သဓီု၊ အဝ်ဂါတ် (၄)
ညးဒေသ နူကဵုကွာန်ထုၚ်ဗဵုလေဝ်၊ ပွိုၚ်ဍုၚ်သဓီု၊တွဵုရးဍုၚ်မန် ကံၚ်ဇြဳပၞာန်သီအဝဵုတံ မစံၚ်ပလီုပလာ်လဝ်သ္ၚိဌာန်တံဂှ်ဝွံ ဟိုတ်နူပေါဲဗ္တိုက်ၜါလ္ပာ်တံ ကလေၚ်ညိၚ်ဝတ်ကၠုၚ်ဒၟံၚ်ဂှ်ရ ကလေၚ်စဴကၠုၚ်ဌာန်ဒၟံၚ်တံကီုလေဝ် ဒးဂဗဒၟံၚ်ကဵုဒဒိုက် သွက်ဒၞါဲမံၚ်စံၚ်တံရဂှ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
တုဲကၠုၚ် ပ္ဍဲဂိတုဂျောန် (၁၅) တေံဂှ် ပ္ဍဲဗဒါဲကွာန် ထုၚ်ဗဵုလေဝ်ဂှ် အကြာဒပ်ပၞာန်ဗၠးၜး ကောန်ဂကူကရေၚ် KNLA ဒပ်ပံၚ်ကောံတံကဵု ဒပ်ကံၚ်ဇြဳပၞာန်တံဂှ် ပေါဲဗ္တိုက်တံ က္တဵုဒှ်ဒၟံၚ်တုဲ ဒပ်ကံၚ်ဇြဳပၞာန်တံ စံၚ်လဝ်သ္ၚိဒၟံၚ် ညးဒေသတံရ။
ဟိုတ်နူဒးဒုၚ်စံၚ်ပလီုပလာ်ဂှ်ရ သ္ၚိဒၟံၚ်ညးဒေသ (၆၉) မ နူကဵုကွာန်ထုၚ်ဗဵုလေဝ် သ္ၚိ (၁၅၀) မပြၚ်မၞုံဂှ် တူအာပၟတ်တုဲ ဘာလကျာ်ကဵု ဘာဗ္တောန်လိက်တံလေဝ် တူအာပၟတ်အာကီုရ။
ညးဒေသ မကလေၚ်စဴကၠုၚ် ဌာန်ဒၟံၚ်တံဝွံ ဟိုတ်နူသ္ၚိဒၟံၚ်တံ တူအာလဝ်ပၟတ်ဂှ်ရ သွက်ဒၞါဲဇွောံမံၚ်တံဂှ် ဒးဂဗဒၟံၚ်ဒဒိုက်တံတုဲ သွက်ဂွံထပက်တာဲယာယဳတံဂှ်လေဝ် ဒးဆေၚ်ဒၟံၚ်မုက်ကဵု အကာဲအရာဟွံဂံၚ်အာဗာ် ဆုဒုန်ပ္ဍဲဒဵုဂြိုပ်တေံအိုတ်ရ။
အခိၚ်လၟုဟ်ဂှ် ညးဍုၚ်ကွာန် ကလေၚ်စဴကၠုၚ်ဌာန်ဒၟံၚ်တံဝွံ ပ္ဍဲသ္ၚိဒၟံၚ်မသကလောကောဒေံ မစုက်ဒၟံၚ်တံဂှ် ကဵု ဒၞါဲပၟတ်တူလဝ်တံဂှ် ကၠောန်သ္ပဇွောံမံၚ်ယာယဳတံတုဲ မံၚ်စံၚ်ဒၟံၚ်အိုတ်ရ။
ညးနွံတာလျိုၚ် ခရိုၚ်သဓီု ဒပ်မဟာ (၁) KNU တံဂှ် သွက်ဂွံရီုဗၚ်ထံက်ပၚ် သ္ၚိဒၟံၚ် မတူအာပၟတ်လီုလာ်အာလဝ်တံမာန်ဂှ် ပွမကံၚ်ဒၟံၚ်စရၚ်တံ ကၠောန်ၜိုတ်ဒၟံၚ်တုဲ ဆက်စၠောံရေၚ်တၠုၚ်ကဵုဒၟံၚ် ဂကောံရီုဗၚ်ပရေၚ်မၞိဟ် မဆေၚ်စပ်တံရဂှ် သ္ဂးရ။
ဟိုတ်ဒၟါနူပေါဲဗ္တိုက် ထုၚ်ဗဵုလေဝ် ပွိုၚ်ဍုၚ်သဓီု တိဍာ်ထိၚ်ဒဝ် ဒပ်မဟာ (၁) KNU ဂှ်တုဲ ညးဒေသ (၁၀၀၀၀) ပြၚ် ဒးဂြိပ်ဒဴပါဲဒလေတ်လဝ်တုဲ အခိၚ်လၟုဟ်ဂှ် ညးဍုၚ်ကွာန်ပါဲဒဴဘဲပၞာန် ဗွဲမဂၠိုၚ် ကလေၚ်စဴကၠုၚ်ဒၟံၚ် ဌာန်ဒၟံၚ်တံအိုတ်ရ။
ပရိုၚ်−သြၚ်လောန်တိုၚ်(မ်)