နျူယျံက်၊ အဝ်ဂါတ် (၃)
ဇမၞော်သ္ကိုပ် ကုလသမဂ္ဂ အာန်တိုဝ်နဳယိုဝ် ဂူတာရက်(သ်) ဂှ် ဂၠးတိဏံဝွံ စနူပေါဲပၞာန်ဂံက် သၠုၚ်တိုန်ကၠုၚ်တုဲဂှ် ဒးဆေၚ်ဒၟံၚ်မုက်ကဵု အန္တရာယ်နျူကလဳယျာ မညာတ်ကေတ်ဟွံမာန်တံဂှ်တုဲ ပွမကလေၚ်ဖအိုတ်ကၠေံ နျူကလဳယျာဂှ်ဝွံ ဒှ်ပွမတော်ဆဗၠေတ်မှာမွဲရောၚ်ဂှ် ကဵုလဝ်သတိ ဟီုဂးလဝ် ပ္ဍဲတ္ၚဲစန်ဂှ်ရ။
“ပိုယ်တံ ဒဵုကဵုအခိၚ်လၟုဟ် ကုသိုလ်ခိုဟ်ဒၟံၚ် တၟေၚ်ၚ်တၟဟ်ဟ်ရ၊ ဆ္ဂး ကုသိုဟ်ခိုဟ်ဟီုဂှ် ဗျူဟာဟွံသေၚ်တုဲ နူကဵုပရေၚ်ကြံၚ်မ္ၚိုဟ် ပရေၚ်ဍုၚ်ကွာန်ပထဝဳ စဵုကဵုပဋိပက္ခ နျူကလဳယျာတံဂှ်လေဝ် ဒှ်ဇွောံစဵုဒၞါ မဂၠိုၚ်တိုန်ကၠုၚ်တံ ဟွံသေၚ်ပုဟ်” သာ်ဝွံ ပ္ဍဲအစကောံဓရီုကၟိန်ဍုၚ်မပါလုပ် ပ္ဍဲလိက်ကသုက် ညံၚ်နျူကလဳယျာဂွိုအ်ပြးဇးတံဂှ် ဂူတာရက်(သ်) ဟီုဂးလဝ်ရ။
တၚ်စၟတ် ဂူတာရက်(သ်) ဂမၠိုၚ် သွက်ဂွံစဵုဒၞါ ညံၚ်လွဟ်လက်နက် နျူကလဳယျာ ဂွိုအ်ပြးဇးအာဂှ်ဝွံ မံက်တိတ်ကၠုၚ် ပ္ဍဲကဵုကောံဓရီု ကလေၚ်သ္ၚဳဂၠိပ် လိက်ကသုက်တုပ်စိုတ်အလုံဂၠးကဝ် NPT မရနုက်ကဵု (၁၀) ဝါ လမျီုစလုပ်ကၠုၚ်လဝ် နူသၞာံ ၁၉၇၀ တေံရ။
ယၚ်ပေါဲသဳကၠဳ မကၠောန်ဗဒှ် ပ္ဍဲဂအုပ်ဌာန်ကုလသမဂ္ဂ မၞုံဍုၚ်နျူယျံက်ဂှ် ဟိုတ်နူယဲကပ်ကိုဝ်ဝေဒ်တုဲ ဒးပဆုဲပြံၚ်လဝ် နူသၞာံ ၂၀၂၀ တေံ ဂၠိုၚ်ၚ်ကဵုဝါတုဲ ကောဓရီုဏံဂှ် ကၠောန်ဗဒှ်အာ ဒဵုကဵုဂိတုအဝ်ဂါတ် (၂၆) တေံရ။
နိဿဲကဵု ပေါဲပၞာန်ယူကရုၚ်−ရုယှာဂှ် ကဵု ပရေၚ်ကြံၚ်မ္ၚိုဟ် တ္ကအ်ကိုဝ်ရဳယျာ ကဵု ဍုၚ်လ္ဒောဝ်ဗၟံက်တံဂှ်တုဲ ကောံဓရီုဂှ်ဝွံ ညံၚ်လိက်ကသုက် ဇြဟတ်ဂွံခိုဟ်တိုန်ဂှ်ကီု သွက်ဂၠးကဝ် သ္ဇက်ဒးဂွိၚ် မၞုံပွဳပွူပိုယ်တံဂှ် ညံၚ်ဂွံဒှ်ကိတ်ညာပ်ဒၟံၚ်ဂှ် ဂူတာရက်(သ်) ဟီုဂးလဝ်ရ။
အခါလၟုဟ် လွဟ်လက်နက်နျူကလဳယျာ အလုံဂၠးကဝ် အပံၚ် ဗဒါဲ (၁၃၀၀၀) ဂှ် သီဂိုၚ်စွံလဝ် ပ္ဍဲတိုက်လွဟ်လက်နက်တံတုဲ အန္တရာယ်ပြးဇးအာတံ ဇၞော်ကၠုၚ်ဒၟံၚ်တုဲ အခိၚ်မၞိဟ်မၚ်မွဲ သ္ဂောံတာဒၞါ ပွမသၠုၚ်တိုန်ဒၟံၚ်တံ ဍိုန်လျကၠုၚ်ဂှ် အရာအိုဿီုလေဝ် ဇြဟတ်ဍိုန်လျအာအိုတ်ရ” ဂှ် ဂူတာရက်(သ်) ဟီုဂးလဝ်ရ။
ပ္ဍဲဂိတုဂျာန္နဝါရဳဂှ် အမေရိကာန်၊ ကြုက်၊ ရုယှာ၊ ဗရေတ်တိၚ် ကေုာံ ပြၚ်သေတ် မဒှ်ဍုၚ် ကောန်ဂကောံကံၚ်ဇြဳပရေၚ်ဂီုကၠီု ကုလသမဂ္ဂလၟိုန် (၅) ဍုၚ်တံ ကေၚ်သ္ပလဝ်ကတိ သွက်ဂွံတာဒၞါ ညံၚ်လွဟ်လက်နက် နျူကလဳယျာ ထပ်ဂွိုအ်ပရးအာတံရ။
ပ္ဍဲကဵုကောံဓရီု ကလေၚ်သ္ၚဳဂၠိပ် အလန်လက္ကရဴအိုတ် သၞာံ ၂၀၁၅ ဂှ် ဂကောံဂမၠိုၚ်ဝွံ သွက်ပရေၚ်ကိစ္စမဗိုန်ဗတ် ဍာ်ဇမၠိၚ်တံဂှ် ဟွံဂွံလဝ်တၚ်တုပ်စိုတ်ရ။
Ref: Bangkok Post