ဍာ်ဗု၊ ဂျာန္နဝါရဳ (၂၆)
ရးဒေသဇၞော်တၞၚ်သဳ၊ ပွိုၚ်ဍုၚ်ဍာ်ဗု၊ ဍုၚ်ကလိၚ်အံၚ်၊ ပ္ဍဲခုၚ်ဗိလိယာတ် ဗ္ဒာဲရုၚ်ပရေၚ်သိုၚ်ခၞံဂှ် ဂိတုဂျာန္နဝါရဳ စၟတ်တ္ၚဲ(၂၄) အခိၚ်ၜိုတ်(၃)နာဍဳဂှ် သၟာပရိုၚ် လိက်ပရိုၚ်မျဝတဳမွဲတၠ ဟိုတ်နူဒးဒုၚ်ပန်လဝ်ကဵု လွဟ်သေနာတ်တုဲ ဒးချိုတအ်လဝ်ရဂှ် ညးဒေသဂမၠိုၚ် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
သၟာပရိုၚ်ကိုဝ်လေန်လေန်ထောန် ချူဒၟံၚ်ပရိုၚ် ပ္ဍဲလိက်ပရိုၚ်မျဝတဳ ဒပ်ပၞာန်ပိုၚ်ဂှ် ဂကောံပံၚ်တောဲ Spring Dhamma PDF (KLA) ဖျေံသ္ဇိုၚ် ဍုၚ်ကလိၚ်အံၚ် ကေုာံဒပ်ပရေၚ်စဵုဒၞာညးဍုၚ်ကွာန် ခရိုၚ်ထဝါဲ(DDPDF)တအ် ပန်ပသောၚ်သ္အးလဝ်ရ။
သၟာပရိုၚ်ကိုဝ်လေန်လေန်ထောန်ဂှ် ဟိုတ်နူဒးဒုၚ်ပန်လဝ်ကဵု လွဟ်ကြပ်ပ်တုဲ ဒးလဝ်ဘဲဝပ်သေနာတ် ပ္ဍဲက္ဍိုပ်ကဵု ပ္ဍဲဇကု (၇)လစုတ်တုဲ ပ္ဍဲဒၞာဲဂှ်ဟေၚ် ဒးချိုတ်အာလဝ်ရ။
“ဍေံဂှ် ကမၠောန်သၟာပရိုၚ်လေဝ် ကၠောန်ဒၟံၚ်၊ ကဵုဒပ်ပၞာန်လေဝ် ကဵုမံၚ်ပရိုၚ်ဂှ်ရ ပသောၚ်ထောံရ၊ မၚ်ရံၚ်ဒၟံၚ်ဍေံ တၟာလအ်ရ။ ပ္ဍဲဗဝ်ခုမ် မၞိဟ်စုၚ်တုဲ ကၠုၚ်ကၠုၚ်ကေတ်ဏာမံၚ်ပရိုၚ်တုဲ ကလေၚ်ပလံၚ်ကဵုမံၚ် စကစရ” ဂှ် ညးတာလျိုၚ် လလောၚ်ပရိုၚ် Spring Dhamma PDF (KLA) ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
ကြဴနူကိုဝ်လေန်လေန်ထောန်ဒးဒုၚ်ပန်လဝ်တုဲဂှ် ကောန်ဒပ် ပၞာန်တိုက်ကံၚ်ဇြဳပၞာန် ခမရ (၄၁၀) ဖျေံလဝ်သ္ဇိုၚ်ပ္ဍဲဍုၚ်ကလိၚ်အံၚ်စိုပ်ကၠုၚ်လဝ်တုဲ ကၠောန်လဝ်ပရေၚ်ဖံက်ပန်လွဟ်ကီု သီုကၠောန်လဝ်ပရေၚ်စၟဳစၟတ်ရဂှ် ဟီုသ္ဂးလဝ်ရ။
ပ္ဍဲကဵုကြဴဂှ်မ္ဂး ဒပ်ကံၚ်ဇြဳပၞာန်ဂှ် ဖ္ဍိုက်ဏာဇွကိုဝ်လေန်လေန်ထောန် ချိုတ်အာလဝ်ဂှ်ပ္ဍဲဒပ်ပၞာန်ဏောၚ်ဂှ် ဂွံတီကေတ်ရ။
Spring Dhamma PDF (KLA)ဂှ် ပ္ဍဲဂိတုဒဳဇြေမ်ဗာ တုဲကၠုၚ် စၟတ်တ္ၚဲ (၁၀) ဂှ်လေဝ် အကြာပ်ဒပ်ဗၠာဲသၟိၚ် နူကဵုဗ္ဒပ်ဗၠာဲသၟိၚ်တိဍာ်ကလိၚ်အံၚ် ယျေဝ်ဝေန်ထောန်ဂှ် ပန်ပသောၚ်လဝ် ပ္ဍဲကဵုသ္ၚိဒၟံၚ်ညးရ။
ပရိုၚ်-သြၚ်လောန်တိုၚ်(မ်)