ရေဝ်၊ ဂျာန္နဝါရဳ(၂၆)
ဂကောံကံၚ်ဇြဳပၞာန် မၞုံဒၟံၚ် ပ္ဍဲရုၚ်ပရေၚ်ပညာပွိုၚ်ဍုၚ် ကေုာံခရိုၚ် မၞုံပ္ဍဲအရာပ်ယျာန်မျိုဝ်အံၚ်၊ ဍုၚ်ရေဝ်ဂှ် ပ္ဍဲဂိတုဂျာန္နဝါရဳ စၟတ်တ္ၚဲ (၂၅) အခိၚ်နူဂယးဂှ် ဒးဒုၚ်ဗတိုက်လဝ်တုဲ ပရေၚ်ပန်ပှော်ညးသ္ကအ် က္တဵုဒှ်လဝ်ရဂှ် ညးတာလျိုၚ်လလောၚ်ပရိုၚ် ဒပ်ဒမၠုက်ရာမည (R.G.F) ဟီုသ္ဂးလဝ်ရ။
အခိၚ်နူဂယး ၜိုတ် ၄ နာဍဳ ၃၀ မိနေတ် ပ္ဍဲတ္ၚဲဂှ် ဂကောံဒပ်ကံၚ်ဇြဳပၞာန် ဖျေံလဝ်ဗ္ဒပ် ပ္ဍဲရုၚ်ပရေၚ်ပညာ ဇြဟတ်ၜိုတ် ၁၀ တၠပြၚ်ၚ်ဂှ် အာစိုပ်ကၠဟ်စုတ်လဝ်မာၚ်မွဲမတုဲ ဟိုတ်နူခတိုဟ်အာလဝ်ဂှ်ရ ပရေၚ်ပန်ပှော် နူလပါ်ကံၚ်ဇြဳပၞာန် နွံကၠုၚ်ရဂှ် ဟီုသ္ဂးလဝ်ရ။
“ကၠာဂှ် ကၠဟ်စုတ်လဝ် ၜိုတ်ကဵုသတိရ။ လပါ်ဍေံတအ်ကလေၚ်ပန်နၚ်တုဲ ပရေၚ်ပန်ပှော်ညးသ္ကအ် ဒှ်ကၠုၚ်ရ။ လပါ်ဍေံတအ် ဂွံလဝ်ဒၞာဲခိုၚ်ဒၟံၚ်တုဲ ကလေၚ်ပန်ၜိုတ်မွဲလစုတ်ဍောတ်တုဲ ကလေၚ်ဆုတ်ကလေၚ်လဝ်ရ။ အကြာဂှ် သ္ၚိတအ်လေဝ် နွံမံၚ်တုဲ ဖေက်ညးဍုၚ်ကွာန်တအ် ဇီုကပိုက်ဒးတုဲ ကလေၚ်ဆုတ်လဝ်ရ” ဂှ် လျိုၚ်လလောၚ်ပရိုၚ် ဒပ်ဒမၠုက်ရာမည(R.G.F) ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
ပရေၚ်ပန်ပှော်ၜါလပါ် ဒှ်လဝ် ၜိုတ်ပွိုၚ် (၁၀)မိနေတ်တုဲဂှ် ပၞာန်ရီု နူလပါ်ကံၚ်ဇြဳပၞာန် ကလေၚ်စိုပ်ကၠုၚ်တုဲ ကလေၚ်ဆုတ်တိတ်လဝ်ရဂှ် သ္ဂးလဝ်ရ။
ပ္ဍဲပရေၚ်ပန်ပှော်ဂှ် လပါ်ဒပ်ဒမၠုက်ရာမည ပရေၚ်ဇီုကပိုက်ဒးလဝ်ဝပ် ဟၟဲတုဲ ပရေၚ်ဇီုကပိုက်လပါ်ဒပ်ကံၚ်ဇြဳပၞာန်ဂှ် ဟွံဂွံတီလဝ်ဏီရဂှ် ဟီုသ္ဂးလဝ်ရ။
“နူဂယးဏံ ဒှ်ပန်လဝ်ကွေံရ။ မိၚ်ရမျာၚ်ခတိုဟ်တုဲ ဒှ်ပန်လဝ်ရ။ လအ်ဂှ် ဍေံဟွံလအ်ပုဟ်။ ပရေၚ်ဇီုကပိုက်သီုၜါလပါ်ဂှ် ဟၟဲပုဟ် မိၚ်လဝ်ရ” ဂှ် ညးဒေသမွဲတၠ ဟီုသ္ဂးလဝ်ရ။
အခိၚ်ပရေၚ်ပန်ပှော် က္တဵုဒှ်လဝ်ဂှ် ဂကောံကံၚ်ဇြဳပၞာန် ထပ်စိုပ်ကၠုၚ်လဝ်တုဲ စဵုကဵုအခိၚ် (၁၀) နာဍဳနူဂယးပြၚ် ပရေၚ်စၟဳစၟတ် ပ္ဍဲအရာပ်ယျာန်မျိုဝ်အံၚ် တေၚ်ဂြတ်ဒၟံၚ်ရဂှ် ဂွံတီကေတ်ရ။
ပ္ဍဲဂိတုဂျာန္နဝါရဳ စၟတ်တ္ၚဲ (၆) အခိၚ်နူဂယးဂှ် ရုၚ်အုပ်ဓုပ် ကေုာံရုၚ်စရၚ်တိ ပ္ဍဲကဵုအရာပ်သဳရိမာလာကဵု အရာပ်သဳရိနန္ဒာ ဍုၚ်ရေဝ် ဒးဒုပန်လဝ် နကဵုလွဟ်ဇၞော်တုဲ ရုၚ်စရၚ်တိဂှ် ဇီုကပိုက်လီုလာ်လဝ်ဏီရ။
ပ္ဍဲသၞာံ ၂၀၂၂ ဂှ် ရုၚ်ဆေၚ်ရာကဵု ဌာနသၟဝ်တဲကံၚ်ဇြဳပၞာန် ပ္ဍဲဍုၚ်ရေဝ် ဒးဒုၚ်ဗတိုက်လဝ် ဟွံအောန်နူ (၁၀) ဝါနွံတုဲ ပရေၚ်သ္ဇိုၚ်ဝန်တအ်ချိုတ် ဒးဘဲဝပ်တအ်၊ စမြိုၚ်ရုၚ် ဇီုကပိုက်ဒးလီုလာ်လဝ် နွံကၠုၚ်ရ။
ပရိုၚ်-သြၚ်လောန်တိုၚ်(မ်)