ကျာ်ထဝ်၊ ဂျာန္နဝါရဳ (၂၆)
တွဵုရးဍုၚ်မန်၊ ပွိုၚ်ဍုၚ်ကျာ်ထဝ်၊ ပ္ဍဲဗ္ဒါဲသၞေဟ်ကၚ်စၟဳစၟတ် ဂၠံၚ်ပန်သွာၚ်မုခ်ပြေၚ် (မုပ္ပလၚ်) ဂှ် ပ္ဍဲဂိတုဂျာန္နဝါရဳ (၂၅) အခိၚ်လ္ဒေါဝ်တ္ၚဲဂှ် လွဟ်ဇၞော်ဒတုံစှ်ေ လ္တူကွဳစက်အာတရဴတုဲ ဗ္တိုဟ်ထ္ကးအာဂှ်ရ (၁) တၠ ချိုတ်တုဲ (၁၀) တၠ ကလိဂွံလဝ်ဝပ်ဂှ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ပ္ဍဲကဵုတ္ၚဲဂှ် လဒေါဝ်တ္ၚဲ ၜိုတ် (၁၂) နာဍဳဂှ် လွဟ်ဇၞော် ဒတုံထ္ကးအာလဝ် လ္တူကွဳစက်အာတရဴ မမၚ်ဒၟံၚ် သွက်ဂွံဒုၚ်စၟဳစၟတ် ဗ္ဒါဲသၞေဟ်ကၚ်စၟဳစၟတ် ဂၠံၚ်ပန်သွာၚ်မုခ်ပြေၚ် (မုပ္ပလၚ်) ဂှ်ရ။
မကမ်လွဟ်ဇၞော် (၄၀) မမဂှ်ဝွံ အပ္ဍဲသၞေဟ်ကၚ်ပရေၚ်စၟဳစၟတ် ကံၚ်ဇြဳပၞာန်ဂှ် ဗၠာဲသၟိၚ် ကေုာံ ကောန်ပၞာန်တံ အရေဝ်ဂၠိုၚ်တုဲ ကောန်ပၞာန်မွဲတၠ နူကဵုပန်ပှော်ပစူစုတ်ဂှ် ဒတုံဗ္တိုဟ်ထ္ကးအာလဝ် လ္တူကွဳစက်အာတရဴ မၞုံခြာဇမ္ၚောဲ မွဲဖာလုၚ် ဗ္ဒါဲသၞေဟ်ကၚ်ဂှ်ရ။
မကမ်လွဟ်ဇၞော် ဒတုံဗ္တိုဟ်ထ္ကးအာလဝ် လ္တူကွဳစက်အာတရဴဂှ်ရ မၞိဟ်တြုံ (၁) တၠ ချိုတ်လဝ်တုဲ မၞိဟ်တြုံ၊ မၞိဟ်ဗြဴ မပါကၠုၚ် လ္တူကွဳစက်တံ (၉) တၠ ကလိဂွံလဝ်ဝပ်ရ။
ဟိုတ်နူမကမ်လွဟ်ဇၞော်တုဲ ညးဍုၚ်ကွာန်အာတရဴ မဇီုကပိုက်ချိုတ်လဝ်တံဂှ် ပလံၚ်ဗစိုပ်လဝ် ရုၚ်ဂဥုဲပွိုၚ်ဍုၚ်ကျာ်ထဝ်ရောၚ်ဂှ် ဂွံတီကေတ်ရ။
ပ္ဍဲပွိုၚ်ဍုၚ်ကျာ်ထဝ်ဂှ် နူကဵုတမ်ဒပ်ကံၚ်ဇြဳပၞာန်တံ ဟိုတ်နူပန်ပှော်ဒၟံၚ် လွဟ်ဇၞော် လၟေၚ်ဒဒှ်တ္ၚဲဂှ်ရ ညးဒေသ (၃၈၀၀) ပြၚ် ဒးထောံလသာ ဌာန်ဒၟံၚ် ဒးဂြိပ်ဒဴဒၟံၚ်ဂှ် ခရိုၚ်သဓီု ဒပ်မဟာ (၁) ဗော်သွးကောန်ဂကူကရေၚ် KNU တံ လလောၚ်ပ္တိတ်လဝ်ရ။
ပရိုၚ်−သြၚ်လောန်တိုၚ်(မ်)