မြဝတဳ၊ အဝ်ဂါတ် (၃)
လ္ပာ်ဥကယေတ်ထ ကေုာံ ဒၞါဲ(သုံးထပ်ကွေ့ ) ဂၠံၚ်ကွဳစက် မြဝတဳ−ဝဝ်လေဝ် မဒှ်တိဍာ်ထိၚ်ဒဝ် ဒပ်မဟာ (၆) ခရိုၚ်ဒူပလာယာ KNU ဂှ် ပ္ဍဲဂိတုအဝ်ဂါတ် စၟတ်တ္ၚဲ (၂) ဇိုၚ်သဝ်တ္ၚဲဂှ် ဒပ်ကံၚ်ဇြဳပၞာန် ကၠုၚ်စိုပ်ဂြာတ်လဝ်ဗမ် နကဵုက္ၜၚ်ကျာရဂှ် ဂွံတီကေတ် နူကဵုဂကောံပံၚ်ကောံ KNLA တံရ။
အကြာဒပ်ကံၚ်ဇြဳပၞာန် ကဵု ကရောၚ်ပၞာန်ကဝ်ဗရာ မဒှ်ဂကောံဒပ်ပံၚ်ကောံ ဒပ်ပၞာန်ဗၠးၜး ကောန်ဂကူကရေၚ် KNLA တံ မွဲဒမြိပ် (သုံးထပ်ကွေ့) သ္ကုတ်ဂၠံၚ်ကွဳစက် မြဝတဳ−ဝဝ်လေဝ်ဂှ် စပ္တံနူဂိတုဂျူလာၚ် (၇) တုဲကၠုၚ်တေံတုဲ ပေါဲဗ္တိုက်ဇီုမုက်ၜါလ္ပာ် သ္ကာတ်မြဟ်ကၠုၚ်လဝ်ရ။
ဒပ်ကံၚ်ဇြဳပၞာန်ဝွံ သွက်ပရေၚ်အုပ်ဓလီုတိဍာ်တံဂှ် နကဵုဇြဟတ်ဗွဲမဂၠိုၚ်ဂၠေၚ် ၜိုန်ရလုပ်ၜက်ၜေတ်ဗ္တိုက် လ္တူ(သုံးထပ်ကွေ့ ) မွဲဏှမွဲဏှကီုလေဝ် ဟိုတ်နူကရောၚ်ပၞာန်ကဝ်ဗရာတံ ကလေင်ဗ္တိုက်လဝ်တံဂှ်တုဲ ကောန်ဒပ်ကံၚ်ဇြဳပၞာန် ဗွဲမဂၠိုၚ်ဂၠေၚ် ဇီုကပိုက်ချိုတ်အာတုဲ ဒးဆုတ်ကလေင်အာလဝ်ရ။
ပ္ဍဲဂိတုအဝ်ဂါတ် စၟတ်တ္ၚဲ (၂) ဇိုၚ်သဝ်တ္ၚဲဂှ် မွဲဒမြိပ်(သုံးထပ်ကွေ့)ဂှ် ဒပ်ကံၚ်ဇြဳပၞာန် ကၠုၚ်စိုပ်ဂြာတ်လဝ်ဗမ် နကဵုက္ၜၚ်ကျာတုဲ အကာဲအရာဇီုကပိုက်ဒးဂှ် ဟွံတီကေတ်ဏီရ။
လ္ပာ်ဒေသဥကယေတ်ထဂှ်လေဝ် ပွမဗ္တိုက်ကဵုက္ၜၚ်ကျာ ကံၚ်ဇြဳပၞာန်ဂှ်ဝွံ ၜက်လုပ်ဒၟံၚ်တိဍာ် ဒဵုကဵုလ္ပာ်သေံတေံတုဲ ပွမပန်ပှော်ဒၟံၚ်တံ ကၠောန်ၜိုတ်ဒၟံၚ်ဂှ်လေဝ် ကောန်ဒပ်စဵုဒၞါညးဍုၚ်ကွာန်မွဲတၠ ဟီုရ။
သ္အာၚ်နူဂှ်ပၠန် လ္ပာ်ဗ္ဒိုပ်ဥကယေတ်ထ ဂၠံၚ်ဇၞော် မြဝတဳ−ဝဝ်လေဝ်ဂှ်လေဝ် အကြာဒပ်ကံၚ်ဇြဳပၞာန်ကဵု ဂကောံဒပ်ပံၚ်ကောံ ကောန်မာန်ဒိုဝ် ကရောၚ်ပၞာန်ဝဳနန် Lion တံဂှ် ပေါဲဗ္တိုက်ဇီုမုက်တံ သ္ကာတ်မြဟ်ဒၟံၚ်တုဲ ၜါလ္ပာ်ဇီုကပိုက်ပြဟ်လလုဲအာတံ နွံဒၟံၚ်ရ။
ပြဟ်ဟ်ဏံဂှ် ဟိုတ်နူပေါဲဗ္တိုက်ၜါလ္ပာ်တုဲ ညးဍုၚ်ကွာန်ဒေသတံ ထပ်ဒးဂြိပ်ဒဴပါဲဒလေတ်ဒၟံၚ်ရဂှ် ညးရီုဗၚ်ကဵုဒၟံၚ် ပရေၚ်ပါဲဒဴဘဲပၞာန်တံ သ္ဂးအိုတ်ရ။
ပရိုၚ်−သြၚ်လောန်တိုၚ်(မ်)