ကျာ်ထဝ် တိဍာ်ဒပ်မဟာ (၁) ဗော်သွးကောန်ဂကူကရေၚ် KNU ထိၚ်ဒဝ်လဝ် သီုကဵုတၚ်ရန်တၟံနွံနွံတုဲ ညးဒေသ (၃၈၀၀) တၠပြၚ် ဒးဂြိပ်ဒဴပါဲတိတ်ဒၟံၚ် နူဌာန်ဒ္တန်ရဂှ် KNU ခရိုၚ်သဓီု လလောၚ်တြးလဝ် ပ္ဍဲဂိတုဂျာန္နဝါရဳ စၟတ်တ္ၚဲ(၂၄)ဂှ်ရ။
နူတံဒပ် ဒပ်ပၞာန်တိုက်ကံၚ်ဇြဳပၞာန် ခလရ (၅၉၈) ဖျေံသ္ဇိုၚ်ယှိုဲကျေန်၊ ရးဒေသဗဂေါဂှ် ပ္ဍဲဂိတုဂျာန္နဝါရဳ တုဲကၠုၚ်စၟတ်တ္ၚဲ (၁၆) တေံ ပန်ဖျေံနၚ်လွဟ်ဇၞော် (၃)မ ပ္ဍဲဂကောံကွာန်ဝေန်ကာန် ပ္ဍဲပွိုၚ်ဍုၚ်ကျာ်ထဝ် တိဍာ် KNU ထိၚ်ဒဝ်လဝ်ဂှ်ရ။
ဟိုတ်နူမကမ်လွဟ်ဇၞော်ကံၚ်ဇြဳပၞာန် ပန်ဖျေံဏာလဝ်ဂှ်တုဲ ဆေၚ်ဖျာကိုဝ်မိုဝ်အံၚ် နူကွာန်ဝေန်ကာန်၊ သ္ၚိဥူတာန်ဂွေ ကေုာံ သ္ၚိမဇြေန်မာဥူတအ် ဇီုကပိုက် လီုလာ်လဝ်ရဂှ် ဓမံက်ထ္ၜးလဝ် ပ္ဍဲတၚ်လလောၚ်တြးဂှ်ရ။
ဒၟာနူတံဒပ်ကံၚ်ဇြဳပၞာန် ပန်ပှော်ဖျေံဒၟံၚ် လွဟ်ဇၞော် ပ္ဍဲကဵုပွိုၚ်ဍုၚ်ကျာ်ထဝ် ဗီုလၟုဟ်ဏံ ဟွံလအ်ဟွံလအ်တုဲ ညးဒေသ နူကဵုဂကောံကွာန်ဝေန်ကာန်၊ ဇြဳပျောၚ်၊ ပျေန်ကတိုဝ်ကုမ်၊ ခယွာ (၃၈၀၀) တၠပြၚ် ဒးပါဲဒဴတိတ် နူသ္ၚိဒၟံၚ်တုဲ ဒးဓလေတ်ပါဲဒၟံၚ် ပ္ဍဲဒၞာဲဗၠးဘဲလမျီုရဂှ် KNU ဟီုသ္ဂးလဝ်ရ။
ပ္ဍဲမွဲလပါ်ပၠန် ဒပ်ကံၚ်ဇြဳပၞာန်ဂှ် ယဝ်ရဒပ်ပံၚ်ကောံ ဒပ်ပၞာန်ဗၠးၜးကောန်ဂကူကရေၚ် KNLA တအ် လုပ်ဗတိုက် တံဒပ်ဍေံတအ်ကဵု ကောန်ဒပ်ဍေံတအ်မ္ဂး ပန်ဖျေံလွဟ်ဇၞော် ပ္ဍဲကွာန်ဏောၚ်ဂှ် ဟိုတ်နူဟီုဘပဠလဝ်ဂှ်ရ ညးဒေသတအ်ဟွံဂံၚ်မံၚ်တုဲ ဒးဂြိပ်ပါဲတိတ်ဒၟံၚ် နူကဵုကွာန်ဌာန်ဒၟံၚ်ရ။
ဟိုတ်နူဒပ်ကံၚ်ဇြဳပၞာန် ပန်ဖျေံလဝ်လွဟ်ဇၞော် ပ္ဍဲပွိုၚ်ဍုၚ်ကျာ်ထဝ် သီုကဵုတၚ်ရန်တၟံနွံနွံတုဲ ပ္ဍဲဂိတုဂျာန္နဝါရဳ နူကဵုစၟတ်တ္ၚဲ (၁) စဵုကဵု စၟတ်တ္ၚဲ (၂၃)ဂှ် ကောန်ညးအရာပ်(၁)တၠဒးချိုတ်လဝ်တုဲ (၁၀)တၠ ဂွံလဝ်ဘဲဝပ်ရဂှ် ဂွံတီကေတ် အတိုၚ်တၚ်လလောၚ်တြး KNU ခရိုၚ်သဓီုရ။
ပရိုၚ်-သြၚ်လောန်တိုၚ်(မ်)