ဍာ်ဗု၊ ဂျာန္နဝါရဳ (၂၆)
ရးဒေသဇၞော်တၞၚ်သဳ၊ ပွိုၚ်ဍုၚ်ဍာ်ဗု၊ ပ္ဍဲဒေသ(ကံပေါက်)ဂှ် ပ္ဍဲဂိတုဂျာန္နဝါရဳ (၂၅) ပယျာံဂယးဂှ် သီုကဵုပါလုပ် သ္ကိုပ်အုပ်ဓုပ် ကံၚ်ဇြဳပၞာန် မခါန်ကၞက်လဝ်ဂှ် (၃) တၠ ဒးဒုၚ်ပန်ပှော်တုဲ (၁) တၠ ချိုတ်တုဲ (၂) တၠ ကလိဂွံလဝ်ဝပ်ဂှ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
တ္ၚဲဏံ အခိၚ်နူဂယး ၜိုတ် (၁၀) နာဍဳဂှ် သၟာသေနာတ်ဂမၠိုၚ် ကၠုၚ်စိုပ်ပန်ပှော်လဝ် ဥူအေဟာန် မဒှ်က္ဍိုပ်သ္ကိုပ်တြေံ ဂကောံပျူသဝ်ထဳ သ္ကိုပ်အုပ်ဓုပ်တြေံ ကွာန်ဇြာဒဳ ဒေသ(ကံပေါက်) ပ္ဍဲကဵုကၠအ်ညးမပိုၚ်ဂှ်ရ ကလိဂွံလဝ်ဝပ်သေနာတ် (၄) လစုတ်တုဲ ပ္ဍဲကဵုဒၞါဲ မဒှ်ပရူဂှ်ဟေၚ် ချိုတ်အာလဝ် လွာဲဂှ်ရ။
သ္အာၚ်နူဂှ်ပၠန် ပ္ဍဲပယျာံဂယး ၜိုတ် (၁၁) နာဍဳဂှ်လေဝ် သၟာသေနာတ်ဟွံတီယၟုဂမၠိုၚ် ကၠုၚ်စိုပ်ပန်ပှော်လဝ် သ္ကိုပ်အုပ်ဓုပ် ဂကောံကွာန်(ကံပေါက်) ဥူခေန်သဵု ကေုာံ ကွးညး ဥူလှဌေတံဂှ်ကီုရ။
ဟိုတ်နူဒးဒုၚ်ပန်ကဵုသေနာတ်ဂှ်ရ သ္ကိုပ်အုပ်ဓုပ် ဥူခေန်သဵု ကေုာံ ကွးညး ဥူလှဌေတံ ကြဴနူကလိဂွံလဝ် ဘဲဝပ်သ္ကာတ်မြဟ်တုဲ ပလံၚ်ဗစိုပ်ကဵုလဝ် ရုၚ်ဂဥုဲ(ကံပေါက်) နကဵုယာန်ဖ္ဍိုက်မၞိဟ်ယဲတံဂှ် ဂွံတီကေတ်ရ။
အတိုၚ်ဂလာန်ညးဒေသတံဂှ်မ္ဂး ဥူခေန်သဵု မဒှ်သ္ကိုပ်အုပ်ဓုပ် မဒးဒုၚ်ပန်ဂစိုတ်လဝ် ကဵုသေနာတ်ဂှ်ဝွံ ဒှ်ညးကရေဲလဝ် ဟွံဖေက်ဂကောံဒပ်စဵုဒၞါညးဍုၚ်ကွာန် PDF တံပုဟ်ဂှ် သ္ဂးအိုတ်ရ။
သီုကဵုပါလုပ်သ္ကိုပ်အုပ်ဓုပ် က္ဍိုပ်သ္ကိုပ်ဂကောံပျူသဝ်ထဳတံ ဒးဒုၚ်ပန်ပှော်တုဲဂှ် က္ၜၚ်ကျာသၞေၚ်ဝဲ ကံၚ်ဇြဳပၞာန် (၂) ဖ္ဍိုက် ကၠောန်သ္ပဂေတ်ဂေၚ်လဝ် ဒေသ(ကံပေါက်) ဂှ်ရ။
ပရေၚ်ပန်ပှော်ဏံဂှ် ဂကောံလဵု ကၠောန်လဝ်ရောဟီုဂှ် ဒဵုကဵုအခိၚ်လၟုဟ် လလောၚ်ပ္တိတ်လဝ် ဟွံမွဲဏီရ။
တုဲကၠုၚ် ဂိတုဂျာန္နဝါရဳ (၂၄) တေံဂှ်လေဝ် ကိုဝ်လေန်ထောန် မဒှ်အ္စာပရိုၚ် လိက်ပရိုၚ်မျဝတဳ ဒပ်ပၞာန်ပိုၚ် ဒၟံၚ်ဍုၚ်ကလိန်အံၚ်၊ ပွိုၚ်ဍုၚ်ဍာ်ဗုဂှ် ဟိုတ်နူရေၚ်တၠုၚ်ဒၟံၚ် နဒဒှ်ရဲကဵုပရိုၚ်ဒပ်ပၞာန်ဂှ်ရ ဂကောံဒပ်ပံၚ်ကောံ Spring Dhamma PDF (KLA) တံ ပန်ပသောၚ်လဝ်ရ။
ပရိုၚ်−သြၚ်လောန်တိုၚ်(မ်)