ဟေဝ်ဇြေန်ကဳ၊ ဂျာန္နဝါရဳ (၂၅)
သွက်ဂွံသ္ပဒတန် ဂလာန်ပ္တိုန်သထံက်ဟုမ်ဂှ် ဒကေတ်အခိၚ်ဂၠိုၚ်ၚ်မ္ဂး ဍုၚ်ဝှေန်လာန်ဝွံ သွဳဒေန်ဟွံပါမွဲသာ် သွက်ဂွံလုပ်စိုပ် ဂကောံနေတဝ်ဂှ် ဂ္စါန်အာရောၚ်ဂှ် ဝန်ဇၞော်ကာဍုၚ်သ္အာၚ်ဝှေန်လာန် ပက်ကာဟာဝေတ်သတဝ် ဟီုဂးလဝ် ပ္ဍဲအေန်တာဗျူမွဲ ကေုာံ ပ္ဍဲကမ္ပဏဳဗလးရုပ်ရမျာၚ် ဝှေန်လာန်ညးဂမၠိုၚ်ပိုၚ်တံဂှ်ရ။
ဝန်ဇၞော်ကာဍုၚ်သ္အာၚ်ဂှ်ဝွံ သွက်ပရေၚ်ဂီုကၠီု ဍုၚ်သွဳဒေန် ကေုာံ ဍုၚ်ဝှေန်လာန်တံဂှ် ဒဒှ်မဝေၚ်ဒၟံၚ် မၞိဟ်ထ္ၜးဆန္ဒ မၞုံဍုၚ်သွဳဒေန် ခြာဟွံလအ်ဂှ်တုဲ ဒဒှ်မကဵုအခေါၚ် ကုကၟိန်ဍုၚ်နဝ်ဒေတ်တံ ဂွံအခေါၚ်လုပ် ပ္ဍဲဂကောံမဟာမိတ်တံ ညံၚ်ဂွိုအ်တုပ်စိုတ်ဂှ် ဖ္တိုက်ဖ္အောဝ်လဝ် တူရကဳ နကဵုတၚ်ရန်တၟံနွံနွံရောၚ်ဂှ် ဟီုဂး ပ္တိုန်လဝ်ဒုဟ်ပါ်ပါဲလဝ်ရ။
တၚ်ပ္တိုန်ဂလာန် သွက်သွဳဒေန် ကေုာံ ဝှေန်လာန်တံ နဒဒှ်ကောန်ဂကောံနေတဝ် ကၠာပေါဲရုဲမာဲတူရကဳ မကၠောန်ဗဒှ်ပ္ဍဲဂိတုမေဏံ ဂွိုအ်စိုပ်ဂှ် ဒဒှ်ရဍုၚ်ဇၞော်အာန်ကာရ သွက်ဂွံသ္ပဒတန် ဟွံစၟဳစလဝ်ဂှ် ညးဆက်ဟီုဂးလဝ်ဏီရ။
ပ္ဍဲအခိၚ်ပြဟ်ဟ်တေံ သမ္မတတူရကဳ ရဳသက်အာဒိုဝ်ဂါန်ဂှ် ပ္ဍဲဍုၚ်သကေန်ဒဳနေဗဳယျာဂမၠိုၚ် ဗွဲတၟေၚ် ကုညးမရှ်ေသှ်ေ ပရေၚ်ဗၠးၜး ကေုာံ အခေါၚ်အရာသ္ဇိုၚ် မဿလေမ်တံလဵုဟွံဟီု ကြဴနူပြဝ မယုတ်ပရေံ မဒှ်ပွဖ္ဍိုက်ဂရိုက်တုဲဂှ် သွက်ဂွံလုပ်စိုပ် ဂကောံနေတဝ်ဂှ် ဒဒှ်ရထံက်ဂလာန် ကုသွဳဒေန်ဟွံမာန်ဂှ် ဟီုဂးလဝ် ခိုၚ်ၚ်ကၠိုက်က်ရ။
မွဲအခိၚ်ဓဝ် ကၟိန်ဍုၚ်သကေန်ဒဳနေဗဳယျာ သီုၜါဍုၚ်ဂှ်ဝွံ သွက်ဂွံလုပ်စိုပ်ပ္ဍဲဂကောံမဟာမိတ်တံဂှ် ဒှ်ဒၟံၚ်ဒတုဲယျရောၚ် အမေရိကာန် သ္ဂးရ။
သွဳဒေန် ကေုာံ ဝှေန်လာန်တံဝွံ ကြဴနူရုယှာ လုပ်ၜက်ၜေတ်ယူကရုၚ်တုဲဂှ် သွက်ဂွံလုပ်စိုပ် ပ္ဍဲဂကောံနေတဝ်ဂှ် အာတ်ပ္တိုန်လဝ် သၞာံတုဲတေံတုဲ သွက်ဂွံဆက်အာဂတ ကရောံမအာတ်ပ္တိုန်လဝ် ကၟိန်ဍုၚ်တံဂှ် နွံပၟိက်ဒၟံၚ်ကဵု ပွထံက်ဂလာန် ဍုၚ်မလုပ်ဂကောံနေတဝ်လၟုဟ်တံ သီုဖအိုတ်ဏောၚ်ရ။
ဝန်ဇၞော်ကာဍုၚ်သ္အာၚ်ဝှေန်လာန်ဂှ် အကြာဝှေန်လာန်၊ သွဳဒေန် ကေုာံ တူရကဳတံဂှ် စပ်ကဵုအစဳဇန် သွက်ဂွံပံၚ်တောဲကဵု ဂကောံမဟာမိတ်ပၞာန် နေတဝ် သ္ကုတ်သၟဝ်ကျာၜါဍုၚ်ဂှ်တုဲ ဒဒှ်ရနွံပၟိက် သွက်ဂွံဒေါအ်လဝ်ကဵုခေတ္တ သတ္တဟာဗွဲမဂၠိုၚ်ဂၠေၚ်ဂှ် အဃောမဆဵုဂဗ သၟာန်သၟုက်လဝ် ကုရာ်တာဂှ် ဟီုဂးလဝ်ရ။
“ကၠာဂွိုအ်ကလေၚ်အာ ပေါဲသဳကၠဳပိဍုၚ်ဂှ် ဒေါအ်ထောံခေတ္တတုဲ ပ္ဍဲကဵုအကာဲအရာ လၟုဟ်ဒတုဲဂှ် နွံမံၚ်ဒၞါဲလဵုရောဟီုဂှ် ဒးဂၠါဲသွဟ်ဏောၚ်။ ဟိုတ်ဂှ်ရ ဟွံဂွံဖျေံသ္ဂုတ်သွာတ်ဏီပုဟ်” သာ်ဝွံ ဝန်ဇၞော်ကာဍုၚ်သ္အာၚ် ဟာဝေဒ်သတဝ် ဟီုဂးလဝ်ရ။
ဝှေန်လာန် ကေုာံ သွဳဒေန်တံဝွံ သွက်ဂွံပံၚ်တောဲကဵု ဂကောံမဟာမိတ်တံဂှ် ဒဒှ်ရစဳဇန်ဒၟံၚ်မွဲကရောံမွဲစွံဂှ် ဟီုဂးလဝ် ထပ်ကဵုထပ်တုဲ အကာဲအရာဏံဝွံ ဒဒှ်မဟွံပြံၚ်လှာဲဂှ်ကီု ဝှေန်လာန်ဂှ် သွဳဒေန်ဟွံပါမွဲသာ် ဆက်အာဂတတေံမာန်ဟာသၟာန်ဂှ် ညးဝွံ “သွက်ဂွံသဳကၠဳ ပရူပရာဏံဂှ် ဟွံမွဲပၟိက်ဏီပုဟ် အဲထေၚ်ရ” သာ်ဝွံ သှ်လဝ်ကဵုရ။
ဆ္ဂးကီုလေဝ် အရာမချိၚ်ခယျညးဂှ်ဝွံ ဒှ်ဒၟံၚ်ဗီုပြၚ် ဒစဵုဒစးဒၟံၚ်ကဵု တၚ်လလောၚ်ပ္တိတ် ညးမကဵုလဝ် သွက်ကမ္ပဏဳဗလးရမျာၚ်ဝှေန်လာန်ဂှ်ရ။
Ref: Novinite.com, Sofia